Yohane 3 - Kivunjo New Testament 1999

Yesu na Nikodemo

¹ Kuwewoṙe mndu umwi kyiiṙi kya Mafarisayo ekyelago Nikodemo, awei msongoru o Wayuda.

² Mndu-cho nalecha na ko Yesu kyio, kammbia, “Rabi, luichi kye iyoe nyi mlosha uwukyie ko Ruwa; cha kyipfa kuwoṙe mndu eiṙima iwuta shiṟiyisho-shi uiwuta iyoe-pfo, sile kokooya Ruwa nakyeri na mndu-cho.”

³ Yesu kagaluo, kammbia, “Ny'kyaloi, ngakuwia, mndu alandefeo lya kawi echiiṙima iwona Wumangyi wo Ruwa-pfo.”

⁴ Nikodemo kammbia, “Mndu neiṙima kuṙa ifeo amku? Neiṙima iwuya na wosinyi ko wamae nafeo-se lya kawi?”

⁵ Yesu kamgaluo, “Ny'kyaloi, ngakuwia, mndu alandefeo kui mṟinga na Mumuyo echiiṙima iiṙa na Wumangyinyi wo Ruwa-pfo.

⁶ Kyikyifee nyi mmbiu nyi mmbiu; na kyikyifee kui Mumuyo nyi mumuyo.

⁷ Ulaṟiyio kyipfa ngakuwia, kyikuwaṟi ifeo lya kawi.

⁸ Mkuma okyekuma handu ukundi, na ṟui lya mkuma-cho nokyelyiicho, kyaindi uichi kundu owuka ang'u uiyenda-pfo. Na wuṙo mbonyi tsa orio mndu afeo kui Mumuyo.”

⁹ Nikodemo kagaluo, kammbia, “Mbonyi-tsi tseiṙimika kuṙa?”

¹⁰ Yesu kagaluo, kammbia, “Iyoe nyi mlosha o Isiraelyi na mbonyi-tsi utsiichi-pfo?

¹¹ Ny'kyaloi ngakuwia kye, kyilya lukyiichi lukyionguo, na kyilya lulekyiwona lukyiṟingyishia. Kyaindi maa wuṟingyishi woṙu muwuiṙikyia-pfo.

¹² Kokooya ngamuongoya mbonyi tsa wuyanenyi mulaiṙikyie, moiṙikyia kuṙa ngamuongoya mbonyi tsa ruwewu?

¹³ Maa kuwoṙe mndu alemṙo na ruwewu sile Mana o Adamu ulya alesoka iwuka ruwewu-pfo.”

¹⁴ “Na chandu Mose aleira njoka iya kulya nukyenyi ngyiumu suwaa ilawoṙe maa mṟinga, na wuṙo Mana o Adamu awaṟi iiro;

¹⁵ kundu orio mndu aiṙikyie nawaṙe moo o mlungana kui oe.

¹⁶ Cha kyipfa nyi wuṙo Ruwa alekunda wuyana, katana awuta Mana okye kyimuumwi, kundu orio mndu amwiṙikyie alaṙekye, indi nawaṙe moo o mlungana.

¹⁷ Cha kyipfa Ruwa aleṙuma Mana wuyanenyi kundu naanduye wuyana-pfo, indi wuyana wukyiṟo kui oe.

¹⁸ Amwiṙikyie oe echianduyo-pfo; alaiṙikyie amwanduyo; cha kyipfa aiṙikyia rina lya Mana kyimuumwi o Ruwa-pfo.

¹⁹ Na ilyi nyilyo ianduyo; kye ngyeela ilecha na wuyanenyi, na wandu wakakunda meema kuta ngyeela; kyipfa mawuto gawo gawemawicho.

²⁰ Kyipfa orio mndu ekyewuta shindo shiwicho nasuuye ngyeela, maa ekyecha na ngyeelenyi-pfo, mawuto gakye galachemanyika naṟoṟomo.

²¹ Indi ulya ekyewuta kyindo kya loi nekyecha na ngyeelenyi, kundu mawuto gakye gawono na pata kye gawuto kui Ruwa.”

Yesu na Yohane Mpatisi

²² Numa ya isho Yesu na wanalosho wakye waleyenda mṟasa uruka lo Uyuda; katsinda pfo hamwi nawo, echipatisa.

²³ Yohane na oe naweipatisa ipfo Ainon, kufuhi na Salyimu, kyipfa ipfo kuwewoṙe mṟinga ushikyie; na wandu wakayenda kokye, wakapatiso.

²⁴ Cha kyipfa Yohane alekoawiko kyipfungonyi-pfo.

²⁵ Kyasia wanalosho wa Yohane wakagaluana na Myuda umwi kya mbonyi tsa isanjo mrima.

²⁶ Wakayenda ko Yohane, wakammbia, “Rabi, ulya awekyeri hamwi na iyoe molyolya o Yoridan, ulya uleṟingyishia mbonyi tsakye, naipatisa, na wandu woose waiyenda kokye.”

²⁷ Yohane kagaluo, kagamba, “Kuwoṙe mndu echiiṙima imanya kyindo kyoose sile Ruwa amwenenga wuiṙimi-pfo.

²⁸ Nyoe mungyiṟingyishia kye ngyilegamba ‘Inyi chi oe Kristo-pfo, indi ngileṙiko oe alacha.’

²⁹ Ulya awoṙe mono-kyika ailayiko nyi monyi wolyi; kyaindi mbuya ya monyi wolyi, ulya ekyegoṟoka na imwaṙanyia, nekyechihiyo kyipfa kya ṟui lya monyi wolyi. Kyasia sia yako yaafukyia.

³⁰ Kyiwaṟi oe iwaṙa kyiṟumi kying'anyi na kyako ititia.”

Ulya Awuka Ruwewu

³¹ “Ulya acha awuka wuye, icho nakyeri wuye ya shoose. Ulya akyeri o wuyana, kanyi kokye nyi wuyanenyi, na oe nekyeṙeṙa shindo sha wuyanenyi. Ulya aicha awuka ruwewu nakyeri wuye ya shoose.

³² Shilya aleshiwona na ishiicho nyisho aiṟingyishia, kyaindi maa kuwoṙe mndu aiiṙikyia wuṟingyishi wokye-pfo.

³³ Ulya aleiṙikyia wuṟingyishi wokye naloṟa na pata kye Ruwa nyi loi.

³⁴ Cha kyipfa ulya amṙume nyi Ruwa nekyeonguo mbonyi tsa Ruwa; cha kyipfa ekyeenengyia Mumuyo kui iehia-pfo.

³⁵ Awu nakundi Mana, na oe nawikyie shoose mawokonyi gakye.

³⁶ Aiṙikyie Mana nawoṙe moo o mlungana; alaiṙikyie Mana echiwona moo-pfo, indi nyashi ya Ruwa yechimwolokyia.”