Yohane 17 - Kivunjo New Testament 1999

Yesu Katerewia Wanalosho Wakye

¹ Yesu nalegamba mbonyi-tso, kaambuya ruwewu, kagamba, “Awu, kyiyeri kyamshika. Ng'anyisa Mono-pfo, kundu Mono-pfo nakung'anyise iyoe;

² chandu ulemwenenga momu o ichilyia wandu, kundu woose ulemwenenga nawaenengye moo o mlungana.

³ Na moo o mlungana nyi: ‘Wakumanye iyoe, Ruwa o loi kulawoṙe ungyi; na Yesu Kristo ulemṙuma.’

⁴ Inyi ngyilekung'anyisa wuyanenyi, iṟunda ulengyiwia ngyiṟunde ngyilelyimarisa.

⁵ Na wulalu, Awu, ungying'anyise inyi hamwi na iyoe, kui kyiṟumi kyilya ngyiwewoṙe kyiyeri wuyana wulagumbo.

⁶ Walya ulengyienenga kunu wuyanenyi ngyilewashukuya kyiṟumi kyapfo. Wawekyeri wapfo, kowangyienenga, na malosho gapfo wekyegaosha.

⁷ Wulalu waichi kye shoose ungyienengyie shiwukyie kopfo.

⁸ Cha kyipfa malosho ulengyienenga ngyilewaṙambika; nawo wakagaambilyia, wakamanya loi kye ngyilewuka kopfo, wakaiṙikyia kye nyi iyoe ulengyiṙuma.

⁹ Inyi ngyiwaterewia iwo; ngyiterewia wandu wa wuyana-pfo; indi iwo ulengyienenga, cha kyipfa iwo nyi wako;

¹⁰ na woose wai wako nyi wapfo; na wai wapfo nyi wako, na inyi ngaṟumisho mrimenyi kowo.

¹¹ “Maa inyi ngyikyeri-se wuyanenyi-pfo, kyaindi wo wakyeri wuyanenyi, na inyi ngyiicha na kopfo. Awu mweele, kui rina lyapfo ulengyienenga uwaringye iwa, kundu wawaṙane tapu chandu soe lukyeri.

¹² Kyiyeri ngyiwekyeri hamwi nawo, inyi ngyilewaringa kui rina lyapfo ulengyienenga, ngawaambuya; maa kuwoṙe umwi owo aleṙeka-pfo, sile mana ulya o wuṙetsi, kundu kyiṟeio kyiafukyie.

¹³ Na wulalu ngyiicha na kopfo; na mbonyi-tsi ngyitsionguo wuyanenyi, kundu sia yako iafutsio mrimenyi kowo.

¹⁴ Inyi ngyilewaṙambika malosho gako; na wandu wa wuyana walewasuo kyipfa wo chi wa wuyana-pfo, chandu inyi ngyilakyeri o wuyana.

¹⁵ Inyi ngyiterewa kye uwawute kunu wuyanenyi-pfo indi uwaringye walaolotso nyi Satana.

¹⁶ Wo chi wandu wa wuyana-pfo, chandu inyi ngyilakyeri o wuyana.

¹⁷ Uwailyishe kui Ṙeṙo lyapfo. Mbonyi tsapfo nyitso wuloi.

¹⁸ Chandu ulengyiṙuma inyi wuyanenyi, na inyi nyi wuṙo ngyilewaṙuma wuyanenyi.

¹⁹ Na kyipfa kyawo ngakuṙambika kopfo ngyikuṟundie, kundu nawo wakuṙambikye kopfo wakuṟundie, wailyisho nyi Ṙeṙo lyapfo lyii lya loi.

²⁰ “Maa chi iwo tupu ngyiwaterewia-pfo; kyaindi ngyiterewia na walya wechingyiiṙikyia kyipfa kya malosho gawo.

²¹ Woose wawaṙane tapu; chandu iyoe, Awu, ukyeri kyindo kyimwi na inyi, na inyi kyindo kyimwi na iyoe; iwo nawo wawe kyindo kyimwi na soe; kundu wandu wa wuyana waiṙime iiṙikyia kye nyi iyoe ulengyiṙuma.

²² Na inyi mng'ano ulya ulengyienenga ngyilewaenenga; kundu wawaṙane tapu chandu soe luwaṙanyi tapu.

²³ Inyi ngyiwe kyindo kyimwi nawo, na iyoe uwe kyindo kyimwi na inyi, kundu wawaṙane tapu; na wandu wa wuyana wamanye kye nyi iyoe ulengyiṙuma, kowakunda wo chandu ulengyikunda inyi.

²⁴ Awu, iwo ulengyienenga ngyikundi wakae handu hamwi na inyi orio handu ngyikyeri, waiṙime iwona mng'ano ulengyienenga; cha kyipfa nulengyikunda wookyia wuyana wulagumbo.

²⁵ Awu, iyoe okyeanduya kulawoṙe ikundia, wandu wa wuyana walekumanya-pfo; kyaindi inyi ngyilekumanya, na iwo wamanya kye nyi iyoe ulengyiṙuma.

²⁶ Na inyi ngyilewaloṟa iyoe nyi wui, lyingyi-se ngyechiengyeṟa iwuta kuṙo, kundu ikunda lyilya ulyiwoṙe koko lyikae mrimenyi kowo na inyi ngyiwe kyindo kyimwi nawo.”