Yohane 5 - Kivunjo New Testament 1999

Ikyiṟo lya Mndu Awekyeri Iruwenyi lya Mṟinga

¹ Numa ya isho, Yesu kayenda Yerusalemu mṟumoenyi o Wayuda.

² Na ipfo Yerusalemu kufuhi na moongo o moondo hawewoṙe iruwa lya mṟinga, lyekyelago Betisata ko mṙeṙie o Kyiebrania, nalyo lyiwewoṙe mbuo tsitaanu.

³ Ipfo mbuonyi kuwewoṙe wandu wafoi mnu waluoe wawelee pfo, shipfupfuṟe, shiwete, na wapfiie ngapfu, [wechiweṙa mṟinga uchemkye.

⁴ Cha kyipfa kuwewoṙe kyiyeri malaika ekyesoka awuka ruwewu, kaiṙa na kulya iruwenyi lya mṟinga kapaaya na ifoga mṟinga ulya. Kyasia ulya echiwa o kuwooka iiṙa napfo numa ya mṟinga-cho ifoika nawekyekyia ndoṟe ilekoyammbaṙa.]

⁵ Na iho hawewoṙe mndu aweluoe kyiyeri kya maka makumi gaṟaaṟu na nyanya.

⁶ Kyiyeri Yesu alewona mndu-chu alee, na Yesu aichi kye nawekyeri kuṙo mfiri ifoi, nalemmbia, “Nukundi ichia?”

⁷ Mndu ulya aweluoe kagaluo, kagamba, “Mndumii, inyi ngyiwoṙe mndu mongyiwikyia ipfo iruwenyi lya mṟinga kyiyeri malaika ekyepaaya na ifoga mṟinga-pfo. Kyiyeri inyi ngacha, mndu ungyi nekyesonguo isokyia pfo.”

⁸ Yesu kammbia, “Goṟoka, ukuṙikye ikondoṟo lyapfo, uyende.”

⁹ Cha ilyi mndu ulya kawaṙa pfinya, kakuṙika ikondoṟo lyakye, kayenda. Na mfiri-cho nyi-we mfiri o onyonya.

¹⁰ Kyipfa kya ikyo Wayuda wakawia ulya alekyiṟo, “Inu nyi mfiri o onyonya, maa chi sungusinyi kopfo ikuṙika ikondoṟo-pfo.”

¹¹ Kawagaluo kagamba, “Ulya angyikyiṟa nyi oe angyiwia, ‘Kuṙikye ikondoṟo lyapfo, uyende.’ ”

¹² Kyasia wakammbesa, “Ulya akuwia ‘Kuṙikye, uyende,’ nyi wui?”

¹³ Kyaindi ulya alekyiṟo alemmanya nyi wui-pfo; kyipfa Yesu nalekoamlekana nawo, cha kyipfa handu halya hawewoṙe wandu wafoi.

¹⁴ Numa ya isho Yesu kamkooya hekalunyi, kammbia, “Ambuya, ommbaṙa pfinya; ulawute-se wunyamaṟi, ulacheolokyio nyi kyindo kyiwicho ngoseṟa.”

¹⁵ Mndu ulya kayenda, kaongoya Wayuda kye nyi Yesu amkyiṟa.

¹⁶ Cha kyipfa kya ikyo Wayuda wakalyisa Yesu wukyiwa, kyipfa nalewuta isho mfiri o onyonya.

¹⁷ Kawagaluo, kawawia, “Awu oko naiṟunda mṟasa wulalu, na inyi ngyiṟunda.”

¹⁸ Kyasia kyipfa kya ikyo Wayuda wakaengyeṟa ilanga immbaaga, chi kyipfa alefunja iwawaso lya mfiri o onyonya tupu-pfo, indi hamwi na isho nalelaga Ruwa Awu okye, echikuloṟa kye nalyingananyi na Ruwa.

Wuchilyi wo Mono-Ruwa

¹⁹ Kyasia Yesu kagaluo kawawia, “Ny'kyaloi ngammbia, Mana eiṙima iwuta kyindo amonyi sile kyilya awonyi Awu ewuta-pfo; cha kyipfa shoose ekyewuta oe, nyisho Mana ekyewuta.

²⁰ Cha kyipfa Awu nakundi Mana na oe nekyemloṟa shoose ekyewuta; maa maṟunda gang'anyi kuta isho ngoseṟa nechimloṟa, kundu nyoe muiṙime iṟiyio.

²¹ Kyipfa chandu Awu ekyeṟutsa wapfu na iwaenenga moo, na wuṙo Mana echienenga moo walya akundi iwawutia kuṙo.

