Wakolosai 3 - Kivunjo New Testament 1999

¹ Kyasia, mukyeri kye muleṟutso hamwi na Kristo, pfulenyi shindo shikyeri ruwewu, kundu Kristo akyeri, naṙamie kuwoko ko kulyoe ko Ruwa.

² Kusaṟenyi shikyeri wuye, chi shikyeri urukyenyi-pfo.

³ Cha kyipfa mulepfa, na moo onyu umṟikye hamwi na Kristo kyiiṙi kya Ruwa.

⁴ Ilyi Kristo echiloṟo na pata, akyeri moo oṙu, nyi lyo-ndu na nyoe mochiloṟo hamwi na oe mng'anonyi.

Mchumie o Kacha na o Wulalu

⁵ Kyasia, lekanenyi na shindo wandu wa wuyana wawoṙe: wuṟui, ukoe, lango ngyiwicho, makusaṟo mawicho, na ilanga iwaṙa sha ngoseṟa, nyiwo wuyendelyi wo iindia mafano.

⁶ Kyipfa kya shindo-sho nyashi ya Ruwa yekyeolokyia walya walekyemwindia.

⁷ Kyiiṙi kya isho maa nyoe taa mulewuta kyiyeri kya kacha, kyiyeri shilemuchilyia.

⁸ Kyaindi wulalu wikyienyi kuleshi na nyoe ishi shoose: nyashi, na isuo lying'anyi, na uwicho, na shilahio, na maṙeṙo ga wusutsu ṙumbunyi konyu.

⁹ Maa mulawiane wongo, cha kyipfa moṙa nakamwi mkaṟo o kacha, hamwi na mawuto gacho,

¹⁰ mochiṟaa mkaṟo mhya. Ikyi nyikyo kyindo kyihya Ruwa ulya alekyigumba aikyigumba orio mfiri kui mfano okye, kundu namuenengye pfinya ya immanya nakamwi.

¹¹ Iho kuwoṙe Mkyiṟikyi maa Myuda-pfo, iṙino maa iṙa iṙino-pfo, muyenu maa tondo, mtumo maa ulya alakyeri mtumo-pfo, indi Kristo nyi shoose, na kyiiṙi kya shoose.

¹² Kyasia, kyipfa mommbe wasambuṟe wa Ruwa, wandu wa Ruwa wakunde, ṟaenyi mrima o isaṟia, mkaṟo mcha, wupfereri, wuhoo, ikarishia.

¹³ Mochiṙuana na ihooṟiana, mndu awoṙe kyimaṙuma kyesuuya oṙoe, chandu Mndumii alemuhooṟia nyoe, nyi wuṙo na nyoe.

¹⁴ Ngoseṟa ya isho shoose waṙenyi ikunda, lyikyeri nyilyo lyaafutsia iiṙikyia.

¹⁵ Na ufoṟo lo Kristo luloṟe kyilya kyiwaṟi mrimenyi konyu, nyikyo mulelagio mmbiunyi umwi; lyingyi-se muwe wandu wekyeana.

¹⁶ Ṙeṙo lya Kristo lyiingyikye mrimenyi konyu na wuṟangonyi woose, mochiloshana na itutumana kui shiimbo, na shiimbo shetembecheṟa mrima; kunu mochiimbia Ruwa kui iana mrimenyi konyu.

¹⁷ Na orio kyindo mochiwuta, kui ṙeṙo ang'u kui iṟunda, wutenyi shoose rinenyi lya Mndumii Yesu, mochiana Ruwa Awu kui oe.

Malosho ga Wunumba

¹⁸ Nyoe waka, indienyi wamii wanyu, chandu kyichihiṟie kyiiṙi kya Mndumii.

¹⁹ Nyoe wasoṟo, kundenyi waka wanyu maa mulawihiyo kyipfa kyawo.

²⁰ Nyoe wana, indienyi wafee wanyu shindonyi shoose, kyipfa kyindo-kyi kyichihiṟie kyiiṙi kya Mndumii.

²¹ Nyoe waawu, mulasouoe wana wanyu, walachepfiiyo nyi mṙoe.

²² Nyoe watumo, indienyi iwo wakyeri kye kui mmbiu nyi wandumii wanyu, mbonyinyi tsoose. Chi kui wutumo wo meso, cha waikulembecheṟa ko wandu-pfo, indi kui mrima ukutitiṟie, mochiindia Mndumii.

²³ Kyoose mochiwuta, wutenyi kui mrima, cha iṟundia Mndumii, maa chi cha iwutia wandu-pfo,

²⁴ muichi kye moambilyia ko Mndumii wori wo kyioṟa. Muiṟundia Mndumii Kristo.

²⁵ Kyipfa molya mbaka netoo wori wo ilya mbaka, maa kuwoṙe ikundia-pfo.