Yakobo 4 - Kivunjo New Testament 1999

Ikunda Wuyana

¹ Shiṙa nyi kwi shiwuka, na ngapano tsikyeri konyu nyi kwi tsiwukyie? Chi kunu langonyi tsanyu tsekyeende shiṙa shiwungonyi shanyu-pfoe?

² Muilanga maa muwoṙe kyindo-pfo; muiwaaga na inyeng'a, maa mochiiṙima iwona-pfo. Muiende shiṙa na ikapana, maa muwoṙe kyindo-pfo kyipfa muiterewa-pfo.

³ Muiterewa mulawone cha kyipfa muiterewa uwicho, kundu muṟunde nasho ko lango tsanyu.

⁴ Lanyoe waṟui, muichi kye iwaṙa mbuya na wuyana nyi iwaṙa kyituwa na Ruwa-pfoe? Kyasia orio mndu akundi iwaṙa mbuya na wuyana nekyewa nawaṙa kyituwa na Ruwa.

⁵ Ang'u mokusaṟa kye shiṟeio shiṙeṙa wulya? Mumuyo-cho ekyekaa mrimenyi koṙu chi nekyelulanga mṟasa iluwaṙia wunyeng'i-pfoe?

⁶ Kyaindi nekyelutarama soe isaṟia lyiengyeṟikyie; koikyo nekyegamba, “Ruwa nekyewingana na walya wekyekuṙosa, indi nekyeenenga isaṟia wekyekutitiṟa.”

⁷ Kyasia indienyi Ruwa. Legenyi Satana, na oe nemṙicha.

⁸ Tikyirenyi ko Ruwa, na oe netikyira kufuhi na nyoe. Sanjenyi mawoko ganyu kyimṟumoe, nyoe wanyamaṟi, na isanja mrima yanyu nyoe wakulembecheṟi.

⁹ Sokyionyi nyi fowa na ikapa ṟanyi na ifiiṟa. Iseka lyanyu lyiilachikye lyiwe ikapa ṟanyi, na ichihiyo lyanyu lyiilachikye lyiwe iwihiyo.

¹⁰ Kutitiṟenyi ushangunyi lo Ruwa kyiyeri muiterewa na oe nemuenenga kyiṟumi.

Ulaanduye Oṙoo

¹¹ Wana wa wama, maa mulairiane wongo. Moiria mono-wamae wongo, ang'u ianduya mono-wamae, nekyeiria wongo na ianduya uwawaso. Kyaindi koanduya uwawaso, noṙa iindia na iwooka ianduya.

¹² Nyi Ruwa amonyi tikyi ekyewika uwawaso na nyi oe moanduya wandu. Nyi oe echiiṙima ikyiṟa na irumatsa. Iyoe nyi wui uianduya mndu ungyi?

Ulakushele

¹³ Kyasia-ng'u, nyoe mokyegamba, “Inu ang'u ngama luiṙa na mṟinyi mlyiwe na ikaa pfo maka umwi, na ikapa mbucha na iwona kyiira;”

¹⁴ kyaindi muichi kyindo kyiwutika ngama-pfo. Moo onyu nyi kyikyi? Nyoe nyi kyimwi na mtsu okyewono kyiyeri kyifuhi, numa ulawono-se.

¹⁵ Kyiwechia igamba, “Mndumii kakunda, lulandepfe lochiwika kuṙi ang'u kuṙi.”

¹⁶ Kyaindi wulalu muikuiring'isha makushelonyi ganyu. Ikushela lya mbaṟe-i iyi nyi lyiwicho.

¹⁷ Kyasia ulya aichi iwuta mecha, indi alawute kuṙo, icho nanyamaṟia Ruwa.