Yohane 14 - Kivunjo New Testament 1999

Yesu nyi Njia Yeshika ko Awu

¹ “Maa mulaiṟewe mrimenyi konyu; muiṙikyie Ruwa, ngyiiṙikyienyi na inyi.

² Kanyi ko Awu oko kuwoṙe kundu kufoi kokaa. Kyilawei kuṙo ngyiwechimmbia; kyipfa ngyindemuṟeyeṟia handu hekaa.

³ Kyasia inyi ngyindemuṟeyeṟia handu hekaa. Ngyechicha-se ngyimuṙuo koko; kundu handu ngyikyeri, na nyoe mukae ho.

⁴ Na kundu ngyiyenda nyoe muichi njia.”

⁵ Tomasi kammbia, “Mndumii, soe luichi kundu uiyenda-pfo; luichi kuṙa njia?”

⁶ Yesu kammbia, “Inyi nyi njia, na wuloi na moo. Mndu ekyecha na ko Awu, sile kui iiṙia koko-pfo.

⁷ Kokooya muwengyiichi inyi, muwechimanya Awu. Wookyia wulalu mumwichi, lyingyi-se momummbona.”

⁸ Filyipo kammbia, “Mndumii luloṟe Awu, kyilushikyie.”

⁹ Yesu kammbia, “Inyi ngyiwekyeri hamwi na nyoe mfiri yoose, iyoe ulangyimanye Filyipo? Angyiwona inyi nawona Awu. Kyasia iyoe nuigamba kuṙa ‘ululoṟe Awu?’

¹⁰ Uiṙikyie kye inyi ngyikyeri kyiiṙi kya Awu, na Awu nakyeri kyiiṙi kyako? Isho ngyimuongoya wulalu chi makusaṟo gako inyi-pfo kyaindi nyi Awu ulya akyeri kyiiṙi kyako aiṟunda shilya akundi iṟunda.

¹¹ Iṙikyienyi kye inyi ngyikyeri kyiiṙi kya Awu, na Awu nakyeri kyiiṙi kyako. Mulandeiṙikyie kyipfa kya ikyo iṙikyienyi kyipfa kya shilya ngyiwuta.

¹² Ny'kyaloi ngammbia, ulya angyiiṙikyia inyi, shindo shilya ngyiwuta, na oe nechishiwuta; yee, na shing'anyi kuta isho nechiwuta cha kyipfa inyi ngyiyenda ko Awu.

¹³ Na nyoe, mukoterewa kyindo kyoose kyipfa mukyeri wanalosho wako, ikyo ngyechikyiwuta, kundu Awu nang'anyiso kyiiṙi kya Mana.

¹⁴ Mukoterewa kyindo kyoose kyipfa mukyeri wanalosho wako ngyechikyiwuta.”

Kyaasa kya Mumuyo Mweele

¹⁵ “Mukongyikunda mochiosha kyilya mawawaso gako gakundi.

¹⁶ Na inyi ngyechiterewa Awu, na oe nechimuenenga Mtarami ungyi, kundu nakae na nyoe mṟasa mlungana.

¹⁷ Nyi oe Mumuyo o loi; ulya wandu wa wuyana walechiiṙima imwambililyia, cha kyipfa wammbonyi maa wamwichi-pfo; indi nyoe mumwichi, kyipfa nekyekaa konyu; na oe nechikaa mrimenyi konyu.

¹⁸ Ngyechimṙa ngoṙa-pfo. Ngyiicha na konyu.

¹⁹ Hatsugae kyiyeri kyitutu wandu wa wuyana walechingyiwona-se; indi nyoe mungyiwonyi. Na kyipfa inyi ngyiwoṙe moo, maa nyoe mochiwaṙa moo.

²⁰ Mfiri ulya mochimanya kye inyi na Awu oko nyi kyindo kyimwi, na inyi na nyoe nyi kyindo kyimwi.

²¹ Ulya aambilyia mawawaso gako na igaosha, icho nyi oe angyikundi; na ulya angyikundi Awu oko nechimkunda; na inyi ngyechimkunda na imloṟa mbonyi tsako na pata.”

²² Yuda (chi oe Yuda Isikariote-pfo) kammbia, “Mndumii, kyawa kuṙa ukundi iṟingyishia mbonyi tsapfo koṙu na chi ko wandu wa wuyana-pfo?”

²³ Yesu kagaluo, kammbia, “Mndu kangyikunda nechiosha kyilya malosho gako gakundi; na Awu oko nechimkunda; na soe lochicha na kokye, na iwika kyiṟaṟo kokye.

²⁴ Mndu alangyikundi, ekyeosha kyilya malosho gako gakundi-pfo; na malosho-go mugaichuoe chi gako-pfo, indi nyi ga ulya alengyiṙuma.”

²⁵ “Isho nyisho ngyilemuongoya kyiyeri-kyo ngyiwekyekaa konyu.

²⁶ Kyaindi Mtarami-cho, Mumuyo-cho Mweele, ulya Awu echimṙika kui rina lyako, nechimulosha shoose, na imukumbuṟa shoose ngyilemmbia.

²⁷ Ngamṙeeya ufoṟo. Ufoṟo loko ngamuenenga. Chandu ngyimuenenga chi wuṙo wuyana wokyeenenga-pfo. Mulaiṟewe mrimenyi konyu, maa mulawaṙe wuowu.

²⁸ Muleicho kye inyi ngyilemmbia, ‘Ngyiyenda na ngyiicha-se na konyu.’ Kokooya muwengyikundi, muwechichihiyo kyipfa ngyiyenda ko Awu; cha kyipfa Awu nang'anyi kuta inyi.

²⁹ Na wulalu ngamuongoya isho shilaafukyia kundu ilyi shechiafukyia muiṙime iiṙikyia.

³⁰ Inyi ngyechiṙeṙa-se na nyoe shindo shifoi-pfo, cha kyipfa Satana, mchilyi o wuyana-wu naicha, na echiiṙima ingyiwutia kyindo-pfo.

³¹ Kyaindi wandu wa wuyana wamanye kye ngyikundi Awu; na shilya Awu alengyiwia, nyisho ngyiwuta. Nnjonyi luwukye iha.”