Yohane 7 - Kivunjo New Testament 1999

Yesu na Wana wa Wamae

¹ Numa ya isho Yesu naweichumia urukyenyi lo Galyilaya; kyipfa alekunda iyenda uruka lo Uyuda-pfo, cha kyipfa Wayuda wawekundi immbaaga.

² Na mfiri ung'anyi o Wayuda, mfiri ung'anyi o matengo, uwekyeri kufuhi.

³ Kyasia wana wa wamae wakammbia, “Wuka iha, uyende uruka lo Uyuda, kundu wanalosho wapfo nawo waiṙime iwona maṟunda gapfo.

⁴ Cha kyipfa kuwoṙe mndu eiṙima iwuta kyindo kui kyiṟika kokooya nakundi imanyika-pfo. Kyipfa kowuta shindo-shi kuṟingyishie ko wandu wa wuyana.”

⁵ Kyipfa maa wana wa wamae walemwiṙikyia-pfo.

⁶ Kyasia Yesu kawawia, “Kyiyeri kyako kyilandeafukyie-pfo; indi kyiyeri kyanyu orio mfiri kyikyeri ho.

⁷ Wandu wa wuyana weiṙima imsuo nyoe-pfo; indi wangyisuuye inyi, cha kyipfa inyi ngyiṟingyishia kye mawuto gawo gamawicho.

⁸ Yendenyi mundechihiyo ipfo mṟumoenyi o mfiri ung'anyi; inyi ngyiyenda pfo-pfo; cha kyipfa kyiyeri kyako kyilandeshikye-pfo.”

⁹ Na oe amwawie isho, kakaa mfiri ngyaangu kulya Galyilaya.

Yesu Kyiyeri kya Mfiri Ung'anyi o Matengo

¹⁰ Na wana wa wamae wamndechihiyo halya-ndu mṟumoe uwekyeri, na oe kayenda ho kui kyiṟika.

¹¹ Kyasia Wayuda wakampfula kulya mṟumoenyi, wakagamba, “Nyi kwi ai mndu ulya?”

¹² Kukowaṙa mnunuwo ifoi kyipfa kya Yesu kyiiṙi kya walya wawesanzie halya. Wengyi wakagamba, “Nyi mndu mcha.” Na wengyi wakagamba, “Chi wuṙo-pfo; nailemba walya wasanzie iha.”

¹³ Kyaindi kuwoṙe mndu alemsenda na pata-pfo, kyipfa kya iowuo Wayuda.

¹⁴ Na makyiṙi-gawi ga mṟumoe ulya Yesu kaiṙa na hekalunyi kalosha.

¹⁵ Wayuda wakaṟiyio, wechigamba, “Ichu nawaṙa kuṙa wuṟango na oe asomie-pfo?”

¹⁶ Kyasia Yesu kawagaluo, kagamba, “Malosho gako chi gako inyi-pfo, indi nyi ga ulya alengyiṙuma.

¹⁷ Mndu kakunda iwuta kyilya Ruwa akundi, nechimanya mbonyi tsa malosho-ga, kye gawukyie ko Ruwa, ang'u kye inyi ngyiṙeṙa kui wuchilyi woko inyi ngyimonyi tupu.

¹⁸ Ulya aṙeṙa kui wuchilyi wokye amonyi tupu nekyepfula kyiṟumi kyakye amonyi; indi ulya apfula kyiṟumi kya ulya alemṙuma, icho nyi o loi, maa mrimenyi kokye kuwoṙe wunyamaṟi-pfo.

¹⁹ Ngyesa Mose alemuenenga uwawaso-pfoe? Maa kuwoṙe umwi onyu aiosha uwawaso-pfoe. Ny'kyilyi mukundi ingyiwaaga.”

²⁰ Wandu wawesanzie halya wakagaluo, wakagamba, “Loi, nuwoṙo nyi mṟufui mmbicho! Nyi wui akundi ikuwaaga?”

²¹ Yesu kagaluo kawawia, “Inyi ngyilewuta kyindo kyimwi, na nyoe moose muiṟiyio kyipfa kya kyindo-kyo.

²² Mose nalemuenenga mṟumoe o iṙino kyaindi mṟumoe-cho chi uwukyie ko Mose-pfo, indi nyi ko waku wanyu; na nyoe mfiri o onyonya mokyeṙina mndu.

²³ Kyasia kokooya mndu nekyeṙino mfiri o onyonya, kundu uwawaso lo Mose lulachenyamaṟika, ny'kyilyi mungyisuuya inyi kyipfa ngyilekyiṟa mndu mfiri o onyonya?

²⁴ Kyasia mulaanduye mndu kui imwambuya ipfo kyanja, indi anduyenyi wandu kui sungusinyi.”

Ngyesa Ichu Nyi Oe Mesia?

²⁵ Kyasia wandu waata wa Yerusalemu wakagamba, “Ichu chi ulya wandu waimpfula kundu wammbaage-pfoe?

²⁶ Kyeambuya chandu aiṙeṙa kulawoṙe iṟikyia kyindo kyaindi wasongoru wa Wayuda waimmbutia kyindo-pfo. Ngyesa kyeiṙima iwa wasongoru-wo wa Wayuda waichi kye ichu nyi oe Kristo?

²⁷ Ichu luichi nyi kwi awukyie; indi kyiyeri Kristo echicha kuwoṙe aichi kundu awukyie-pfo.”

