Yohane 16 - Kivunjo New Testament 1999

¹ “Mbonyi-tso ngamuongoya kundu mulacheṙetsa iiṙikyia.

² Wechimuletsana na walya wekyeyenda masinagoginyi; yee loi kyiyeri kyiicha orio mndu aimbaaga echikusaṟa kye naiindia Ruwa kui iwuta kuṙo.

³ Na isho wechimmbutia cha kyipfa waichi Awu maa inyi-pfo.

⁴ Kyaindi ngamuongoya isho, kundu kyiyeri kyiyeri-kyo kyechicha mukumbuo kye inyi nyilemmbia. Ngyilemmbia isho wookyia mawookyionyi-pfo, cha kyipfa ngyiwekyeri hamwi na nyoe.”

Iṟunda lya Mumuyo Mweele

⁵ “Kyaindi wulalu inyi ngyiyenda ko ulya alengyiṙuma, maa kuwoṙe umwi onyu aingyiwesa ny'kwi ngyiyenda-pfo.

⁶ Indi cha kyipfa ngammmbia isho fowa iichuo mrimenyi konyu.

⁷ Kyaindi inyi ngammbia shii loi; mochiwona kyiira inyi ngayenda; cha kyipfa inyi ngyilandeyende, Mtarami-cho echicha na konyu-pfo; indi inyi ngayenda, ngyechimṙika konyu.

⁸ Na oe kamcha nechiloṟa wandu wa wuyana kye wekyeṙeko kyiyeri wekyegamba kye waichi mbonyi tsa wunyamaṟi. Kye waichi kyiha kyikyeri kya sungusinyi na kye waichi mbonyi tsa ianduyo nyi Ruwa.

⁹ Oe nechiloṟa wandu wa wuyana kye wawoṙe wunyamaṟi, kyipfa walengyiiṙikyia inyi-pfo.

¹⁰ Kye wawoṙe ṙeko kui igamba waichi kyikyeri kya sungusinyi kyipfa ngyiyenda ko Awu, maa mochingyiwona-se-pfo.

¹¹ Kye wechianduyo kyipfa Satana, mchilyi o wuyana-wu, amwanduyo.

¹² Ngyiwoṙe shindo shifoi shemuongoya, kyaindi moiṙima ishienenga ṙaawa makusaṟonyi ganyu wulalu-pfo.

¹³ Kyaindi kyiyeri oe echicha, Mumuyo-cho o loi, nechimusongoya, namushukuye wuloi woose; cha kyipfa echiṙeṙa kui wuchilyi wokye amonyi-pfo, indi shoose echiicho neshionguo, na shindo shiicha nechimuongoya mbonyi tsakye.

¹⁴ Oe nechingying'anyisa inyi; cha kyipfa nechiicho shilya ngyekyegamba na imuongoya.

¹⁵ Na shoose Awu awoṙe nyi shako. Ny'kyo kyitewe ngagamba nechiicho shilya ngyekyegamba na imuongoya.”

Fowa na Sia

¹⁶ “Hatsugae kyiyeri kyitutu na nyoe mochingyiwona-pfo; lyingyi-se hatsugae kyiyeri kyitutu na nyoe mochingyiwona.”

¹⁷ Kyasia wanalosho wakye waata wakawesana, “Mbonyi tsiha itso aigamba, ‘Hatsugae kyiyeri kyitutu na nyoe mochingyiwona-pfo, na lyingyi-se hatsugae kyiyeri kyitutu na nyoe mongyiwona?’ Na ‘Cha kyipfa ngyiyenda ko Awu?’ ”

¹⁸ Kyasia wakagamba, “Mbonyi tsiha itso aigamba, ‘hatsugae kyiyeri kyitutu?’ Luichi kyindo aigamba-pfo.”

¹⁹ Yesu nalemanya kye wawekundi immbesa; kawawesa, “Ny'kyo muiwesana, kye ngyilegamba, ‘hatsugae kyiyeri kyitutu na nyoe mochingyiwona-pfo; na lyingyi-se hatsugae kyiyeri kyitutu na nyoe mochingyiwona?’

²⁰ Ny'kyaloi ngammbia, nyoe mochilyia na ikapa ṟanyi, indi wandu wa wuyana wechichihiyo. Nyoe mochiwoṙo nyi fowa, kyaindi nyi fowa yanyu yechiwa sia.

²¹ Mndu mka kyiyeri-kyo aienengo mana, nekyewoṙo nyi fowa kyipfa kyiyeri kyakye kyelya wukyiwa kyaafukyia; kyaindi kamwenengo mana, ekyekumbuo-se wukyiwa wulya-pfo, kyipfa kya sia ya ifeo mndu wuyanenyi.

²² Kyasia nyoe wulalu muwoṙo nyi fowa; kyaindi inyi ngyechimmbona-se; na mrima yanyu yechichihiyo, na sia yanyu kuwoṙe mndu echimusoka-pfo.

²³ Lyingyi-se mfiri ulya mochingyiwesa kyindo kyoose-pfo. Ny'kyaloi ngammbia, mukoterewa Awu kyindo kyoose nechimuenenga kui rina lyako.

²⁴ Mṟasa wulalu mulandeterewe kyindo kui rina lyako-pfo. Terewenyi, na nyoe mochienengo; kundu muchihiyo nakamwi.”

Iwinga Wuyana

²⁵ “Isho ngamuongoya kui mbia. Kyiyeri kyiicha ngyilechiṙeṙa-se na nyoe kui mbia; kyaindi mbonyi tsa Awu ngyechimuongoya na pata.

²⁶ Na mfiri-cho mochiterewa kui rina lyako; maa ngyimmbia kye inyi ngyechimuterewia ko Awu-pfo;

²⁷ cha kyipfa Awu namukundi kyipfa nyoe mongyikunda inyi, na iiṙikyia kye inyi ngyilewuka ko Awu.

²⁸ Ngyilewuka ko Awu, na inyi ngyilecha na kunu wuyanenyi. Lyingyi-se ngyiwuka kunu wuyanenyi; na iyenda ko Awu.”

²⁹ Kyasia wanalosho wakye wakagamba, “Wulalu nuionguo na pata; uiṙeṙa-se kui mbia-pfo.

³⁰ Wulalu lomanya kye nuichi shindo shoose; kuwoṙe kyimaṙuma kya mndu ikuwesa kyindo-pfo. Koikyo loiṙikyia kye nulewuka ko Ruwa.”

³¹ Yesu kawagaluo, kawawia, “Ngyesa moiṙikyia wulalu?

³² Kyiyeri kyiicha, nakyo kyamcha, kyiyeri mochinyanyaṟika orio mndu kanyi kokye, na ingyiṙa ngyimonyi. Kyaindi inyi ngyikyeri ngyimonyi-pfo, cha kyipfa Awu nakyeri hamwi na inyi.

³³ Isho ngammbia muiṙime iwaṙa ufoṟo muwaṙanyi na inyi. Kunu wuyanenyi muwoṙe fowa; kyaindi kuwanzenyi; inyi ngyilewinga wuyana.”