Yohane 15 - Kivunjo New Testament 1999

Yesu nyi Msabibu o Loi

¹ “Inyi nyi msabibu o loi, na Awu oko nyi oe mṙemi.

² Orio mbaga ilekyekumbia ndunda ngyekyeimanya; na orio mbaga yekyekumbia ndunda ngyekyeianguo, kundu iengyeṟe ikumbia ndunda.

³ Nyoe momuila kyipfa kya mbonyi-tsi ngammbia.

⁴ Nyoe na inyi luwe kyindo kyimwi. Chandu mbaga ilechiiṙima ikumbia ndunda ilakuwoṙe msabibunyi; na wuṙo taa kyechiwa konyu mulandewe kyindo kyimwi na inyi.

⁵ Inyi nyi msabibu; nyoe nyi mbaga; ulya awa kyindo kyimwi na inyi, nekumbia ndunda tsifoi mnu; kyipfa ngyilai ho inyi moiṙima iwuta kyindo kyoose-pfo.

⁶ Mndu alandewe kyindo kyimwi na inyi nekyewiyitso cha mbaga na iuma; wandu wakatsisania na itsiwiyitsa moṙonyi tsikasenekyia.

⁷ Nyoe mukowa kyindo kyimwi na inyi, na malosho gako gakakaa mrimenyi konyu, terewenyi kyindo kyoose mukundi na nyoe mochienengo.

⁸ Kuṙo Awu oko neching'anyiso, kyipfa muikumbia ndunda tsifoi mnu; na nyoe mochiwa wanalosho wako.

⁹ “Chandu Awu alengyikunda inyi, na chandu ngyilemukunda nyoe, kaenyi ikundenyi lyako.

¹⁰ Mukoosha kyilya mawawaso gako gakundi, mochikaa ikundenyi lyako; chandu inyi ngyekyeosha mawawaso ga Awu oko na ikaa ikundenyi lyakye.

¹¹ Ngamuongoya isho, kundu sia yako ikae mrimenyi konyu, na sia yanyu iafutsio.

¹² Iwawaso lyako nyi ilyi, mukundane, chandu ngyilemukunda nyoe.

¹³ Kuwoṙe awoṙe ikunda lying'anyi kuta ilyi, lya mndu ireka moo okye kyipfa kya mbuya tsakye-pfo.

¹⁴ Nyoe mochiwa mbuya tsako, mukowuta shilya ngammbia.

¹⁵ Ngyimulaga-se watumo-pfo; cha kyipfa mtumo aichi kyindo mndumii okye ekyewuta-pfo; kyaindi ngamlaga mbuya; cha kyipfa shoose ngyileshiicho ko Awu oko ngamuongoya.

¹⁶ Chi nyoe mulengyisambuṟa inyi-pfo, indi nyi inyi ngyilemusambuṟa nyoe; kundu mundekumbia ndunda; na ndunda tsanyu tsiiṙime ikaa ho mfiri yoose; kundu orio kyindo moterewa Awu kui rina lyako namuenengye.

¹⁷ Ishi ngammbia nyoe, muiṙime ikundana.”

Isuuyo nyi Wuyana

¹⁸ “Kokooya wandu wa wuyana wamsuo, manyenyi kye walengyisuo inyi kuwooka.

¹⁹ Kokooya nyoe muwei wandu wa wuyana, wawechimukunda; kyaindi kyipfa nyoe mulakyeri wandu wa wuyana, indi inyi ngyilemusambuṟa nyoe iwuka wandu wa wuyana, kyipfa kya ikyo wandu wa wuyana wamusuuye.

²⁰ Kumbuonyi mbonyi tsilya ngyilemuongoya, kye mtumo ang'anyi kuta mndumii okye-pfo. Kokooya walengyipfulutsa nyashi, wechimpfulutsa nyashi nyoe; kokooya waleosha malosho gako, wechiosha ganyu taa.

²¹ Kyaindi ishi shoose wechimmbutia kyipfa kya rina lyako, cha kyipfa waichi ulya alengyiṙuma-pfo.

²² Kokooya ngyilalecha na iṙeṙa nawo wawechikumbuṟo kya wunyamaṟi wowo-pfo; kyaindi wulalu wekaria igamba kye waichi kye isho wawekyewuta nyi wunyamaṟi-pfo.

²³ Ulya angyisuuye inyi nasuuye na Awu oko.

²⁴ Wawechikumbuṟo kya wunyamaṟi wowo kokooya ngyilalewuta kyiiṙi kyawo shindo shilandewuto mndu ungyi oose-pfo; kyaindi wulalu wammbona shilya ngawuta, wakangyisuo inyi na Awu oko.

²⁵ Kyaindi kundu kyindo kyilya kyikyiṟeie uwawasonyi lowo kyiafukyie, kyindo kyigambie, ‘Walengyisuo wulya.’

²⁶ Kyaindi kyiyeri-kyo Mtarami-cho echicha, ngyechimṙika iwuka ko Awu, Mumuyo-cho o loi awukyie ko Awu, oe nechingyiṟingyishia.

²⁷ Na nyoe taa muingyiṟingyishia, cha kyipfa wookyia mawookyionyi muwekyeri hamwi na inyi.