Yohane 6 - Kivunjo New Testament 1999

Iigutsa Wandu Shiku Shitaanu

¹ Numa ya isho Yesu naleyenda molyolya o Nduwa ya Galyilaya iwekyelago Tiberia.

² Na kyisanzionyi kying'anyi kya wandu kyikamwosha, cha kyipfa walewona shiṟiyisho alewutia wandu waluoe.

³ Na Yesu kaṙooya fumvunyi, kaṙamia pfo hamwi na wanalosho wakye.

⁴ Na Pasaka, mfiri ung'anyi o Wayuda, uwekyeri kufuhi.

⁵ Kyasia kyiyeri Yesu alewona ṟiima lying'anyi lya wandu lyechicha na kokye nalewia Filyipo, “Luguṟe kwi mkate kundu wandu-wa waiṙime ilya?”

⁶ Na naleṙeṙa kuṙo kundu namyeshe; cha kyipfa naweichi kyindo echiwuta.

⁷ Filyipo kamgaluo, kagamba, “Mkate ya woguru wo dinari magana gawi gewashika maa kokooya orio umwi alya kyitung'tu-pfo.”

⁸ Anderea, umwi o wanalosho wakye, mono-wama o Simion Petiro, kammbia,

⁹ “Iha hawoṙe mana awoṙe mkate itanu na makunga gawi, kyaindi ishi ny'kyikyi ko wandu wafoi cha iwa?”

¹⁰ Yesu kagamba, “Wienyi wandu waṙamie.” Na handu halya hawewoṙe maṟa gafoi. Kyasia wasoṟo wakaṙamia, cha shiku shitaanu woose piu.

¹¹ Yesu kaira mkate iya, kaana, kagawia walya waweṙamie; kagawa na makunga galya taa chandu orio mndu alekunda.

¹² Nawo kyiyeri waleiguṙa, nalewia wanalosho wakye, “Sanienyi shifunjoe-sho shatsugaa, kyilaṙekye maa kyimwi.”

¹³ Kyasia wakasania shifunjoe sha mkate iya itanu shiletsugaa wandu wamlye, wakaichuṟa mkunja ikumi na iwi.

¹⁴ Kyasia kyiyeri wandu walya walewona kyiṟiyisho alewuta, walegamba, “Loi ichu nyi moonguo shisuku ulya aicha wuyanenyi.”

¹⁵ Naaho-ng'u, aichi kye wawekundi ichemmbaṙa kundu wamgaluo mangyi, nalelekana nawo, kayenda-se fumvunyi alaṙuṙanyi na mndu.

Yesu Kachumia Wuye ya Mṟinga

¹⁶ Kyiyeri kya kyukonyi wanalosho wakye wakasoka na kulya nduwenyi,

¹⁷ wakaṙooya ngalawenyi, wakawooka iambaṙa iyenda Kaperinaumu. Napfo kuwemmbaṙa meema, kyaindi Yesu alekoamcha-pfo.

¹⁸ Na nduwa ikawooka ifoika kyipfa mkuma ung'anyi uweikuma.

¹⁹ Wanalosho walekowamuyenda cha mailyi tsiṟaaṟu tsiina kyiyeri walewona Yesu echumia wuye ya mṟinga na itikyira kufuhi na ngalawa iya; wakaowuo.

²⁰ Na oe kawawia, “Nyi inyi, mulaowuoe.”

²¹ Kyasia wakamwitsa na kulya ngalawenyi; na cha ilyi ngalawa iya ikashika uruka lulya waweiyenda.

Wandu Wakapfula Yesu

²² Mfiri ulya uleosha kyisanzionyi kya wandu wawegoṟokyi molyolya o nduwa walewona kye kuwewoṙe ngalawa ingyi kulya sile imwi tupu-pfo. Ngoseṟa walewona kye Yesu aleiṙa na kulya ngalawenyi hamwi na wanalosho wakye-pfo, indi wanalosho waleyenda wo wawenyi.

²³ (Kyaindi kukocha ngalawa tsingyi iwuka Tiberia mṟasa kufuhi na handu halya walekowalyiia mkate, kyiyeri Mndumii Yesu aleana).

²⁴ Kyasia wandu wa kyisanzionyi, kyiyeri walewona kye Yesu akyeri pfo maa wanalosho wakye-pfo, waleiṙa na ngalawenyi wo wawenyi, wakayenda Kaperinaumu wechipfula Yesu.

