Yohane 11 - Kivunjo New Testament 1999

Upfu lo Lasaro

¹ Mndu umwi awekyelago Lasaro, awekyekaa Betania, naweluoe. Lasaro-cho nyi-we msacha o Maria na Marita.

² Maria nyi oe ulya aleshia Mndumii Yesu mafuṙa gekyepfaama necha, kamwanguo maṙende kui njui tsakye. Nyi oe Lasaro msacha okye aweluoe.

³ Kyasia washikyi walya wakaṙuma ndumo ko Yesu wakagamba, “Mndumii, ulya umkundi naluoe.”

⁴ Na Yesu kyiyeri aleicho, nalegamba, “Ndoṟe-i yechiende upfu-pfo, indi yacha kyipfa kya mng'ano o Ruwa, kundu Mono-Ruwa nang'anyiso kui ndoṟe-yo.”

⁵ Na Yesu nawekundi Marita na Maria na Lasaro.

⁶ Kyasia kyiyeri aleicho kye naluoe, nalekaa halya-ndu awekyeri mfiri iwi ya ngoseṟa.

⁷ Numa ya iho, kawia wanalosho wakye, “Sindenyi-se uruka lo Uyuda.”

⁸ Wanalosho walya wakammbia, “Rabi, nyi icho-lyi tikyi Wayuda wawekundi ikukapa na magoe, na iyoe nukundi iyenda-se pfo?”

⁹ Yesu kagaluo, kawawia, “Ngyesa saa tsa kyingoto chi ikumi na tsiwi-pfoe? Mndu kachumia kyingoto ekyekapa tuulyia-pfo; cha kyipfa nawonyi ngyeela ya mnengyeṟi.

¹⁰ Indi kachumia kyio nekyekapa tuulyia; cha kyipfa ngyeela ikyeri kokye-pfo.”

¹¹ Nalegamba isho, na numa ya iho kawawia, “Mbuya yaṙu, Lasaro, nalee; kyaindi ngyiyenda ngyiiṙime imwamtsa.”

¹² Kyasia wanalosho walya wakammbia, “Mndumii, kokooya nalee, nechia.”

¹³ Kyaindi Yesu naweiwawia mbonyi tsa upfu lokye; nawo wakakusaṟa kye naṙeṙa mbonyi tsa ilaa maṙoe.

¹⁴ Kyasia iho Yesu kawawia na pata, “Lasaro napfa.

¹⁵ Inyi ngachihiyo kyipfa kyanyu kye ngyiwekyeri ipfo-pfo, kundu muiṙikyie. Kyaindi sindenyi kokye.”

¹⁶ Kyasia Tomasi, awekyelago (Wana wawi wawafee kyiyeri kyimwi), kawia wanalosho woṙoe, “Na soe sindenyi, kundu lupfe hamwi na oe.”

Yesu nyi Wuṟutsi na Moo

¹⁷ Kyasia kyiyeri Yesu aleshika kulya, nalekooya Lasaro amkaa kyilomenyi cha mfiri ina.

¹⁸ Na Betania nyi-we kufuhi na Yerusalemu, cha mailyi tsiwi kuṙi.

¹⁹ Na wandu wafoi kyiiṙi kya Wayuda walekowacha na ko Marita na Maria, kundu wawawiyiṟie moo kyipfa kya upfu lo msacha owo.

²⁰ Kyasia, Marita kyiyeri aleicho kye Yesu naicha, naleyenda imwambilyia; na Maria naleṙio kanyi.

²¹ Kyasia Marita kawia Yesu, “Mndumii, kokooya uwekyeri iha, msacha-chu oko aweipfa-pfo.

²² Kyaindi maa wulalu ngyiichi kye orio kyindo oterewa Ruwa nechikuenenga.”

²³ Yesu kammbia, “Msacha opfo nechiṟuka.”

²⁴ Marita kammbia, “Ngyiichi kye nechiṟuka kyiyeri kya wuṟutsi wo mfiri o furumia.”

²⁵ Yesu kammbia, “Inyi nyi ulya ekyeende wuṟutsi-wo, na moo. Ulya angyiiṙikyie inyi, maa kapfa, nechiwaṙa moo o mlungana.

²⁶ Na orio mndu awoṙe moo na ingyiiṙikyia inyi echipfa kyimrima mṟasa mlungana-pfo. Ngyesa nuiṙikyie isho?”

²⁷ Kammbia, “Yee, Mndumii, inyi ngyiiṙikyie kye iyoe nyi oe Kristo, Mono-Ruwa, ulya aicha na wuyanenyi.”

Yesu Kalyia

²⁸ Marita amgambe kuṙo kayenda; kaṙuo Maria mbai kagamba, “Mlosha naikulaga.”

²⁹ Na oe kyiyeri aleicho naleamka faṟa, kayenda ko Yesu.

³⁰ Na Yesu alekoamwiṙa na kulya kyikaṟonyi-pfo; kyaindi nawekyeri halya-ndu Marita alekoandemwambilyia.

³¹ Kyasia Wayuda walya wawekyeri na Maria kanyi, wechimmbiyiṟia moo, kyiyeri walewona chandu aamka faṟa na iyenda, walemwosha; kunu wechikusaṟa kye naweiyenda kyilomenyi nandelyilyia pfo.

