Yohane 13 - Kivunjo New Testament 1999

Yesu Kasanja Wanalosho Wakye Maṙende

¹ Kyasia, mṟumoe o Pasaka ulandeafukyie Yesu nalemanya kye kyiyeri kyakye kyewuka kunu wuyanenyi iyenda ko Awu, kyiwemshika. Na nalekunda walya wawekyemwosha kunu wuyanenyi, kawakunda mnu.

² Na kyiyeri kya kyelya kya kyukonyi; Mokyiriinzi naleenenga Yuda, mana o Simion Isikariote, ngoo yemṟiinga.

³ Yesu aichi kye Awu namṙambikyie shoose na kye nawukyie ko Ruwa na oe naiyenda ko Ruwa,

⁴ nalewuka halya shelyenyi, kayenda mbai kawuta pfo nguwo tsakye, kaira kyitambaa, kakuinewa kyitsinyi.

⁵ Numa ya iho kawika mṟinga pakulyinyi, kawooka isanja wanalosho wakye maṙende, na igaanguo kui kyitambaa kyilya awekuinewie.

⁶ Kashika ko Simion Petiro na oe kammbesa, “Mndumii! Iyoe nungyisanja maṙende?”

⁷ Yesu kagaluo, kammbia, “Kyindo ngyiwuta ochikyimanya wulalu-pfo; kyaindi nochikyimanya numa ya iha.”

⁸ Petiro kammbia, “Iyoe ochingyisanja maṙende maa ale-pfo.” Yesu kammbia, “Ngyilandekusanje maṙende, ukyeri ura loko-pfo.”

⁹ Simion Petiro kammbia, “Mndumii, chi maṙende gako tupu-pfo, indi sanja na mawoko gako na mṙoe oko taa.”

¹⁰ Yesu kammbia, “Ulya amsambe awoṙe-se kyimaṙuma kyesamba maṙende-pfo, kyipfa namwilyi mmbiu oose; na nyoe momuila kyaindi chi moose-pfo.”

¹¹ Cha kyipfa nalemanya ulya echimṟiinga; nyikyo kyitewe alegamba, “Chi moose muweelyi-pfo.”

¹² Kyasia amuwasanje maṙende, na iṟaa nguwo tsakye na iṙamia-se halya-ndu waweilyiia kyelya, nalewawia, “Ngyesa momanya isho ngammbutia?”

¹³ Nyoe muingyilaga, “Mlosha” na “Mndumii;” moṙeṙa necha, kyipfa nyi wuṙo ngyikyeri.

¹⁴ Kyasia kokooya inyi, ngyikyeri Mndumii na Mlosha, ngamusanja maṙende, na wuṙo kyimmbari isanjana maṙende nyoe wenyi ko wenyi.

¹⁵ Cha kyipfa ngamumloṟa chandu mowuta; kundu chandu ngammbutia, na nyoe muwute kuṙo.

¹⁶ Ny'kyaloi ngammbia, mtumo ang'anyi kuta mndumii okye-pfo; maa moṙiko ndumo ang'anyi kuta ulya amṙuma-pfo.

¹⁷ Wulalu momanya isho ngammbia; agusu nyoe kokooya moshiwuta!

¹⁸ Ngyiṙeṙa mbonyi tsa nyoe moose-pfo. Ngyiichi walya ngyilewasambuṟa; kyaindi kyiṟeio kyiiṙime iafukyia; kyiṟeio kyilya kyigambie, “Ulya alelya kyelya kyako nawa mokyituwa oko.”

¹⁹ “Wookyia wulalu ngammbia shilya shechiwutika, kyiyeri-kyi shilandewutikye; kundu ilyi shechiwutika muiṙime iiṙikyia kye inyi nyi oe ulya ai pfo wookyia mlungana.

²⁰ Ny'kyaloi ngammbia, ulya aambilyia mndu oose ngamṙuma, nangyiambilyia inyi; na ulya angyiambilyia inyi naambilyia ulya alengyiṙuma.”

Yesu Kagamba kye Nechiṟiingo

²¹ Na Yesu amwonguo isho, naleiṟewe mrimenyi, kaṟingyishia echigamba, “Ny'kyaloi ngammbia, umwi onyu nechingyiṟiinga.”

²² Wanalosho wakaambuyana, walamanye nyi wui aweimsenda.

²³ Na kuwewoṙe umwi o wanalosho wakye, aweṙamie kufuhi na Yesu; Yesu awemkundi.

²⁴ Kyasia Simion Petiro kamtsinia, kammbia, “Wesa, nyi wui amsenda?”

²⁵ Kyasia manalosho ulya katikyira kaaramia ura lo Yesu, kammbesa, “Mndumii, nyi wui?”

²⁶ Kyasia Yesu kagaluo, kagamba, “Nyi mndu ulya ngyechikapa itongye kyitelenyi na imwenengyia.” Kakapa itongye kyitelenyi kalyienengyia Yuda, mana o Simion Isikariote.

²⁷ Yuda amwambilyie itongye lyilya Satana kaiṙa na mrimenyi kokye. Kyasia Yesu kammbia, “Shindo uiwuta shiwute iwinyi.”

²⁸ Maa kuwoṙe mndu oose kyiiṙi kya walya waweṙamie halya alemanya kyitewe kya immbia kuṙo-pfo.

²⁹ Cha kyipfa walekusaṟa, kyipfa Yuda awekyekooma kyikuchu kya heleri, Yesu nammbia kye, guṟa shilya lukundi kyipfa kya mṟumoe-chu; ang'u nammbia kye naenengye wakyiwa kyindo.

³⁰ Kyasia Yuda, amwambilyie itongye lyilya, kawuka halya kyiyeri kyilya kyilya. Na nyi-we kyio.

Iwawaso Lyihya

³¹ Yuda amfumie nja, Yesu nalegamba, “Wulalu Mana o Adamu nang'anyiso, na Ruwa nang'anyiso kyiiṙi kyakye.

³² Ruwa nechimng'anyisa mrimenyi kokye; na oe nechimng'anyisa cha ilyi.

³³ Nyoe wana wako, hatsugai kyiyeri kyitutu ngyikyeri hamwi na nyoe; mochingyipfula; na chandu ngyilewia Wayuda kye, ‘Kulya-ndu ngyiyenda moiṙima icha na pfo-pfo’; na wuṙo wulalu ngyimmbia nyoe.

³⁴ Ngyimuenenga iwawaso lyihya: ‘Mukundane.’ Chandu ngyilemukunda nyoe, na nyoe mukundane wuṙo.

³⁵ Kuṙo wandu woose wechimanya kye nyoe mowa wanalosho wako, kokooya mokundana nyoe wenyi ko wenyi.”

Yesu Kagamba kye Petiro Nechimkana

³⁶ Simion Petiro kammbia, “Mndumii, ny'kwi uiyenda?” Yesu kamgaluo, kagamba, “Kulya-ndu ngyiyenda oiṙima ingyiosha wulalu-pfo; kyaindi nongyiosha numa.”

³⁷ Petiro kammbia, “Mndumii, ny'kyilyi inyi ngyilechiiṙima ikuosha wulalu? Inyi ngyechireka moo oko kyipfa kyapfo.”

³⁸ Yesu kamgaluo, kammbia, “Ngyesa iyoe nochireka moo opfo kyipfa kyako? Ny'kyaloi ngakuwia, ilying'onyi lyechifuga ulangyikana kaṟaaṟu-pfo.”