Yesu nyi Mkate o Moo

²⁵ Na kyiyeri walemmbona molyolya o nduwa, walemmbia, “Rabi, iyoe nocha indi na iha?”

²⁶ Yesu kawagaluo, kagamba, “Ny'kyaloi ngammbia, nyoe muingyipfula, chi kyipfa mulewona shiṟiyisho-pfo, indi kyipfa mulelya mkate iya mukoiguṙa.

²⁷ Mulapfuṟukane ipfula kyelya kyekyenyamaṟika, indi pfulenyi kyelya kyilekyesia kyekyeende moo o mlungana; kyelya kyilya Mana o Adamu echimuenenga cha kyipfa icho nyi oe aṟingyishio nyi Ruwa kye nyi o sungusinyi.”

²⁸ Kyasia wakammbia, “Luwikye kuṙa kundu luiṙime iṟunda maṟunda ga Ruwa?”

²⁹ Yesu kagaluo, kawawia, “Ilyi nyilyo iṟunda lya Ruwa, mumwiṙikyie ulya aleṙumo nyi oe.”

³⁰ Wakammbia, “Kyasia nuiwuta kyiṟingyishio kyiha, kundu luwone lukuiṙikyie? Nuiṟunda kyi?

³¹ Waku waṙu walelya Manna kulya nukyenyi ngyiumu suwaa ilawoṙe maa mṟinga, chandu kyikyiṟeie, ‘Nalewaenenga kyelya kya ruwewu kundu walye.’ ”

³² Yesu kawawia, “Ny'kyaloi ngammbia, ‘Chi Mose alewaenenga kyelya kyilya kya ruwewu-pfo, indi Awu oko naimuenenga nyoe kyelya kya loi kyiwukyie ruwewu.

³³ Cha kyipfa kyelya kya Ruwa nyi kyilya kyisokyie iwuka ruwewu na ienenga wuyana moo o mlungana.’ ”

³⁴ Kyasia wakammbia, “Mndumii, mfiri yoose uluenengye kyelya-kyi.”

³⁵ Yesu kawawia, “Inyi nyi kyelya kya moo; ulya acha na koko echiicho njaa maa ale-pfo; na ulya angyiiṙikyie echiwoṙo nyi nyoṙa-pfo.

³⁶ Kyaindi ngyilemmbia kye momngyiwona indi muiṙikyia-pfo.

³⁷ Walya Awu angyienenga wechicha na koko; maa kuwoṙe mndu echicha na koko ngyimmbiyitse nja maa ale-pfo.

³⁸ Cha kyipfa inyi ngyilesoka iwuka ruwewu kundu ngyiwute kyilya ngyikundi-pfo, indi kyilya ulya alengyiṙuma akundi.

³⁹ Na kyilya ulya alengyiṙuma akundi nyi ikyi, kye kyiiṙi kya woose angyienengyie ngyilaṙetse maa umwi, indi ngyimṟutse mfiri ulya o furumia.

⁴⁰ Cha kyipfa kyilya Awu oko akundi nyi ikyi, kye orio mndu mokusuria Mana na imwiṙikyia, nawaṙe moo o mlungana; na inyi ngyechimṟutsa mfiri ulya o furumia.”

⁴¹ Kyasia Wayuda wakamnunuwia, cha kyipfa nalegamba, “Inyi nyi kyelya kyilesoka iwuka ruwewu.”

⁴² Wakagamba, “Ichu chi Yesu, mana o Yosefu, ulya luichi awuye na wamae? Wulalu naigamba kuṙa, ‘Ngyilesoka iwuka ruwewu?’”

⁴³ Kyasia Yesu kagaluo, kawawia, “Mulanunuwiane nyoe wenyi ko wenyi.

⁴⁴ Kuwoṙe mndu eiṙima icha na koko sile Ruwa ulya alengyiṙuma amsongoya-pfo; na inyi ngyechimṟutsa mfiri o furumia.

⁴⁵ Kyikyiṟeie maloshonyi ga weonguo shisuku, ‘Na woose wekowamlosho nyi Ruwa.’ Kyasia orio mndu aicho na ikulosha ko Awu nekyecha na koko.

⁴⁶ Chi kye mndu nawona Awu sile ulya awukyie ko Ruwa-pfo. Icho nyi oe alewona Awu.

⁴⁷ Ny'kyaloi ngammbia, ‘Ulya aiṙikyie nawoṙe moo o mlungana.’

⁴⁸ Inyi nyi kyelya kya moo.

