Waroma 11 - Kivunjo New Testament 1999

Ihooṟia lya Ruwa ko Isiraelyi

¹ Kyasia, ngyiwesa, ngyesa Ruwa naletsindikyia wandu wakye kuleshi? Ote! Kyipfa maa inyi nyi mndu o Isiraelyi, umwi o washari wa Abrahamu, mndu o mbaṟe ya Benyamen.

² Ruwa aletsindikyia wandu wakye kuleshi awewaichi wookyia mawookyionyi-pfo. Ang'u muichi kyilya kyileṙeṙo nyi shiṟeio ko mbonyi tsa Elyiya-pfoe? Chandu aishitakyi Waisiraelyi mbele ya Ruwa.

³ “Mndumii, wawaaga weonguo shisuku wapfo, wanyamaṟa alyitaṟe tsapfo, na inyi ngaṙio ngyimonyi, nawo waingyipfula wangyiwaage.”

⁴ Indi Ruwa nalemgaluo kuṙa? “Ngyiwoṙe wandu shiku mfungaaṙe walekyepfiria ndi mbele ya Baalyi.”

⁵ Kyasia na wuṙo kyiyeri-kyi kya wulalu, kuwoṙe mtsugaṟo o wandu wasambuṟe kui isaṟia.

⁶ Kyaindi kokooya nyi kui isaṟia, kyewa-se kui mawuto-pfo, ang'u iho isaṟia lyiwechiwa-se isaṟia-pfo.

⁷ Kyasia kyawa kuṙa-ng'u? Kyindo kyilya Isiraelyi aweikyipfula alekyiwona-pfo, indi walya walesambuṟo walekyiwona, na wengyi waleming'a.

⁸ Chandu kyiwekyiṟeie, Ruwa nalewaenenga mrima mlemeri, mṟasa maa maṙwi galaicho, mṟasa inu.

⁹ Na Dawidi naigamba, “Shelya shawo shiwe mṙego o wawaṙa, waolokye na ianduyo

¹⁰ Meso gawo gawiko meema walaiṙime iwona moongo yawo ilemekye shiyeri shoose.”

¹¹ Kyasia ngyiwesa, ngyesa walekapa ṙende mṟasa waolokye piu? Ote! Kyaindi kui ṙeko lyawo wukyiṟo wuleafukyia ko walya walaiṙikyie Ruwa, kundu wo wawenyi wawoṙo nyi wunyeng'i.

¹² Kyasia, kokooya ṙeko lyawo lyawa nyi wunjama wo wuyana, na wufofo wowo wo kyimrima wuleende mboṟa ing'anyi ko wandu wa masanga wengyi, ngyesa kyechiwa ngoseṟa iafutsia lyawo-pfoe?

Ikyiṟo lya Wandu Walakyeri Wayuda

¹³ Kyaindi ngyiṙeṙa na nyoe, mui wandu walakyeri Wayuda. Kyasia, chandu ngyikyeri msu o wandu walakyeri Wayuda, ngyiṟumisha iṟunda lyako.

¹⁴ Kofia ngyeiṙima iwaenenga wunyenyi wandu wa samu yako ngyimonyi na ikyiṟa wandu waata.

¹⁵ Kyipfa kokooya iwiyitso lyawo lyileende kyisanza kya wuyana na Ruwa, ngyesa iiṙikyio lyawo lyechiwa-kyi sile nyi moo ko walya walempfa?

¹⁶ Lyingyi-se kokooya kyifunjoe kyikyienengye Ruwa, na wuṙo mkate oose; na itsinde lyikawa nyi lya Ruwa, na wuṙo maa mbaga tsalyo.

¹⁷ Kyaindi kokooya mbaga tsingyi tsilemanyo, na iyoe mseituni o nguṙunyi nuleṙongo kyiiṙi kyatso, kowa mbumbu imwi ya ikyiṙi lya mseituni na wucha wolyo,

¹⁸ maa ulakushele kyiiṙi kya mbaga tsilya, ang'u kokooya nukushela, chi iyoe uṙuṙe itsinde-pfo, indi nyi itsinde lyikuṙuṙe iyoe.

¹⁹ Kyasia nogamba, mbaga tsilya tsilemanyo kundu ngyipario ho inyi.

²⁰ Nyi kyicha. Galemanyo kyipfa kya ilemo iiṙikyia lyawo; na iyoe nugoṟokyi kui iiṙikyia lyapfo. Maa ulakushele, indi uowuo.

²¹ Cha kyipfa kokooya Ruwa alalelekyia mbaga tsa kuwooka, maa ekulekyia iyoe-pfo.

²² Kyasia, ambuya-ng'u, wucha na wulang'a wo Ruwa; ko walya waolokyie wulang'a; indi kopfo iyoe wucha wo Ruwa, kokaa kyiiṙi kya wucha-wo; sile nyi wuṙo, iyoe taa nowiyitso kuleshi.

²³ Na iwo taa, wakaṙa wufofo wowo wo iiṙikyia, wechiṙongo, cha kyipfa Ruwa neiṙima iwaṙonga-se.

²⁴ Cha kyipfa kokooya iyoe nulemanyo kowuto mseituninyi, ukyeri mseituni o nguṙunyi wookyia mawookyionyi, numa koṙongo mbaṟe ingyi, mseituninyi ui mcha; chi ngoseṟa walya wakyeri mseituni mcha wookyia mawookyionyi iiṙima iṙongo mseituninyi owo wawenyi-pfoe?

Ikyiṟo lya Isiraelyi

²⁵ Cha kyipfa wana wa wama wako, ngyikundi mulamanye wuṟikyi-wu-pfo, kundu mulachekusaṟa kye mulawaṟango; kye wuumu wo Waisiraelyi nyi kundu masanga gengyi gamanye Ruwa.

²⁶ Koikyo Waisiraelyi woose wechikyiṟo; chandu kyikyiṟeie, “Mkyiṟa nechicha awuka Sion, neletsana Yakobo na washituwa wakye.

²⁷ Na ikyi nyikyo kyiteṟio kyako nawo, llyi ngyechiwahooṟia ngyuunyamaṟi tsawo.”

²⁸ Kyasia ko mbonyi tsa Ndumi Ngyicha walewa washituwa kyipfa kyanyu; indi kyipfa kya isambuṟo walewa nyi wakunde kyipfa kya waku waṙu.

²⁹ Cha kyipfa shisumbo sha Ruwa shiwoṙe isumkyia-pfo, maa ilago lyasho.

³⁰ Kyipfa kokooya chandu nyoe kacha mulelega Ruwa, kyaindi wulalu mulewona isaṟia kui ilega lyawo;

³¹ na wuṙo maa wo walelega wulalu, kundu kui nyoe isaṟio nawo wasaṟio.

³² Kyipfa Ruwa nalewawika handu hamwi woose kyiiṙi kya ilega kundu nawasaṟie woose.

Ruwa Naṟumisho

³³ Chandu wunjama na wuṟango na imanya lya Ruwa shikyeri, ianduya lyakye lyekyemanyika-pfo, maa njia tsakye tsechiwa isoruo-soruo-pfo!

³⁴ Kyipfa nyi wui aichi kyindo Mndumii akusaṟie? Ang'u nyi wui alemmba mlosha okye?

³⁵ Ang'u nyi wui alemwenenga kyindo kuwooka, na oe namtae-se?

³⁶ Cha kyipfa shindo shoose shiwukyie kokye, shikyeri pfo kui pfinya tsakye; lyingyi-se shiwuya na kokye. Kyiṟumi nyi kyakye shiyeri shoose. Amen.