Yohane 19 - Kivunjo New Testament 1999

¹ Kyasia Pilato kawia asikari wawute Yesu halya wandemkapa na ngowa.

² Na asikari-wo wakaoka oṟo ya msha wakaṟika Yesu mṙoenyi kokye, wakamṟika na nguwo ya kyimaande-maande.

³ Wakayenda halya-ndu awekyeri, wechigamba, “Lokuiṟikyiṟa, Mangyi o Wayuda!” Wakamkapa ngofi.

⁴ Numa ya iho Pilato kafumia-se nja, kawawia, “Mndu-chu ngyimwende na konyu, muiṙime imanya kye inyi ngyiwonyi ṙeko lyoose kokye-pfo.”

⁵ Naaho-ng'u Yesu kafumia nja, aṟee oṟo iya ya msha, na nguwo iya ya kyimaande-maande. Pilato kawawia, “Lanyoe! Mndu ulya aichu iha!”

⁶ Kyasia wang'anyi walya wa makohanyi na waṟundi wawo kyiyeri walemmbona, walekalagatsa, wechigamba, “Mkapie msalabenyi! Mkapie msalabenyi!” Pilato kawawia, “Mṙuonyi nyoe, mundemkapia msalabenyi; cha kyipfa ngyiwonyi ṙeko kokye-pfo.”

⁷ Wayuda wakamgaluo, wakagamba, “Koṙu soe mndu o mbaṟe-i nawaṟi ipfa, cha kyipfa nalekuloṟa oe nyi Mono-Ruwa.”

⁸ Kyasia kyiyeri Pilato aleicho mbonyi-tso kaengyeṟa iowuo.

⁹ Kaiṙa-se na kulya numbenyi ya wuchilyi, kawia Yesu, “Iyoe nuwukyie kwi?” Kyaindi Yesu alemgaluo kyindo-pfo.

¹⁰ Kyasia Pilato kammbia, “Uiṙeṙa na inyi-pfoe? Uichi ngyiwoṙe wuiṙimi wo ikupfunguo hamwi na wuiṙimi wo ikukapia msalabenyi?”

¹¹ Yesu kamgaluo, kagamba, “Iyoe uwechiwaṙa wuiṙimi woose wo ingyichilyia, kokooya Ruwa alawekuenengyie wuchilyi-wo-pfo. Koikyo icho angyiende na kopfo nawoṙe ṙeko lying'anyi kuta.”

¹² Na wookyia kyiyeri-kyo Pilato kakunda impfunguo; kyaindi Wayuda wakakalagatsa, wechigamba, “Kopfunguo ichu, iyoe chi mbuya ya Kaisari-pfo. Orio mndu aikuloṟa cha ilyi oe nyi mangyi akyeri ura lo Kaisari-pfo.”

¹³ Kyasia kyiyeri Pilato aleicho mbonyi-tso, nalefumiṟia Yesu nja, kaṙamia kyiṙinyi kyakye kyeanduya, handu hawehaale magoe gang'anyi, hekyelago Gabata, ko mṙeṙie o Kyiebrania.

¹⁴ Na nyi-we mfiri o ikuṟeyeṟa ko mṟumoe o Pasaka, kyiyeri kya saa tsiṟandaaṟu tsa kyingoto. Kawawia, “Lanyoe, Wayuda. Aichu Mangyi onyu!”

¹⁵ Kyasia wakakalagatsa, wechigamba, “Mmbute iha! Mmbute iha! Mkapie msalabenyi!” Pilato kawawia, “Ngyesa mangyi onyu ngyimkapie msalabenyi!” Wang'anyi wa makohanyi wakamgaluo, wakammbia, “Soe luwoṙe mangi sile Kaisari-pfo.”

Yesu Kakapio Msalabenyi

¹⁶ Kyasia Pilato kawaṙambika Yesu kundu nakapio msalabenyi; nawo wakamwambilyia.

¹⁷ Yesu kafuma, akuṙikyie msalaba okye, mṟasa handu hawekyelago, “Ipoṟong'u” ang'u kui mṙeṙie o Kyiebrania, Golyigota.

¹⁸ Wakamkapia msalabenyi ipfo Golyigota, hamwi na wandu wengyi wawi, umwi ura-lu na umwi ura-lu, na Yesu makyiṙi-gawi.

¹⁹ Na Pilato kaachikyia kyiṟeio, kakyiwikyia halya msalabenyi, kyigambie: “YESU O NASARETI, MANGYI O WAYUDA.”

²⁰ Kyasia kyiṟeio-kyo kyilewono nyi wandu wafoi kyiiṙi kya Wayuda, kyipfa halya-ndu Yesu alekapio msalabenyi nyi-we kufuhi na mṟi; na kyiṟeio-kyo kyiwekyeri kui mṙeṙie iṟaṟu: Kyiebrania, Kyilatin na Kyikyiṟikyi.

²¹ Kyasia wang'anyi wa makohanyi na Wayuda wakawia Pilato, “Ulaṟeie ‘Mangyi o Wayuda’; ṟeia chandu alegamba ‘Inyi nyi mangyi o Wayuda.’ ”

²² Pilato kagaluo, kagamba, “Ngyeilacha kyilya ngamṟeie-pfo.”

