Waroma 3 - Kivunjo New Testament 1999

¹ Kyasia Myuda nawoṙe-kyi kya ngoseṟa? Na iṙino lyiwoṙe kyiiṙa kyiha?

² Lyiwoṙe kyiiṙa ngoseṟa ko njia tsoose. Kya kuwooka nyi kyipfa wawaenengye ulogo lo Ruwa.

³ Nyi kyikyi-ng'u, kokooya wandu waata walaleiṙikyia? Aa ilega iiṙikyia lyawo lyechiilacha shilya Ruwa ateṟie?

⁴ Maa ale; kundu Ruwa nawono nyi o loi, na orio mndu nyi o wongo; chandu kyikyiṟeie, “Kundu umanyikye kye nuwoṙe wusumganyi maṙeṙonyi gapfo, undewinga kyiyeri kya ianduyo.”

⁵ Kyaindi kokooya wuwicho woṙu wuṟingyishia wusumganyi wo Ruwa, lugambe kyikyi? Ruwa nyi mmbicho aiende nyashi? (Ngyigamba kui mbaṟe ya kyimndu.)

⁶ Ote! Kyipfa iho Ruwa neiṙima kuṙa ianduya wuyana?

⁷ Kyaindi kokooya loi ya Ruwa yaengyeṟa iṟingyishia mng'ano okye kyipfa kya iṙeṙa wongo lyako, ny' kyilyi inyi ngyiengyeṟa ianduyo kye ngyimnyamaṟi?

⁸ Kyitewe ny' kyi lulagambe (chandu luleirio, na chandu wengyi waigamba na pfinya kye kyi wuṙo luigamba), luwute shiwicho kundu kuche mecha? Ruwa nechiwaolotsia ngapo chandu wawaṟi iwutio.

Kuwoṙe Mndu Msumganyi-pfo

⁹ Kyasia ny' kyikyi-ng'u? Lukyeri wecha kuta wengyi? Ote! Maa ale. Cha kyipfa lomshitakyi Wayuda na Wakyiṟikyi kye wawachilyie nyi wunyamaṟi taa.

¹⁰ Chandu kyikyiṟeie kye, “Kuwoṙe msumganyi maa umwi-pfo.

¹¹ Kuwoṙe aichi-pfo, kuwoṙe aipfula Ruwa-pfo.

¹² Woose waṙekyie, kuwoṙe aiwuta mecha-pfo, ote! Maa umwi.

¹³ Uṟoo lowo nyi kyilome kyilakyishikyie, kui ngyuulumi tsawo walewika ngyeṟo wekyeṙeṙa shindo shikyeri cha uṟoi lo njoka.

¹⁴ Maṙumbu gawo gaichuo seso ngyiwicho.

¹⁵ Maṙende gawo gaipfuṟukana iwaaga wandu.

¹⁶ Wunyamaṟi na ikapa kawi shikyeri njienyi tsawo.

¹⁷ Maa njia ya ufoṟo waleimanya-pfo.

¹⁸ Maa wakuloshie iowuo na ikunda Ruwa-pfo.”

¹⁹ Kyasia luichi kye mbonyi tsoose uwawaso lugambie ko walya wawachilyie nyi uwawaso, kundu orio mndu nawio natsie, na wuyana woose wuchilyio nyi ianduyo lya Ruwa.

²⁰ Kyipfa kuwoṙe mndu oose echitalo kye namsumganyi mbele yakye kui iwuta shilya mawawaso gakundi-pfo, kyipfa mawawaso gekyeenenga mndu imanya wunyamaṟi.

Iiṙikyio nyi Ruwa kui Iiṙikyia

²¹ Kyaindi wulalu, wusumganyi wo Ruwa womanyika kulawoṙe mawawaso. Wuṟingyishio kui uwawaso na malosho ga weonguo shisuku.

²² Nyi wusumganyi wo Ruwa wukyeri kui njia ya iiṙikyia kyiiṙi kya Yesu Kristo ko woose waiṙikyie. Kyipfa kuwoṙe kya mbaṟe ingyi-pfo.

²³ Kyipfa woose wawutie sha wunyamaṟi na mng'ano o Ruwa otitia kowo.

²⁴ Waitalyio wusumganyi walaitaa kyindo kui isaṟia lyakye, kui njia ya wukyiṟo wukyeri kyiiṙi kya Kristo Yesu.

²⁵ Ichu Ruwa amwummbikye nawe kyisanza kui njia ya iiṙikyia samunyi yakye, kundu naloṟe wusumganyi wokye, kyipfa kya ilekyia wusimirinyi wo Ruwa maṙeko goose galesonguo iwuto.

²⁶ Naiṙime iloṟa wusumganyi wokye kyiyeri-kyi, kundu nawe msumganyi na momtalyia wusumganyi icho aiṙikyie Yesu.

²⁷ Kyasia ikushela nyi kwi lyikyeri-ng'u? Lyashingyio nja. Kui iwawaso lya mbaṟe iha? Kui iwawaso lya mawuto? Ote! Indi kui iwawaso lya iiṙikyia.

²⁸ Kyasia, luwonyi kye mndu nekyetalyio wusumganyi kui iiṙikyia kulawoṙe iwuta shilya mawawaso gakundi.

²⁹ Aa ngyesa Ruwa nyi Ruwa o Wayuda tupu? Chi Ruwa o wandu walakyeri Wayuda taa-pfoe? Yee, nyi Ruwa o walakyeri Wayuda taa.

³⁰ Kokooya loi Ruwa nyi umwi, echitalyia wusumganyi walya wawaṙine iiṙikyienyi, na walya walawaṙine nechiwatalyia wusumganyi kui njia ya iiṙikyia-lyo ilyo.

³¹ Kyasia, ngyesa luilacha mawawaso kui iiṙikyia-lyo? Ote! Cha kyipfa luindia mawawaso chandu gawaṟi iindio.