Waroma 9 - Kivunjo New Testament 1999

Wandu Ruwa Asambuṟie

¹ Ngyiṙeṙa loi kyiiṙi kya Kristo, ngyiṙeṙa wongo-pfo, mrima oko ongyiṟingyishia Mumuyonyi Mweele,

² kye ngyiwoṙo nyi fowa ing'anyi na mawawio galekyesia mrimenyi koko.

³ Kyipfa ngyiweiṙima iterewa inyi ngyimonyi iseso nyi Ruwa na iletsano na Kristo kyipfa kya wana wa wama wako, kyishari kyako kyimmbiu.

⁴ Iwo wakyeri Waisiraelyi wawoṙe kulya ilago nyi wana, na kyiṟumi kyilya; na shiteṟio, na ienengo uwawaso, na iindia na iterewa Ruwa, na shaasa shakye.

⁵ Iwo wakyeri wachuku wa waku, na kyiiṙi kya iwo kulewuka Kristo kui mbaṟe ya mmbiu. Nyi oe akyeri wuye ya shindo shoose, Ruwa, ekyeano shiyeri shoose. Amen.

⁶ Chi kye Ṙeṙo lya Ruwa lyailachika-pfo. Kyipfa wandu Ruwa asambuṟie chi Waisiraelyi tikyi-pfo.

⁷ Maa wailago wana kyipfa kya ilyi wakyeri wa ushari lo Abrahamu-pfo, indi, “Kyiiṙi kya Isakyi ushari lopfo lochilago.”

⁸ Kyimwi na igamba chi wana wa mmbiu wai wana wa Ruwa-pfo, indi wana wa kyaasa kyilya wekyetalo kye nyi wa ushari.

⁹ Cha kyipfa mbonyi tsa kyaasa nyi itsi: “Kyiyeri cha ikyi ngyechicha, na Sara nekoamwenengo mana.”

¹⁰ Maa chi wuṙo tikyi-pfo, indi Rebeka na oe, amwire mana kui mii umwi, na oe nyi Isakyi, awu oṙu,

¹¹ (kyipfa walandefeo wana walya, maa walandewute kyindo kyicha ang'u kyiwicho, kundu kyindo Ruwa akundi kui isambuṟa kyigoṟokye, chi kyipfa kya mawuto-pfo, indi kyipfa kya kyilya ulya ailaga akundi),

¹² nalewio kuṙi: “Ang'anyi nechiṟundia mtutu.”

¹³ Chandu kyikyiṟeie, “Ngakunda Yakobo, indi Esau ngamsuo.”

¹⁴ Kyasia lugambe kyikyi-ng'u? Kuwoṙe wuwicho ko Ruwa? Ote!

¹⁵ Kyipfa naiwia Mose, “Ngyehooṟia ulya ngemhooṟia; ngyesaṟia ulya ngyemsaria.”

¹⁶ Kyasia, kokooya nyi wuṙo, chi wuiṙiminyi wo ulya akundi, maa wo ulya aikapa mteeṟa-pfo; indi wo Ruwa ulya aihooṟia.

¹⁷ Kyipfa shiṟeio shagamba kya Farao kye, “Ngyilekugoṟotsa kyipfa kya ikyi, kundu ngyiloṟe pfinya tsako kopfo, rina lyako lyiongoyo urukyenyi koose.”

¹⁸ Kyasia, kokooya nyi wuṙo, akunda imhooṟia nekyemhooṟia, na akunda imwenenga mrima muumu nekyemgaluo muumu.

Nyashi ya Ruwa na Ihooṟia Lyakye

¹⁹ Kyasia, nongyiwia, “Ny'kyilyi Ruwa aiengyeṟa igamba kye luwoṙe tewe? Cha kyipfa nyi wui ekyewingana na kyilya oe akundi?”

²⁰ Ote! Chi wuṙo-pfo, iyoe mndu. Iyoe nyi wui uigaluo Ruwa? Ngyesa kyindo kyigumbe kyiwie ulya alekyigumba, “Ny'kyilyi ongyigumba kuṙi?”

²¹ Ang'u moachikyia shinungu ngyesa achilyie teri, kui ṙombo lyimwi lya teri iachikyia kyindo kyimwi kyiwaṙe kyiṟumi na kyingyi kyilawoṙe kyiṟumi-pfoe?

²² Kyasia ny' kyikyi-ng'u, kokooya Ruwa kui ikunda iloṟa nyashi yakye, na iṟingyishia wuiṙimi wokye, kui ikarishia lying'anyi, naleṙuana na walya wawewaṟi inyamaṟo nyi nyashi ya Ruwa.

²³ Lyingyi-se, kundu naṟingyishie wung'anyi wo kyiṟumi kyakye kui shindo shilya sha isaṟia, aleshiachikyia wookyia kacha shiwaṙe kyiṟumi.

²⁴ Nyi soe-ng'u alelulaga. Chi wandu wai Wayuda tikyi-pfo, indi na wandu walai Wayuda taa.

²⁵ Nyi chandu awegambie ipfo ko Hosea, “Ngyelaga wandu wako walya walakyeri wandu wako, na mkunde oko ulya alakyeri mkunde oko,

²⁶ Lyingyi-se kyechiwa handu halya walewio, nyoe chi wandu wako-pfo, iho welago wana wa Ruwa ai na moo.”

²⁷ Yesaya na oe naiṙeṙa kya Isiraelyi, echigamba, “Itala lya wana wa Isiraelyi, maa chandu lyikyeri cha mlelya o ipalyipalyi, nyi matsugaṟo gawo tikyi gechikyiṟo.

²⁸ Kyipfa Mndumii kulawoṙe iṙetsa kyiyeri nechianduya wandu woose wa Wuyana, echimarisa na iṙumbuo.”

²⁹ “Lyingyi-se chandu Yesaya alesonguo iṙeṙa, ‘Kokooya Mndumii o ngyuulyimalyi alaleluṙeeya ushari, luwewa cha Sodoma, luwechifananyisho na Gomora.’ ”

Ndumi Ngyicha nyi ko Wandu wa Isiraelyi Taa

³⁰ Kyasia lugambe kyikyi-ng'u? Kye wandu walaiṙikyie Ruwa, walekyeosha wusumganyi; walewona wusumganyi; kyaindi nyi wusumganyi wulya wukyeri wo iiṙikyia.

³¹ Indi Isiraelyi wechiosha iwawaso lya wusumganyi walewona iwawaso lyilya-pfo.

³² Kyipfa kya kyikyi? Kyipfa walelyiosha kui njia ya iiṙikyia-pfo, indi cha ilyi kye nyi kui njia ya mawuto. Wakakapa tuulyia halya igoenyi lyekyeenenga wandu ikapa ṙende,

³³ chandu kyileṟeio, “Ngyiwika Sion igoe lyekyeenenga wandu ikapa ṙende na iṟaṟa lyekyeolotsa. Na orio echimwiṙikyia echirigo nyi sonu-pfo.”