²³ Na asikari walya kyiyeri walekapia Yesu msalabenyi, waleira nguwo tsakye, wakatsigawa kaana, orio asikari ugawi lokye; na kanzu taa. Kyasia kanzu iya iwengyishone-pfo, iwengyilungye-lungye tupu wookyia wuye mṟasa wanda.

²⁴ Kyasia wakawiana, “Lulairanduo, kyaindi luikapie kuṟu kuha, lumanye yechiwa ya wui. Kundu kyiṟeio kyiafukyie, kyilya kyigambie, ‘Walegawa nguwo tsako, na ikunya lyako walelyikapia kuṟu kuha.’ ” Nyi wuṙo asikari walya walewuta.

²⁵ Na halya-ndu msalaba o Yesu uwekyeri hawegoṟokyi mama o Yesu na mono-wama o wamae, Maria, mka o Kyileopa, na Maria Makyidalena.

²⁶ Kyasia kyiyeri Yesu alewona wamae, na manalosho ulya awemkundi agoṟokyi kufuhi, nalewia wamae, “Mama, mmbutie cha nyi mono-pfo.”

²⁷ Numa ya iho kawia manalosho ulya, “Mmbutie cha nyi womoo.” Na wookyia kyiyeri kyilya manalosho ulya kamṙuo kanyi kokye.

²⁸ Isho shoose shammbutikye, na Yesu aichi kye shoose shammbutika kundu kyiṟeio kyiafukyie, nalegamba, “Ngyiwoṙo nyi nyoṙa.”

²⁹ Na halya hawewoṙe pakulyi iwoṙe mpfinyo uwetarang'ia. Kyasia wakawika mpfinyo ulya uwetarang'ia indonyi lyekyeongyia mṟinga wakalyiwikyia kyiṙinyi kyikyeri cha mtemu, wakawikyia Yesu ṙumbunyi kokye.

³⁰ Yesu amwambilyie mpfinyo ulya uwetarang'ia na iunyo, nalegamba, “Kyammba chandu kyiwaṟi iwa.” Kaaramtsa mṙoe okye, kalekyia moo.

Asikari Kakapa Yesu Pfumu Uwarinyi

³¹ Kyasia Wayuda, kyipfa nyi mfiri o ikuṟeyeṟa lya mfiri o onyonya, na kundu mmbiu ilakae msalabenyi mfiri o onyonya, (cha kyipfa mfiri ulya o onyonya uweng'anyi), waleterewa Pilato maṙende ga Yesu na ga walya wawewakapie halya msalabenyi gafunjo-funjo, wawuto halya msalabenyi.

³² Kyasia asikari wakayenda, wakafunja maṙende ga wandu walya wawi wawewakapie msalabenyi hamwi na Yesu.

³³ Kyaindi kyiyeri waleyenda halya-ndu Yesu awekyeri na iwona kye ampfa, walemfunja maṙende-pfo;

³⁴ kyaindi asikari umwi nalemkapa pfumu uwarinyi kokye; na cha ilyi hakawuka samu na mṟinga.

³⁵ (Na ulya alewona kaṟingyishia, na wuṟingyishi wokye nyi wo loi, na oe naichi kye nagamba loi kundu na nyoe muiṙime iiṙikyia).

³⁶ Cha kyipfa isho shilewutika kundu kyiṟeio kyiafukyie, “Kuwoṙe fuo lyakye lyechifunjo-pfo.”

³⁷ Lyingyi-se kyiṟeio kyingyi kyagamba, “Wechiwona ulya walemkapa pfumu.”

Iṟiko lya Yesu

³⁸ Isho shoose shammbutikye Yosefu awukyie Arimataya, na oe nyi manalosho o Yesu, (kyaindi kui kyiṟika, kyipfa kya iowuo Wayuda), naleterewa Pilato momu kundu nawute mmbiu o Yesu halya msalabenyi. Na Pilato kamwenenga momu. Kyasia kayenda, kawuta mbiu ulya halya msalabenyi.

³⁹ Nikodemo na oe kayenda, (ulya alekoayenda ko Yesu mfiri ya numa), aṙuṙe cha shilo makumi gaṟaaṟu sha shindo shekyeshio shindonyi shingyi kundu shilanyamaṟikye.

⁴⁰ Kyasia wakaṙuo mmbiu ulya o Yesu, wakauaṟahia sanda na iushia mafuṙa gekyepfaama necha, chandu Wayuda waweichiwie iwuta kyiyeri-kyo waiṟika mndu.

⁴¹ Na halya-ndu alekapio msalabenyi hawewoṙe bustanyi, na ipfo bustanyinyi kuwewoṙe kyilome kyihya, kyilawendeṟiko mndu.

⁴² Kyipfa Wayuda waweikuṟeyeṟa ko mfiri o onyonya, wakawika Yesu kulya kyilomenyi, kyipfa kyiwekyeri kufuhi.