Wakolosai 4 - Kivunjo New Testament 1999

¹ Nyoe wandumii, enengyenyi watumo wanyu kyikyeri kya sungusinyi na kya wuloi, muichi kye maa nyoe muwoṙe Mndumii ruwewu.

Paulo kawia Wakolosai kyindo Kyewuta

² Mfiri yoose terewenyi, mochilaa kyiṙombo kyiterewonyi na iana.

³ Mochiluterewia na soe taa, kye Ruwa nalupfunguye moongo kui Ṙeṙo lyilya lyakye, luonguo wuṟikyi wo Kristo, ngyimpfungye kyipfa kya wuṟikyi-wo,

⁴ kundu ngyiwuloṟe na pata, chandu kyingyiwaṟi iṙeṙa.

⁵ Kaenyi kui wuṟango mbele ya iwo walaiṙikyie Yesu, mochiambuya mndu alaṙetse kyiyeri.

⁶ Maṙeṙo ganyu gawaṙe wuindi mfiri yoose, gai mecha, muiṙime imanya chandu kyimmbaṟi igaluo orio mndu.

Shiiṟikyiṟo Shefurumia

⁷ Tikyiko, mono-wama mkunde, mṟundi ekyeapfutsia kyilya ateṟia, mongari oko kyiiṙi kya Mndumii, nemuongoya mbonyi tsako tsoose.

⁸ Icho ngamṙuma konyu kyipfa kya kyindo-kyo ikyo, kundu mumanye mbonyi tsaṙu, na oe nammbiyiṟie moo mrima yanyu.

⁹ Hamwi na Onesimo, mono-wama mkunde ekyeafutsia shilya ateṟia, akyeri mndu o konyu. Iwo wemuongoya mbonyi tsoose tsa iha koṙu.

¹⁰ Arisitariko, ampfungye hamwi na inyi, namuiṟikyiṟa; na Mariko, washiṙie o Barinaba, icho muleambilyia mawawaso kui mbonyi tsakye; kashika konyu mwambilyienyi.

¹¹ Na Yesu ekyelago Yusto; iwa nyi Wakristiano wa Kyiyuda. Lyingyi-se iwo nyiwo wawenyi waiṟunda hamwi na inyi kyipfa kya Wumangyi wo Ruwa; nawo walengyiwiyiṟia moo.

¹² Epafura, akyeri mndu o konyu, mṟundi o Yesu Kristo, namuiṟikyiṟa, echipfuṟukana mfiri yoose kyipfa kyanyu shiterewonyi shakye, kundu kye mugoṟokye muafutsie iiṙikyia na iṟingyishio mnu shindonyi shoose Ruwa akundi.

¹³ Kyipfa ngyimṟingyishia kye nawoṙe wuragari wung'anyi kyipfa kyanyu, na kyipfa kya iwo wakyeri Laodikyia, na kyipfa kya iwo wakyeri Hierapolyi.

¹⁴ Luka mganga ulya mkunde, na Dema, wamuiṟikyiṟa.

¹⁵ Iṟikyiṟenyi wana wa wama wakyeri Laodikyia, na Nimfa, na Siṟi ikyeri numbenyi yakye.

¹⁶ Paruo-i ikamsomo konyu wonenyi kye yasomo siṟinyi ya Walaodikyia taa; na iya ya Laodikyia isomo nyi nyoe.

¹⁷ Wienyi Arikyipo, “Ringa mnu iṟunda lyilya uleenengo kyiiṙi kya Mndumii, kundu ulyiafutsie.”

¹⁸ Kyiiṟikyiṟo kyako inyi Paulo, ngaṟeia ngyimonyi. Kumbuonyi ipfungo lyako. Isaṟia lyikae hamwi na nyoe.