Yohane 20 - Kivunjo New Testament 1999

Kyilome Kyilawoṙe Kyindo

¹ Na mfiri o kuwooka o juma Maria Makyidalena naleyenda kulya kyilomenyi, ngamenyi utuko, kyiyeri kulandekye necha; kawona igoe lyilya lyilyiwute halya kyilomenyi.

² Kyasia kayenda eṙicha, kashika ko Simion Petiro na ko manalosho ulya ungyi Yesu awemkundi, kawawia, “Wawuta Mndumii Yesu kulya kyilomenyi; maa luichi kundu wammbikyia-pfo.”

³ Petiro kafuma na manalosho ulya ungyi, wakayenda kulya kyilomenyi.

⁴ Wakayenda weṙicha woose wewawi; na manalosho ulya ungyi kaṙicha kuta Petiro, kawa o kuwooka ishika halya kyilomenyi.

⁵ Kaarama na iimemia kulya kyilomenyi, kawona pfo shiṙami shilya sha sanda; kyaindi aleiṙa napfo-pfo.

⁶ Kyasia Simion Petiro kacha numa yakye, kaiṙa na kulya kyilomenyi; kaambuya shiṙami shilya shiwekyeri pfo;

⁷ na kyitambaa kyilya kyiwekyeri mṙoenyi kokye kyiwekyeri handu hamwi na shiṙami shilya-pfo, indi kyiwekyiumbie-umbie haleshi.

⁸ Naaho manalosho ulya ungyi awekyeri o kuwooka ishika halya kyilomenyi na oe kawona na iiṙikyia.

⁹ Cha kyipfa walekowammanya kyiṟeio kyiwegambie kye Yesu nawaṟi iṟuka-pfo.

¹⁰ Kyasia wanalosho wakayenda-se kanyi kowo.

Yesu Kawonekyia Maria Makyidalena

¹¹ Kyaindi Maria nawegoṟokyi kufuhi na kyilome kyilya, ura lo nja, echilyia. Kyasia echilyia kuṙo, nalearama na iimemia kulya kyilomenyi.

¹² Kawona malaika wawi, waṟee nguwo ngiilyi, waṙamie, umwi ura lo mṙoenyi na umwi ura lo maṙende lo halya-ndu mmbiu o Yesu uwemlaṟe.

¹³ Nawo wakammbia, “Nuilyilyia kyi?” Kawawia, “Kyipfa wawuta Mndumii oko iha; maa ngyiichi kundu wammbikyia-pfo.”

¹⁴ Na amgambe kuṙo, kainduka, kawona Yesu agoṟokyi, indi alamanye kye nyi Yesu.

¹⁵ Yesu kammbia, “Nulyilyia kyi? Nupfula wui?” Na Maria, akusaṟie kye nyi moambuya bustanyi, kammbia, “Mndumii, kokooya nyi iyoe ommbuta kunu kyilomenyi, ngyiwia nyi kwi ommbikyia, na inyi ngyechimmbuta pfo.”

¹⁶ Yesu kammbia, “Maria.” Oe kainduka, kammbia kui mṙeṙie o Kyiebrania “Raboni! Kyimwi na igamba, ‘Mlosha oko.’ ”

¹⁷ Yesu kammbia, “Ulangyipaaye, cha kyipfa ngyilandeṙo na ruwewu ko Awu-pfo. Kyaindi yenda ko wana wa wama wako uwawie ngyiiṙo na ruwewu ko Awu oko na oe nyi Awu onyu, ko Ruwa oko na oe nyi Ruwa onyu.”

¹⁸ Maria Makyidalena kayenda, kaongoya wanalosho mbonyi kagamba, “Ngawona Mndumii Yesu, na nyi oe angyiwia ishi ngyimuongoya.”

Yesu Kawonekyia Wanalosho Wakye

¹⁹ Kyukonyi, mfiri ulya o kuwooka o juma; na halya-ndu wanalosho wawekyeri moongo iwengyishingye kyipfa kya iowuo Wayuda, Yesu kacha kagoṟoka makyiṙi-gawi gawo, kawawia, “Ufoṟo lukae konyu.”

²⁰ Na oe amgambe kuṙo, kawaloṟa mawoko gakye na uwari lokye. Kyasia wanalosho walya wakachihiyo kyiyeri walewona Mndumii Yesu.

²¹ Yesu kawawia-se “Ufoṟo lukae konyu. Chandu Awu alengyiṙuma inyi, na inyi ngyimṙuma nyoe.”

²² Na oe amgambe kuṙo, kawaumuya mṟufui, kawawia, “Ambilyienyi Mumuyo Mweele.

²³ Mndu oose mochimhooṟia wunyamaṟi nechihooṟio loi; na ulya mulamhooṟia echihooṟio-pfo.”

Yesu na Tomasi

²⁴ Kyaindi umwi o walya ikumi na wawi Tomasi, awekyelago-se, (Wana wawafee wawi mfiri umwi) awekyeri na woṙoe kyiyeri Yesu alecha-pfo.

²⁵ Kyasia wanalosho walya wengyi wakammbia, “Lowona Mndumii Yesu.” Kawawia, “Inyi ngyilandewone ngoru tsa msemaari mawokonyi kokye, na iwaṙa halya-ndu msemaari ilemtocha, na iwaṙa uwarinyi kokye halya-ndu pfumu lyilemtocha, ngyechiiṙikyia maa ale-pfo.”

²⁶ Kyasia, hamwiṙe mfiri nyanya, wanalosho wakye wawekyeri-se numba, na Tomasi nawekyeri hamwi nawo. Yesu kacha, na moongo iwengyishingye. Kagoṟoka makyiṙi-gawi gawo, kagamba, “Ufoṟo lukae konyu.”

²⁷ Numa ya iho kawia Tomasi, “Goṟuo kuwoko kopfo; ambuya mawoko gako, waṙa uwarinyi koko; molawe mndu alaiṙikyie, indi aiṙikyie.”

²⁸ Tomasi kagaluo, kammbia, “Mndumii oko na Ruwa oko!”

²⁹ Yesu kammbia, “Iyoe, kyipfa ongyiwona, noiṙikyia. Wagusu walya walawonyi kyaindi wakaiṙikyia.”

Kyimaṙuma kyeṟeia Kyitapu-kyi

³⁰ Kyasia kuwoṙe shiṟiyisho shingyi shifoi Yesu aleshiwuta mbele ya wanalosho wakye, shilashiṟeie kunu kyitapunyi.

³¹ Kyaindi ishi shileṟeio, kundu muiṙime iiṙikyia kye Yesu nyi oe Kristo, Mono-Ruwa; na kui iiṙikyia muwone moo o mlungana kui rina lyakye.