Yohane 18 - Kivunjo New Testament 1999

Iwoṙo lya Yesu

¹ Kyiyeri amwonguoe isho, Yesu nalefuma hamwi na wanalosho wakye iyenda molyolya o kyimfo kyekyelago Kyediron, handu hawewoṙe bustanyi, kaiṙa na ipfo bustanyinyi hamwi na wanalosho wakye.

² Na Yuda, ulya awekundi imṟiinga, naweichi handu halya; cha kyipfa Yesu kafoi nawekyeyenda pfo hamwi na wanalosho wakye.

³ Kyasia Yuda, aṙuṙanyi na asikari na waṟundi wawewukyie ko wang'anyi wa makohanyi na Mafarisayo, kayenda pfo, waṙuṙe taa na shimii na shisha.

⁴ Kyasia Yesu, aichi shoose shechimmbutikyia, kafuma kulya bustanyinyi, kawawia, “Nyi wui muimpfula?”

⁵ Wo wakamgaluo, wakagamba, “Nyi Yesu o Nasareti.” Yesu kawawia, “Nyi inyi.” Yuda ulya alemṟiinga nawegoṟokyi hamwi nawo.

⁶ Kyasia kyiyeri alewawia, “Nyi inyi,” walewuya na numa, wakaoloka wanda.

⁷ Kawawesa-se, “Muipfula wui?” Wakagamba, “Yesu o Nasareti.”

⁸ Yesu kagaluo, kagamba, “Ngamummbia kye nyi inyi. Kyasia kokooya muingyipfula inyi, lekyienyi iwa wayende.”

⁹ Kundu kyiafukyie kyindo kyilya alekoagamba, “Walya ulengyienenga ngyileṙetsa maa umwi-pfo.”

¹⁰ Kyasia Simion Petiro nawewoṙe ushu, kalusoṟomuo, kamanya nalo mtumo o Mkohanyi ang'anyi kuta woose, kamṙumbuo kuṙwi ko kulyoe. Na mtumo ulya nawekyelago Malyiko.

¹¹ Kyasia Yesu kawia Petiro, “Wiyiṟia ushu-lo ipfo kyiṟandenyi. Ngyesa, nokusaṟa ngyikundi ituurika chandu Awu angyiṟeyeṟie ngyituurikye-pfoe?”

Yesu Mbele ya Anasi

¹² Kyasia asikari walya na msongoru o wayuda walewaṙa Yesu, wakampfunga.

¹³ Wakamṙuo ko Anasi kuwooka, cha kyipfa nawekyeri watoe o Kayafa, ulya awekyeri Mkohanyi ang'anyi kuta woose maka ulya.

¹⁴ Na Kayafa nyi oe alewia Wayuda kye kyiwechia mndu umwi napfe kyipfa kya wandu wengyi.

Petiro Kakana Yesu

¹⁵ Petiro na manalosho ungyi wakayenda ko Yesu. Na manalosho-cho naweichio nyi Mkohanyi ang'anyi kuta woose. Kyipfa kya ikyo oe na Yesu wakaiṙa na handu hesanzia ha numba ya Mkohanyi-cho ang'anyi kuta woose.

¹⁶ Kyaindi Petiro kagoṟoka nja moongonyi. Kyasia manalosho ulya ungyi aweichio nyi Mkohanyi ang'anyi kuta woose kafuma, kaṙeṙa na kyisinga kyekyeringa moongo, kaitsa Petiro na numba.

¹⁷ Kyasia kyisinga kyilya, kyiwewoṙe iṟunda lyeringa moongo, kyikawia Petiro, “Ngyesa iyoe ui umwi o wanalosho wa mndu-chu-pfoe?” Na oe kagamba, “Chi inyi-pfo.”

¹⁸ Na watumo walya wa waṟundi wawegoṟokyi mbai weoṙa moṙo; kyipfa kuwewoṙe mbeho. Petiro na oe nawekyeri hamwi nawo, echioṙa moṙo.

Mkohanyi Ang'anyi Kuta Woose Kasoruo Yesu

¹⁹ Kyasia Mkohanyi ulya ang'anyi kuta woose kawesa Yesu mbonyi tsa wanalosho wakye, na mbonyi tsa malosho gakye.

²⁰ Yesu kamgaluo, kagamba, “Inyi ngaṙeṙa na wandu wa wuyana na pata. Mfiri yoose ngyileloshia sinagoginyi na hekalunyi, handu Wayuda woose wekyesanzia; maa ngyileonguo kyindo kyoose kui kyiṟika-pfo.

²¹ Ny'kyilyi ungyiwesa inyi? Wesa walya waleicho ny'kyikyi ngyilewawia; wo waichi kyindo ngyileonguo.”

