Yohane 12 - Kivunjo New Testament 1999

Yesu Kashio Mafuṙa Kulya Betania

¹ Kyasia hatsugae mfiri iṟandaaṟu mṟumoe o Pasaka uafukyie, Yesu naleshika Betania, halya-ndu Lasaro awekyeri, ulya Yesu alemṟutsa ko wapfu.

² Kyasia wakamwachikyia shelya ipfo Betania; na Marita naweiṟunda pfo, na Lasaro nawekyeri umwi o walya waweilya hamwi na Yesu.

³ Kyasia Maria kaira panti ya mafura gekyepfaama necha, na ga woguru wung'anyi, kashia Yesu maṙende, kaanguo maṙende-go kui njui tsakye. Numba iya yoose ikaichuo mpfaamo o mafuṙa-go gekyepfaama necha.

⁴ Kyasia Yuda Isikariote, umwi o wanalosho wakye, ulya awekundi imṟiinga, kagamba,

⁵ “Ny'kyilyi mafuṙa-ga gekyepfaama necha galakumbo dinari magana gaṟaaṟu tsikaenengo wakyiwa?”

⁶ Na oe nalegamba kuṙo, chi kyipfa alewonia wakyiwa wukyiwa-pfo; indi kyipfa oe nawei mbafu, na oe nyi oe awekyekooma kyikuchu kya heleri, kakuwutia pfo heleri chandu alekunda.

⁷ Kyasia Yesu kagamba, “Mlekyenyi nakumbuo ikyo awuta, kyipfa kyawuto kui ikumbuo mfiri o iṟiko lyako.

⁸ Cha kyipfa mfiri yoose muwoṙe wakyiwa; indi mochikaa na inyi mfiri yoose-pfo.”

Kyikweena Kyewaaga Lasaro

⁹ Kyasia wandu wafoi kyiiṙi kya Wayuda walemanya kye nawekyeri kulya Betania; wakacha, chi kyipfa kya Yesu tikyi-pfo, indi kundu wawone na Lasaro, ulya Yesu alekoamṟutsa ko wapfu.

¹⁰ Na wang'anyi wa makohanyi wakawika kyikweena kyewaaga Lasaro;

¹¹ cha kyipfa kyipfa kya Lasaro wandu wafoi walelekana na wang'anyi-wo wa makohanyi, wakaiṙikyia Yesu.

Iiṙa na Yerusalemu kui Kyiṟumi

¹² Ilya-ngama wandu wafoi walekowacha kyipfa kya mṟumoe waleicho kye Yesu naicha na Yerusalemu.

¹³ Wakafunja maṟamba ga mashiṙi gai cha makangachi, wakafumia nja indemwambilyia. Wakakalagatsa, wechigamba, “Mndumii naṟumisho! Ulya ammbikyie mboṟa aicha kui rina lya Mndumii, Mangyi o Isiraelyi!”

¹⁴ Na Yesu nalekoammbona nzoi, kaṙamia wuye yayo, chandu kyikyiṟeie,

¹⁵ “Mulaowuoe wandu wa Yerusalemu; mangyi onyu naicha, naṙamilyie nzoi.”

¹⁶ Mbonyi-tso wanalosho wakye waletsimanya ipfo mawookyionyi-pfo; kyaindi kyiyeri Yesu aleng'anyiso nyi lyo-ndu walekumbuo kye shiṟeio shiwegambie mbonyi tsakye kuṙo, na kye walemmbutia isho.

¹⁷ Wandu walya wawei na Yesu kyiyeri kyilya alelaga Lasaro na imṟutsa iwuka upfunyi walekowammbia ny'kyikyi kyilekokyawutika.

¹⁸ Na kyipfa kya ikyo wandu wafoi wa kyisanzionyi wakayenda imwambilyia, cha kyipfa waleicho kye nawuta kyindo-kyo kya kyiṟiyisho.

¹⁹ Kyasia Mafarisayo wakawiana wo wenyi ko wenyi, “Kuwoṙe kyindo luiria iha-pfo; wandu woose waimwosha.”

Wakyiṟikyi Waata Wakapfula Yesu

²⁰ Kuwewoṙe Wakyiṟikyi waata kyiiṙi kya wandu walekowayenda Yerusalemu iterewa Ruwa kyiyeri kya mṟumoe ulya o Pasaka.

²¹ Kyasia Wakyiṟikyi-wo waleyenda ko Filyipo (awewukyie Betisaida urukyenyi lo Galyilaya), wakamterewa, wechigamba, “Mndumii, soe lukundi iwona Yesu.”

²² Filyipo kayenda, kawia Anderea; numa ya iho Anderea na Filyipo wakawia Yesu.

²³ Yesu na oe kawagaluo, kagamba, “Kyiyeri kyamshika. Mana o Adamu naṟumisho.

²⁴ Ny'kyaloi ngammbia, mbeu ya nganu ilandeolokye terinyi, ikapfa, yekyekaa wuṙo chandu iwekyeri; indi ikapfa yekyekumbia ndunda tsifoi.

²⁵ Ulya akundi mrima okye nechiuṙetsa; na ulya asuuye mrima okye kyiyeri-kyo akyeri kunu wuyanenyi nechiukyiṟa mṟasa moo o mlungana.