³² Kyasia kyiyeri Maria aleshika halya-ndu Yesu awekyeri, na immbona, naleoloka maṙendenyi gakye, kammbia, “Mndumii, kokooya uwekyeri iha, msacha oko awechipfa-pfo.”

³³ Kyasia kyiyeri Yesu alemmbona echilyia, na Wayuda walya waweiṙuṙanyi na oe welyia, nalewoṙo nyi fowa mrimenyi, mrima okye ukoiṟewe,

³⁴ kagamba, “Ny'kwi mommbikyia?” Wakammbia, “Mndumii, nnjo uwone.”

³⁵ Yesu katonyitsa mcheṟeṟe.

³⁶ Kyasia Wayuda wakagamba, “Ambuyenyi chandu awemkundi.”

³⁷ Indi wengyi wakagamba, “Ngyesa ichu aleenenga kyipfupfuṟe kyilya wuiṙimi wo iwona, aleiṙima ishingyia ichu alapfe-pfoe?”

Lasaro Kaṟutso

³⁸ Kyasia Yesu, awoṙo-se nyi fowa mrimenyi, kashika halya kyilomenyi. Nakyo kyiwekyeri usanja, na igoe lyiwelyiyekyie wuye yakyo.

³⁹ Yesu kagamba, “Wutenyi ho igoe-lyo.” Marita, mshikyi o ulya alepfa, kammbia, “Mndumii, naiṙaa wulalu; kyipfa ammba mnying'a mfiri ina.”

⁴⁰ Yesu kammbia, “Inyi ngyilekuwia kye koiṙikyia nochiwona mng'ano o Ruwa?”

⁴¹ Kyasia wakawuta ho igoe lyilya. Yesu kaambuya wuye, kagamba, “Awu, ngakuana cha kyipfa nongyiaṙanyia.

⁴² Na inyi ngyilemanya kye uyoe nokyengyiaṙanyia mfiri yoose, kyaindi kyipfa kya wandu-wa waisanzia iha ngyilegamba ishi, kundu waiṙime iiṙikyia kye nyi iyoe ulengyiṙuma.”

⁴³ Na oe amgambe isho, kalaga na ṟui lying'anyi, “Lasaro nnjo na kunu nja!”

⁴⁴ Ulya awepfiie kafumia nja, ampfungye sanda maṙende na mawoko, na kyaam kyakye kyikyipfungye na kyitambaa. Na Yesu kawawia “Mpfunguonyi, mumlekye nayende.”

Kyikweena Kyewaaga Yesu

⁴⁵ Kyasia Wayuda wafoi kyiiṙi kya walya walecha na ko Maria, na iwona shilya alewuta, wakamwiṙikyia.

⁴⁶ Kyaindi wengyi wakayenda ko Mafarisayo, wakawawia shilya Yesu alewuta.

⁴⁷ Kyasia wang'anyi wa makohanyi na Mafarisayo wakalaga wandu na mengyenyi, wakagamba, “Ny'kyikyi luiwuta? Kyipfa mndu-chu naiwuta shindo shifoi sha maṟiyisho.

⁴⁸ Lukomṙa kuṙi kuṙi, wandu woose wemwiṙikyia; na Waroma weecha walusokye handu haṙu hamwi na uruka loṙu.”

⁴⁹ Mndu umwi, kyiiṙi kyawo, Kayafa, awekyeri Mkohanyi ang'anyi kuta woose maka ulya, kawawia, “Nyoe muichi kyindo kyoose-pfo;

⁵⁰ maa mukusaṟa kye kyiwaṟi mndu umwi ipfa kyipfa kya wandu, kundu uruka loose lularumare-pfo.”

⁵¹ Na oe aleṙeṙa kuṙo echigamba mbonyi tsakye amonyi-pfo; indi kyipfa awei Mkohanyi ang'anyi kuta woose maka ulya, naleonguo shisuku kye Yesu nechipfa kyipfa kya uruka lulya.

⁵² Maa chi kyipfa kya uruka-lo tupu-pfo; kyaindi hamwi na isho nasanie wana woose wa Ruwa wanyanyaṟikyie; kundu wawe wamwi.

⁵³ Kyasia wookyia mfiri-cho walewika kyikweena kyemmbaaga.

⁵⁴ Koikyo Yesu aleyenda-se handu hoose kyiiṙi kya Wayuda orio mndu echimmbona-pfo; indi nalewuka urukyenyi lo Wayuda, kayenda kufuhi na nuka ingyiumu suwaa ilawoṙe maa mṟinga, mṟasa mṟi okyelago Efraimu; kakaa pfo hamwi na wanalosho wakye.

⁵⁵ Na Pasaka ya Wayuda iwekyeri kufuhi, na wandu wafoi wakawuka maṙemenyi wakaṙo iyenda Yerusalemu, mfiri o Pasaka ulandeshikye, kundu wawute kyilya kyechiwailyiṟa kyimṟumoe mesonyi ga Ruwa.

⁵⁶ Kyasia wakapfula Yesu, wakawesana kunu wagoṟokyi hekalunyi, wechigamba, “Muwonyi kuṙa? Aicha na kunu mṟumoenyi-pfoe?”

⁵⁷ Na wang'anyi wa makohanyi na Mafarisayo walekowagamba kye mndu kamanya handu akyeri, naende mbonyi, kundu waiṙime immbaṙa.