²² Kyasia kyiyeri alegamba isho, mṟundi umwi kyiiṙi kya walya wawegoṟokyi kufuhi kakapa Yesu ukofi, echigamba, “Nuigaluo kuṙo Mkohanyi ang'anyi kuta woose?”

²³ Yesu kamgaluo, kagamba, “Kokooya ngaṙeṙa uwicho, uṟingyishie wuwicho woko; indi kokooya ngaṙeṙa necha, ny'kyilyi ongyikapa ukofi?”

²⁴ Kyasia Anasi kamṙuo ko Kayafa ampfungye.

Petiro Kakana-se Yesu

²⁵ Simion Petiro nawekyeri pfo echioṙa moṙo. Kyasia wakammbia, “Ngyesa iyoe ui umwi o wanalosho wakye-pfoe?” Na oe kakana, kagamba, “Chi inyi-pfo.”

²⁶ Mtumo umwi kyiiṙi kya walya wa Mkohanyi ang'anyi kuta woose, na oe nyi o kyishari kya ulya Petiro alemṙumbuo kuṙwi, kagamba, “Ngyilekuwona kulya bustanyinyi hamwi na oe-pfoe?”

²⁷ Kyasia Petiro kakana-se, na cha ilyi ilying'onyi lyikafuga.

Yesu Kaṙoo Mbele Ya Pilato

²⁸ Kyasia wakawuta Yesu ko Kayafa wakamṙuo mṟasa numba ya wuchilyi iwekyelago Praitorio. Napfo kukokya, kyaindi wo waleiṙa na kulya numbenyi-pfo, walachefana kyimṟumoe, wachelemo ilya shelya sha mṟumoe ulya o Pasaka.

²⁹ Kyasia Pilato kafumia nja, kagamba, “Mogamba wuwicho wo mndu-chu ny'kyikyi?”

³⁰ Wakamgaluo, wakammbia, “Kokooya ichu alawewoṙe wuwicho luwechimwende na kopfo-pfo.”

³¹ Kyasia Pilato kawawia, “Mṙuonyi nyoe, mundemwanduya chandu uwawaso lonyu luwawasie!” Wayuda wakammbia, “Soe luwoṙe momu o iwaaga mndu-pfo.”

³² Kundu kyiafukyie kyindo kyilya Yesu alekyigamba, echiloṟa nyi upfu lo mbaṟe iha echipfa.

³³ Kyasia Pilato kaiṙa-se na kulya numbenyi ya wuchilyi, kalaga Yesu, kammbia, “Ngyesa iyoe nyi Mangyi o Wayuda?”

³⁴ Yesu kamgaluo, kagamba, “Iyoe nuigamba kuṙo kui makusaṟo gapfo, ang'u wandu wengyi walekuwia mbonyi tsako?”

³⁵ Pilato kagaluo, kagamba, “Nokusaṟa kye inyi nyi Myuda? Wandu wa uruka lopfo na wang'anyi wa makohanyi nyiwo walekuende na koko. Ny'kyikyi ulewuta?”

³⁶ Yesu kagaluo, kagamba, “Wumangyi woko chi wo wuyana-wu-pfo. Kokooya Wumangyi woko wuwekyeri wo wuyana-wu, waṟundi wako wawechikapana kyipfa kyako, kundu wasongoru wa Wayuda walaiṙime ingyiwaṙa. Kyaindi Wumangyi woko chi wo iha-pfo.”

³⁷ Kyasia Pilato kammbia, “Kokooya nyi wuṙo iyoe nyi Mangyi-ng'ue?” Yesu kagaluo, kagamba, “Nogamba kye inyi nyi Mangyi. Ngyilefeo kunu wuyanenyi kyipfa kya kyindo kyimwi tupu, ionguo mbonyi tsa loi. Orio mndu aichi mbonyi-tso tsa loi nekyeosha shilya ngyekyegamba.”

³⁸ Pilato kammbia, “Mbonyi tsa loi ny'kyikyi?” Pilato amṙeṙe na Yesu kawuya-se na ko Wayuda, kawawia, “Inyi ngyiwonyi ṙeko lyoose ko mndu-chu-pfo.

Yesu Kaanduyo Iwoogo

³⁹ Kyaindi muichiwie inyi ngyimpfunguye mndu umwi kyiyeri kya Pasaka. Kyasia mukundi ngyimpfunguye Mangyi o Wayuda?”

⁴⁰ Wakakalagatsa-se, wakagamba, “Chi ichu-pfo! Lukundi Baraba.” Na Baraba-cho nawei msokyi.