²⁶ Mndu kangyiṟundia nangyioshe; na inyi handu ngyikyeri nyi ho-ndu na mṟundi oko echikaa. Lyingyi-se mndu kangyiṟundia, Awu nechimwindia.”

Yesu Kaṙeṙa Mbonyi tsa Upfu Lokye

²⁷ “Wulalu mrima oko uiṟewe; na inyi ngyigambe kyi? Ngyigambe ‘Awu ungyiwute kyiyeri-kyi kya iyesho lying'anyi?’ Kyaindi ngyilecha na kunu wuyanenyi kyipfa kya kyiyesho-kyi.

²⁸ Awu, ng'anyisa rina lyapfo.” Kyasia kukocha ṟui lyawuka ruwewu lyikagamba, “Ngalying'anyisa, na inyi ngyechilying'anyisa-se.”

²⁹ Kyasia wandu wa kyisanzionyi kyiwekyeri kufuhi wakaicho, wakagamba, “Kowaṙa ndiṟimo.” Wengyi wakagamba, “Malaika aṙeṙa na oe.”

³⁰ Yesu kagaluo, kagamba, “Ṟui-lyo lyacha kyipfa kyako-pfo, indi kyipfa kyanyu.

³¹ Wulalu nyi kyiyeri kyeanduya wuyana. Wulalu Satana, mchilyi o wuyana-wu, nechiwiyitso nja.

³² Na inyi ngairo iwuka kunu urukyenyi ngyechikuruo woose wache na koko.”

³³ Nalegamba isho echiloṟa nyi upfu lo mbaṟe iha echipfa.

³⁴ Kyasia wandu wa kyisanzionyi wakamgaluo, wakagamba, “Soe luleicho uwawasonyi kye Kristo nai pfo mṟasa mlungana; na iyoe nugamba kuṙa kye Mana o Adamu nawaṟi iirio wuye? Mana-cho o Adamu nyi wui?”

³⁵ Kyasia Yesu kawawia, “Ngyeela ikyeri na nyoe kyiyeri kyifuhi. Yendenyi kyiyeri-kyo muwoṙe ngyeela, meema ulachemuolokyia; kyipfa aichumia meemenyi aichi kundu aiyenda-pfo.

³⁶ Iṙikyienyi ulya ekyeende ngyeela, kyiyeri-kyo akyeri na nyoe, kundu muiṙime iwa wana wa ngyeela.” Isho Yesu naleonguo, kayenda kakuṟiika wandu walammbone.

Wandu Wakauṟa Iiṙikyia

³⁷ Maa chandu alewuta shindo shifoi kuṙo sha kyiṟiyisho mbele yawo wandu walemwiṙikyia-pfo;

³⁸ kundu kyiafukyie kyindo kyilya moonguo shisuku Yesaya alegamba, “Mndumii, nyi wui aleiṙikyia mbonyi tsaṙu; na nyi wui Ruwa alemloṟa pfinya tsakye?”

³⁹ Nyikyo kyitewe wo walaleiṙima iiṙikyia; cha kyipfa Yesaya nalegamba-se,

⁴⁰ “Nalewagaluo shipfupfuṟe, mrima yawo kaiumiṟa; kundu meso gawo galawone, na mṙoe yawo ilamanye; wakangyigalukyia, ngawakyiṟa.”

⁴¹ Mbonyi-tsi Yesaya naletsionguo, cha kyipfa nalewona mng'ano okye, kasenda mbonyi tsakye.

⁴² Kyaindi maa kyiiṙi kya wandu wawoṙe rina kyiiṙi kya Wayuda kuwewoṙe wafoi walemwiṙikyia; indi kyipfa kya Mafarisayo waleonguo mbonyi tsakye kulawoṙe iṟikyia-ṟikyia-pfo, kundu walacheimo ikulunga na walya wawekyeyenda sinagoginyi.

⁴³ Cha kyipfa walekunda iṟumisho nyi wandu kuta iṟumisho nyi Ruwa.

Ianduyo kui Maṙeṙo ga Yesu

⁴⁴ Yesu kakuilenga na ṟui lying'anyi kagamba, “Ulya angyiiṙikyia inyi, angyiiṙikyia inyi-pfo indi naiṙikyia ulya alengyiṙuma.

⁴⁵ Na ulya angyiambuya inyi naambuya ulya alengyiṙuma.

⁴⁶ Inyi ngyilecha kundu ngyiwe ngyeela ya wuyana, kundu orio mndu angyiiṙikyia inyi alakae meemenyi.

⁴⁷ Na mndu kaicho malosho gako alagaoshe, inyi ngyechimwanduya-pfo; kyipfa ngyilecha kundu ngyianduye wuyana-pfo, indi ngyikyiṟe wuyana.

⁴⁸ Ulya angyilega inyi, alaambilyie malosho gako, nawoṙe momwanduya; mbonyi-tso ngaonguo nyitso tsechimwanduya mfiri o furumia.

⁴⁹ Cha kyipfa inyi ngyileonguo mbonyi tsa mrima oko tupu-pfo; indi Awu alengyiṙuma, oe nalengyiwia shindo ngyechigamba.

⁵⁰ Na inyi ngyiichi iwawaso lyakye nyi moo o mlungana. Kyasia isho ngyionguo inyi, chandu Awu alengyiwia, nyisho ngyionguo.”