²⁸ Kyasia Yesu kakuilenga kulya hekalunyi, kalosha echigamba, “Inyi mungyiichi, na kundu ngyiwukyie muichi; maa ngyilecha kui wuchilyi woko ngyimonyi-pfo. Ulya alengyiṙuma nyi o loi indi mumwichi-pfo.

²⁹ Inyi ngyimwichi, cha kyipfa ngyiwukyie kokye, na oe nyi oe alengyiṙuma.”

³⁰ Kyasia wakakunda immbaṙa; kyaindi kuwoṙe mndu alegoṟuo kuwoko kokye immbaṙa-pfo, kyipfa kyiyeri kyakye kyewutio kuṙo kyilekokyamshika-pfo.

³¹ Na wandu wafoi kyiiṙi kya walya wawesanzie halya wakamwiṙikyia, wakagamba, “Ngyesa kyiyeri Kristo echicha nechiwuta shindo shifoi sha maṟiyisho kuta ishi ichu aiwuta?”

Waringyi Wakaṙumo Iwaṙa Yesu

³² Mafarisayo wakaicho wandu walya wechinunuwa kyipfa kya Yesu. Kyasia wang'anyi wa makohanyi na Mafarisayo wakaṙuma waṟundi kundu wammbaṙe.

³³ Kyasia Yesu kagamba, “Hatsugai kyiyeri kyifuhi ngyikyeri hamwi na nyoe; numa ya iho ngyechiyenda ko ulya alengyiṙuma.

³⁴ Mochingyipfula maa mochingyiwona-pfo; na inyi handu ngyikyeri nyoe moiṙima icha na ho-pfo.”

³⁵ Kyasia Wayuda wakawesana, “Ichu nechiyenda kwi mṟasa lulechimmbona? Ngyesa nechiyenda mṟinyi ikyeri nja ya uruka loṙu kulya-ndu wandu walai Wayuda wekyekaa na iwalosha?

³⁶ Nyi kyindo kya mbaṟe iha ikyo aigamba, ‘Mochingyipfula maa mochingyiwona-pfo; na handu ngyikyeri nyoe moiṙima icha na ho-pfo?’ ”

Mfo ya Mṟinga o Moo

³⁷ Na mfiri o furumia, mfiri ulya ung'anyi o mṟumoe, Yesu kagoṟoka, kakuilenga na ṟui lying'anyi, echigamba, “Mndu kawoṙo nyi nyoṙa, nache na koko nawone kyindo kyenyo.

³⁸ Ulya angyiiṙikyia inyi, chandu kyikyiṟeie ipfo shiṟeionyi shiele, mfo ya mṟinga uwoṙe moo yechiwuka mrimenyi kokye.”

³⁹ Kyiyeri Yesu aweiṙeṙa naweionguo mbonyi tsa Mumuyo o Ruwa, walya wamwiṙikyie wechimwambilyia kyiyeri kya numa; cha kyipfa Mumuyo o Ruwa alekoamcha-pfo, cha kyipfa Yesu alekoamwirio wuye na ienengo kyiṟumi-pfo.

Orio Mndu Kaṙeṙa Kyakye

⁴⁰ Kyasia wandu wengyi kyiiṙi kya walya wawesanzie halya kyiyeri waleicho mbonyi-tso, walegamba, “Loi, ichu nyi oe moonguo shisuku ulya.”

⁴¹ Wengyi walegamba, “Ichu nyi oe Kristo.” Wengyi wakagamba, “Ngyesa Kristo nechiwuka Galyilaya?

⁴² Kyikyiṟeie kyiṟeionyi kyiele kye Kristo nechiwuka kyisharinyi kya Dawidi, na iwuka Betilehemu, mṟi ulya Dawidi awekyekaa?”

⁴³ Kyasia wandu waata kyiiṙi kya walya wawesanzie halya wakaṙeṙa Yesu necha, wengyi wakamṙeṙa uwicho.

⁴⁴ Waata wakakunda immbara kyaindi kuwoṙe mndu alegoṟuo mawoko gakye kundu nammbaṙe-pfo.

Wasongoru wa Wayuda Walawaṙe Iiṙikyia

⁴⁵ Kyasia waṟundi walya wakayenda ko wang'anyi wa makohanyi na Mafarisayo. Nawo wakawawesa, “Ny'kyilyi mulamwende?”

⁴⁶ Waṟundi walya wakagaluo, wakagamba, “Kuwoṙe mndu oose alemgamba shindo-sho ichu agamba-pfo.”

⁴⁷ Kyasia Mafarisayo wakawagaluo, wakagamba, “Namlemba maa nyoe?

⁴⁸ Nyi wui kyiiṙi kya wasongoru ang'u Mafarisayo amwiṙikyie?”

⁴⁹ Kyaindi wandu-wa wasanzie iha walaichi uwawaso wawasese.

⁵⁰ Nikodemo (ulya alekoayenda ko Yesu kyiyeri kya ipfo numa, kyipfa nyi umwi o wasongoru-wo) kawawia,

⁵¹ “Iṙuana na uwawaso loiṙima ianduya mndu lulaaṙanyia ny'kyikyi awoṙe kyegamba-pfo; hamwi na ipfula imanya ny'kyikyi akundi iwuta.”

⁵² Wakagaluo wakammbia, “Ngyesa na iyoe nuwukyie Galyilaya? Pfula shiṟeionyi shiele umanye kye Galyilaya kochiwuka moonguo shisuku-pfo.”