Waroma 16 - Kivunjo New Testament 1999

Iiṟikyiṟa Wandu wa Orio Mbaṟe

¹ Ngyimanyisha konyu mshikyi oṙu Foibe; akyeri mṟundi siṟinyi ya Kyenkrea.

² Mwambilyienyi kyiiṙi kya Mndumii, chandu kyiwaṟi wandu wa Ruwa mumwenengye orio kyindo kyoose echikunda konyu; cha kyipfa oe nataramie wandu wafoi, kawengyitarama na inyi taa.

³ Ngyiiṟikyiṟienyi Pirisikyila na Akyila, wandu wai waṟundi hamwi na inyi kyiiṙi kya Kristo Yesu,

⁴ wawekuṟeyeṟie maa iwoogo kyipfa kyako. Iwo ngyiwaana, maa chi inyi tikyi-pfo, indi na siṟi tsa wandu woose walakyeri Wayuda taa. Ngyiiṟikyiṟienyi na siṟi ikyeri numbenyi kowo.

⁵ Ngyiiṟikyiṟienyi Epaineto, mkunde oko, aleambilyia Yesu kulya Asia.

⁶ Ngyiiṟikyiṟienyi Maria, ulya alekulyisa wukyiwa mnu kyipfa kyanyu.

⁷ Ngyiiṟikyiṟienyi Andironiko na Yunia, washari wako, walepfungo hamwi na inyi, wandu waichio kyiiṙi kya wasu; nawo walengyisongoya inyi iwa Wakristiano.

⁸ Ngyiiṟikyiṟienyi Ampilyiato, mkunde oko kyiiṙi kya Mndumii.

⁹ Ngyiiṟikyiṟienyi Urubano, mndu aiṟunda hamwi na inyi kyiiṙi kya Kristo, na Stakyisi, mkunde oko.

¹⁰ Ngyiiṟikyiṟienyi Apele, amwiṙikyie kyiiṙi kya Kristo. Ngyiiṟikyiṟienyi wandu wa kanyi ko Aristobulo.

¹¹ Ngyiiṟikyiṟienyi Herodioni, ushari loko. Ngyiiṟikyiṟienyi wandu wa kanyi ko Narikyiso, wai kyiiṙi kya Mndumii.

¹² Ngyiiṟikyiṟienyi Turufaina na Turufosa, wawoṙe wuragari kyiiṙi kya Mndumii. Ngyiiṟikyiṟienyi Perisisi, mkunde alewika wuragari mnu kyiiṙi kya Mndumii.

¹³ Ngyiiṟikyiṟienyi Ṟufo, msambuṟe kyiiṙi kya Mndumii, na wamae akyeri nyi wama oko taa.

¹⁴ Ngyiiṟikyiṟienyi Asinkoito, Filekoni, Herime, Patiroba, Herima, na wana wa wama wakyeri hamwi nawo.

¹⁵ Ngyiiṟikyiṟienyi Filoloko na Yulyia, Nerea na mshikyi okye; na Olyimpa, na wandu wa Ruwa woose wakyeri hamwi nawo.

¹⁶ Iṟikyiṟanenyi nyoe wenyi ko wenyi chandu wandu waiṙikyie Yesu wekyeiṟikyiṟana. Siṟi tsoose tsa Kristo tsamuiṟikyiṟa.

Malosho Gefurumia

¹⁷ Wana wa wama wako, ngyimuterewa ambuyenyi walya wawoṙe wuṟiingyi na mbonyi tseolotsa wengyi kui malosho galaṙuṙanyi na shilya mulekulosha. Kushowenyi nawo.

¹⁸ Kyipfa wandu wa mbaṟe-yo waiṟundia Mndumii oṙu Yesu Kristo-pfo, indi nyi ndewu tsawo wawenyi; na kui maṙeṙo ga wulembi na maṙeṙo gekuloṟa kye wawecha kundu wakundo, wailemba wandu wanyotsu.

¹⁹ Kyipfa wuindi wonyu wuleshika ko wandu woose. Kyasia ngyimchihiye kyipfa kyanyu, kyaindi ngyikundi nyoe muwaṙe wuṟango shindonyi shicha na iwa matondo shindonyi shiwicho.

²⁰ Na Ruwa o ufoṟo nechirumatsa Satana wanda ya maṙende ganyu iwinyi. Isaṟia lya Mndumii oṙu Yesu Kristo lyikae hamwi na nyoe [Amen.]

²¹ Timoteo, mṟundi hamwi na inyi, namuiṟikyiṟa, na Lukyio, na Yason, na Sasipatiro, washari wako.

²² Inyi Teritio, ngyileṟeia paruo-i, ngamuiṟikyiṟa kyiiṙi kya Mndumii.

²³ Gayo, ulya alengyiambilyia na ngyikyeri kokye hamwi na Siṟi yoose taa wamuiṟikyiṟa. Erasto, moambilyia heleri tsa mṟi, na Kwarito mono-wama oṙu, wamuiṟikyiṟa. [

²⁴ Isaṟia lya Mndumii oṙu Yesu Kristo lyikae hamwi na nyoe moose. Amen.]

Kyiterewo Kyeṟumisha Ruwa

²⁵ Wulalu naṟumisho ulya echiiṙima imukarisha, iṙuana na Ndumi Ngyicha ngyileonguo kya wucha wo Yesu Kristo, kyilyingananyi na kyilya kyiwekuṟiikyie wookyia kyiyeri kyileshi kyileiṙa. Wulalu Ruwa nashukuo

²⁶ na pata kui shiṟeio sha weonguo shisuku, kyikamanyika ko masanga goose chandu Ruwa o mlungana alegamba, kundu waindie Iiṙikyia.

²⁷ Nyi oe Ruwa, kulawoṙe ungyi awoṙe wuṟango cha oe. Kyiṟumi nyi kyakye kui Yesu Kristo, mlungana na mlungana. Amen.