²² Lyingyi-se Awu ekyeanduya mndu oose-pfo, indi naenengyie Mana ianduya lyoose;

²³ kundu wandu woose waindie Mana chandu wekyeindia Awu. Mndu alekyeindia Mana ekyeindia Awu ulya alemṙuma-pfo.

²⁴ Ny'kyaloi ngammbia, ulya aicho ṙeṙo lyako na iiṙikyia ulya alengyiṙuma nawoṙe moo o mlungana; maa echianduyo-pfo, indi ammbuka upfunyi na iira na moonyi o mlungana.

²⁵ Ny'kyaloi ngammbia, kyiyeri kyiicha, nakyo kyamcha, wapfu wechiicho ṟui lya Mono-Ruwa, na walya wechilyiaṙanyia wechiwaṙa moo.

²⁶ Kyipfa chandu Awu awoṙe moo o mlungana, na wuṙo aleenenga mana wuiṙimi wo waṙa moo o mlungana.

²⁷ Na oe kamwenenga wuchilyi wo ianduya kyipfa nyi Mono-Adamu.

²⁸ Mulaṟiyio kyipfa kya maṙeṙo-ga; cha kyipfa kyiyeri kyiicha, kyiyeri wandu woose wakyeri shilomenyi wechiicho ṟui lyakye.

²⁹ Nawo wechiwuka shilomenyi; walya walewuta shindo shicha wawone moo o mlungana na walya walewuta shiwicho waanduyo.”

Yesu Kaṟingyishia

³⁰ “Inyi ngyeiṙima iwuta kyindo ngyimonyi-pfo. Chandu ngyekyeicho nyi wuṙo ngyekyeanduya; na ianduya lyako nyi lya sungusinyi, cha kyipfa ngyekyewuta kyilya ngyikundi inyi-pfo, indi kyilya ulya alengyiṙuma akundi.

³¹ Inyi ngakuṟingyishia ngyimonyi wuṟingyishi woko chi loi-pfo.

³² Kuwoṙe ungyi aingyiṟingyishia; na inyi ngyiichi kye kyilya aingyiṟingyishia nyi kya loi.

³³ Nyoe muleṙuma wandu ko Yohane, na oe kaṟingyishia wuloi.

³⁴ Kyaindi inyi ngyiambilyia wuṟingyishi ko wandu-pfo; indi ngyigamba ishi kundu nyoe muiṙime ikyia.

³⁵ Yohane nawekyeri cha taa iwuta ngyeela, na nyoe mulechihiyo kyipfa kya kyilya alegamba.

³⁶ Kyaindi wuṟingyishi ngyiwoṙe inyi wung'anyi kuta wulya wo Yohane; cha kyipfa maṟunda galya Awu alengyienenga ngyigaṟunde gangyiṟingyishia kye Awu nalengyiṙuma.

³⁷ Na Awu ulya alengyiṙuma nangyiṟingyishia. Ṟui lyakye mulandelyiicho kyiyeri kyoose maa fana yakye muleiwona-pfo.

³⁸ Maa ulogo lokye lukyeri mrimenyi konyu-pfo, cha kyipfa nyoe muiṙikyie ulya oe alemṙuma-pfo.

³⁹ Mokyekulosha mbonyi tsa shiṟeio shiele, cha kyipfa mokyekusaṟa kye kyiiṙi kyasho mochiwona moo o mlungana; na shiṟeio-sho shagamba mbonyi tsako.

⁴⁰ Maa mukundi icha na koko muwone moo o mlungana-pfo.

⁴¹ Inyi ngyipfula iṟumisho nyi wandu-pfo.

⁴² Kyaindi ngamanya kye nyoe muwoṙe ikunda lya Ruwa mrimenyi konyu-pfo.

⁴³ Inyi ngyilecha kui rina lya Awu oko kyaindi nyoe muingyiambilyia-pfo; ungyi kacha kui rina lyakye amonyi, icho mochimwambilyia.

⁴⁴ Moiṙima kuṙa iiṙikyia nyoe muiṟumishana nyoe wenyi ko wenyi, na kyiṟumi kyilya kyiwukyie ko Ruwa alawoṙe amng'anyie muikyipfula-pfo?

⁴⁵ Mulakusaṟe kye inyi ngyechimshitakyi mbele ya Awu; kuwoṙe echimshitakyi, nyi oe Mose, ulya muikusaṟa nechimtarama.

⁴⁶ Cha kyipfa kokooya muleiṙikyia Mose, muwechingyiiṙikyia inyi; cha kyipfa Mose naleṟeia mbonyi tsako.

⁴⁷ Kyaindi mulandeiṙikyie shiṟeio shakye, mochiiṙikyia kuṙa ulogo loko?”