Waroma 12 - Kivunjo New Testament 1999

Ikaa Iṟundenyi lya Ruwa

¹ Kyasia, wana wa wama wako, ngyimuterewa, kui ihooṟia lya Ruwa, wutenyi mmbiu yanyu iwe kyiṙaso kyiwoṙe moo, kyiele, kyechihiṟa Ruwa, ilyi nyilyo iindia na iterewa Ruwa lyilyicha na lya loi.

² Maa mulaoshe mbaṟe ya wuyana-wu; indi mugalukye kundu Ruwa naiṙime igaluo makusaṟo ganyu. Iho nyi lyo-ndu moiṙima imanya kyilya Ruwa akundi, imanya kyilya kyii kyicha, kyemchihiṟa na kyikyiafutsie.

³ Cha kyipfa kui isaṟia ngyileenengo ngyiwia orio mndu akyeri konyu alakusurie kyindo kya ngoseṟa kuta chandu awaṟi ikusuria; indi nawaṙe meena chandu Ruwa agawie orio mndu meena o iiṙikyia.

⁴ Kyipfa chandu mmbiunyi umwi luwoṙe shiwungo shifoi, maa shiwungo shoose shekyeṟunda iṟunda lyimwi-pfo;

⁵ na wuṙo na soe chandu lukyeri wafoi lukyeri mmbiu umwi kyiiṙi kya Kristo, na shiwungo, orio umwi ko oṙoe.

⁶ Kyasia cha kyipfa luwoṙe shisumbo sha orio mndu mbaṟe yakye, iṙuana na chandu luleenengo isaṟia; kokooya nyi ionguo shisuku, luonguo shisuku iṙuana na iiṙikyia.

⁷ Kokooya nyi maṟunda lukae maṟundenyi gaṙu. Molosha, kyiiṙi kya ilosha lyakye;

⁸ motutuma, kyiiṙi kya itutuma lyakye; motarama oṙoe, kui mrima mkyesi; mogoṟokyia, kui wuragari; mosaṟia, kui sia.

⁹ Ikunda lyilawaṙe wukulembecheṟi. Suonyi kyikyeri kyiwicho, oshanenyi na kyikyeri kyicha.

¹⁰ Kui ikunda lya mono-wama, mukundane nyoe wenyi ko wenyi; kui kyiṟumi mochisongoṟa woṙianyu.

¹¹ Kui wuragari, chi waṙoko-pfo, muwoṙe wuragari mrimenyi konyu; mochiṟundia Ruwa.

¹² Kui ikusuria, mochichihiyo; fowenyi, mochiweṙelyia; kyiiṙi kya iterewa, kyiyeri kyoose.

¹³ Mochitarama wandu wa Ruwa shilya wakundi; kui iambilyia wayenu, mochipfuṟukana.

¹⁴ Wikyienyi mboṟa walya waimsuiṟa; wikyienyi mboṟa, maa mulasese.

¹⁵ Chihiyonyi hamwi na iwo waichihiyo; fiiṟenyi hamwi na walya waifiiṟa.

¹⁶ Muiṙikyiane shilya mukusurie nyoe wenyi ko wenyi. Maa mulakusurie shindo shing'anyi, indi muiṙikyie iwinisho nyi mbonyi tsifofo. Maa mulakushelyie wuṟango.

¹⁷ Maa mulatae mndu wuwicho ko wuwicho. Ṟundenyi shindo shicha mbele ya wandu woose.

¹⁸ Kokooya kyechiwa, ko ura lonyu, mukae ufoṟonyi na wandu woose.

¹⁹ Wakunde, maa mulatae kyiṟaache, indi seiyenyi nyashi ya Ruwa; kyipfa kyikyiṟeie, “Kyiṟaache nyi kyako inyi; inyi ngyetaa,” Mndumii nagamba.

²⁰ Kyaindi, mokyituwa opfo awoṙo nyi njaa, mwenengye kyelya; amwangari, mwenengye kyindo kyenyo; kyipfa kowuta kuṙo, nowika makaa ga moṙo mṙoenyi kokye.

²¹ Wuwicho wulakuwingye, indi uwingye wuwicho kui wucha.