⁴⁹ Waku wanyu walelya Manna kulya nukyenyi ngyiumu suwaa ilawoṙe maa mṟinga, wakapfa.

⁵⁰ Indi ikyi nyi kyelya kyisokyie iwuka ruwewu, kye mndu kakyilya alapfe.

⁵¹ Ikyi nyi kyelya kyiwoṙe moo kyilesoka iwuka ruwewu; mndu kalya kyelya-kyo, nechiwaṙa moo mlungana. Na kyelya ngyechienengyia inyi nyi mmbiu oko, kundu wuyana wuwaṙe moo.”

⁵² Kyasia Wayuda kui nyashi walegaluana wo wenyi ko wenyi wechigamba, “Mndu-chu neiṙima kuṙa iluenenga mmbiu okye luulye?”

⁵³ Naaho Yesu kawawia, “Ny'kyaloi ngammbia, mulandelye mmbiu o Mana o Adamu na inyo samu yakye, muwoṙe moo mrimenyi konyu-pfo.

⁵⁴ Mndu alya mmbiu oko na inyo samu yako nawoṙe moo o mlungana; na inyi ngyechimṟutsa mfiri o furumia.

⁵⁵ Cha kyipfa mmbiu oko nyi kyelya kya loi, na samu yako nyi kyindo kyenyo kya loi.

⁵⁶ Mndu alya mmbiu oko na inyo samu yako nekyekaa kyiiṙi kyako na inyi ngyekyekaa kyiiṙi kyakye.

⁵⁷ Chandu Awu ai na moo alengyiṙuma inyi, na inyi ngyiwoṙe moo kyipfa kyakye, na wuṙo taa ulya alya mmbiu oko echiwaṙa moo kyipfa kyako.

⁵⁸ Ikyi nyikyo kyelya kyisokyie iwuka ruwewu; chi chandu waku walelya wakapfa-pfo; indi mndu alya kyelya-kyo nechiwaṙa moo mlungana.”

⁵⁹ Mbonyi-tsi naletsionguo akyeri sinagoginyi, kyiyeri aweilosha, kulya Kaperinaumu.

Mbonyi tsa Moo o Mlungana

⁶⁰ Kyasia kyiyeri wandu wafoi kyiiṙi kya wanalosho wakye waleicho, walegamba, “Kyindo-kyi kyikyiumu; nyi wui eiṙima ikyiiṙikyia?”

⁶¹ Na Yesu aichi mrimenyi kokye kye wanalosho wakye walenunuwa kyipfa kya kyindo-kyo, kawawia, “Ngyesa kyindo-kyi kyimutewe iilacha iiṙikyia lyanyu?

⁶² Kyechiwa-se kuṙa kyiyeri mochiwona Mana o Adamu echiṙo na ruwewu kulya-ndu awekyeri?

⁶³ Mumuyo o Ruwa nyi oe ekyeenenga wandu moo, pfinya ya mndu iwoṙe kyiiṙa kyoose-pfo. Mbonyi-tsi ngamuongoya nyi Mumuyo, ngoseṟa nyi moo.

⁶⁴ Kyaindi kuwoṙe wengyi kyiiṙi kyanyu walawoṙe iiṙikyia.” Cha kyipfa Yesu nalemanya wookyia mawookyionyi nyi wakyi walawoṙe iiṙikyia, na nyi wui echimṟiinga.

⁶⁵ Kagamba, “Kyipfa kya ikyo ngammbia kye kuwoṙe mndu eiṙima icha na koko sile Awu amwenenga wuiṙimi-pfo.”

⁶⁶ Kyipfa kya isho wandu wafoi wanaloshonyi wakye wakawuya na numa, walaoshane na oe-se.

⁶⁷ Kyasia Yesu kawia walya ikumi na wawi, “Ngyesa na nyoe mukundi ilekana na inyi?”

⁶⁸ Simion Petiro kagaluo, kagamba, “Mndumii! Luyende ko wui? Iyoe nuwoṙe maṙeṙo ga moo o mlungana.

⁶⁹ Na soe lommbaṙa iiṙikyia; lyingyi-se lomanya kye iyoe nyi oe Mweele o Ruwa.”

⁷⁰ Yesu kawagaluo, kagamba, “Ngyesa ngyilemusambuṟa nyoe ikumi na wawi kyaindi umwi onyu nyi Satana?”

⁷¹ Naleṙeṙa mbonyi tsa Yuda, mana o Simion Isikariote; kyipfa icho nyi oe echimṟiinga; na oe nyi umwi o walya ikumi na wawi.