Waroma 2 - Kivunjo New Testament 1999

Ruwa Nekyeanduya Wandu Woose

¹ Koikyo, iyoe mndu uianduya oṙoo uwoṙe kyegamba-pfo. Kyipfa isho uanduya ungyi nukuanduya kumonyi kye nunyamaṟie; kyipfa iyoe uianduya nuiwuta shilya shilya.

² Na soe luichi kye ianduyo lyiwukyie ko Ruwa nyi lya sungusinyi ko iwo wekyewuta isho.

³ Iyoe mndu, okyeanduya walya wekyeṟunda isho na iwuta isho isho kumonyi, nokusaṟa nochiiṙima iṙicha ianduyo lyiwukyie ko Ruwa?

⁴ Ang'u nuimina wucha wokye wufoi na wusimiri wokye na ikarishia lyakye, ulamanye kye wucha wo Ruwa wukukuruo uiṙime iṙumbuya wunyamaṟi?

⁵ Indi kyipfa kya wuumu wopfo, na kui mrima opfo ulawoṙe iṙumbuya wunyamaṟi, nuiengeṟa nyashi ya Ruwa kopfo mfiri ulya o nyashi ya Ruwa na iloṟo lya chandu Ruwa ekyeanduya kulawoṙe ikundia.

⁶ Echitaa orio mndu iṙuana na mawuto gakye.

⁷ Walya kui wusimiri kyiiṙi kya iwuta mecha waipfula mng'ano na kyiṟumi na ikaa ho mlungana, wechienengo moo o mlungana.

⁸ Na walya wawoṙe wuṟiingyi, walekyeindia wuloi, indi wakaiṙikyiana na mbaka, wewona nyashi na isuo lying'anyi;

⁹ matuuro na wukyiwa wuye ya orio mndu ekyewuta mawicho, Myuda kuwooka na Mkyiṟikyi taa.

¹⁰ Indi mng'ano na kyiṟumi na ufoṟo ko orio mndu ekyewuta shicha, Myuda kuwooka na Mkyiṟikyi taa;

¹¹ kyipfa kuwoṙe ikundia ko Ruwa-pfo.

¹² Kyipfa iwo woose walenyamaṟa kulawoṙe mawawaso weṙeka kulawoṙe mawawaso, na woose walemyamaṟa waichi mawawaso, weanduyo kui mawawaso.

¹³ Kyipfa chi woose wekyeicho mawawaso wai wasumganyi mbele ya Ruwa-pfo, indi nyi walya wekyewuta kyilya mawawaso gakundi wechitalyio wusumganyi.

¹⁴ Kyipfa ilyi wandu wa Masanga walawoṙe mawawaso wekyewuta kui mkaṟo yawo shilya shikyeri uwawasonyi, walawoṙe mawawaso wakuenenga mawawaso wawenyi.

¹⁵ Iwo wailoṟa iṟunda lya uwawaso luluṟeie mrimenyi kowo na kyilya kyikyeri mrimenyi kowo kyechiwaṟingyishia, na makusaṟo gawo gawenyi gechiloṟa kye wawawicho ang'u wawawicho-pfo,

¹⁶ mfiri ulya Ruwa echianduya makusaṟo ga kyiṟika ga wandu, iṙuana na Ndumi-i Ngyicha ya Kristo Yesu ngyilemuongoya.

Wayuda Mawawasonyi ga Mose

¹⁷ Kyaindi iyoe, kokooya nuilago Myuda na ikusuria uwawaso, na ikushela kyiiṙi kya Ruwa,

¹⁸ na imanya kyilya akundi, na iiṙikyia mbonyi ngyicha, na iyoe numloshe mawawasonyi,

¹⁹ na imanya loi kye iyoe kumonyi nyi msongoru o shipfupfuṟe, ngyeela ya iwo wakyeri meemenyi,

²⁰ mlosha o matondo, na wana wanangu, awoṙe wuṟango na wuloi uwawasonyi;

²¹ kyasia iyoe uilosha ungyi, okulosha kumonyi-pfoe? Iyoe uionguo kye mndu alaiwe, nuiiwa kumonyi?

²² Iyoe ugamba mndu alaṟuguye ang'u alaṟuguyo, nuiṟuguya ang'u iṟuguyo kumonyi? Iyoe nusuuye mafano ga waruwa na kunu nuikugaluo mnjama kui iiwa mahekalunyi ga waruwa?

²³ Iyoe okyekushelyia mawawaso, nokyefunjia Ruwa kyiṟumi kyakye kui ifunja uwawaso?

²⁴ Kyipfa rina lya Ruwa lyilahio wandunyi walaiṙikyie Ruwa kyipfa kyanyu, chandu kyikyiṟeie.

²⁵ Kyipfa iṙino lyiwoṙe kyiira kokooya ui mndu okyewuta kyilya mawawaso gakundi. Kyaindi kowa mofunja mawawaso iṙino lyapfo lyawa cha ilyi ulamṙine.

²⁶ Kyasia kokooya icho alamṙine nekyeosha shilya uwawaso luwawasie, ngyesa iṙa iṙino lyakye lyechitalo cha nyi iṙino-pfoe?

²⁷ Na icho alamṙine wookyia kuwooka, ekyeosha kyilya uwawaso lukundi, echikuanduya iyoe umṙine, konyamaṟa uwawaso-pfoe?

²⁸ Kyipfa oe chi Myuda ai Myuda kyanja tupu-pfo, maa iṙino chi lyilya lya kyanja tupu mmbiunyi-pfo.

²⁹ Indi oe nyi Myuda ai Myuda o mrimenyi; na iṙino nyi lya mrima, Mumuyonyi o Ruwa, chi shiṟeionyi-pfo. Uwawaso-lo kyiṟumi kyalo kyilekyewuka ko wandu indi ko Ruwa.