Wakolosai 1 - Kivunjo New Testament 1999

¹ Inyi Paulo, ngyikyeri msu o Kristo Yesu, chandu Ruwa akundi, na Timoteo, mono-wama oṙu,

² ngamuṟeia paruo nyoe wana wa wama wai wandu wa Ruwa, waafutsie kyilya Ruwa ateṟie kyiiṙi kya Kristo, wakyeri Kolosai. Isaṟia lyikae konyu, na ufoṟo, shiwukyie ko Ruwa Awu oṙu.

Kyiterewo Kyeana

³ Luiana Ruwa, Awu o Mndumii oṙu Yesu Kristo, mfiri yoose lochimuterewia,

⁴ wookyia luleicho mbonyi tsa iiṙikyia lyanyu kyiiṙi kya Kristo Yesu, na ikunda muwoṙe ko wandu wa Ruwa woose.

⁵ Kyipfa kya ikusuria mulewikyio kyiseyesoe ruwewu; muleicho mbonyi tsalyo kacha ko mbonyi tsa loi tsa Ndumi Ngyicha;

⁶ ileshika konyu, chandu kyikyeri wuyanenyi koose; na ikumbia ndunda na ing'ana, chandu ing'ana konyu taa, wookyia mfiri ulya muleicho mukomanya mnu isaṟia lya Ruwa kyiiṙi kya loi.

⁷ Chandu mulelosho na Epafura, mongari oṙu mkunde iṟundenyi, akyeri mṟundi ekyeafutsia kyilya Ruwa ateṟie ko Kristo kyipfa kyanyu;

⁸ na oe naleluongoya ikunda lyanyu Mumuyonyi.

⁹ Kyipfa kya ikyo maa soe, wookyia mfiri ulya luleicho, luwika shiterewo kyipfa kyanyu, kundu muichuṟio imanya lya mrimenyi ko ikunda lyakye wuṟangonyi woose na imanyisho lya mrimenyi.

¹⁰ Mukae chandu Mndumii akundi, mochimchihiṟa piu; mochikumbia ndunda kui orio iṟunda lyicha, na iengyeṟika wuṟangonyi wo Ruwa.

¹¹ Mochitaramo kui wuiṙimi woose, iṙuana na pfinya ya mng'ano okye, muiṙime iwaṙa wusimiri wo orio mbaṟe na ikarishia hamwi na ichihiyo.

¹² Mochiana Awu, alemuenenga iambilyia kyitumbuṟe kya kyioṟa kya wandu wa Ruwa ngyeelenyi.

¹³ Na oe nalelukyiṟa iwuka pfinyenyi tsa meema, kalusamiṟa na iluṙuo Wumangyinyi wo Mana o ikunda lyakye;

¹⁴ akyeri kye kyiiṙi kyakye luwoṙe wukyiṟo, nyi kyimwi na igamba kye, ihooṟio lya wunyamaṟi.

Kristo na Iṟunda Lyakye

¹⁵ Kristo nyi mfano o Ruwa alekyewono, mmbele o shindo shoose shishigumbe.

¹⁶ Cha kyipfa kyiiṙi kyakye shindo shoose shilegumbo; shikyeri ruwewu na shikyeri urukyenyi, shekyewono na shilekyewono; kokooya nyi shiṙi sha mng'ano, ang'u wumangyi, ang'u wuchilyi; shindo shoose shilegumbo kui njia yakye na kyipfa kyakye.

¹⁷ Na oe nawekyeri pfo kyiyeri shindo shoose shilawendegumbo, na shindo shoose shekyewaṙana kyiiṙi kyakye.

¹⁸ Na oe nyi oe mṙoe o mmbiu, o Siṟi; na oe nyi mawookyionyi, nyi o kuwooka iṟutso ko wapfu, kundu nawe msongoru kyiiṙi kya shoose.

¹⁹ Cha kyipfa kyilechihiṟa iafutsio lya Ruwa lyoose lyikae kyiiṙi kya Kristo.

²⁰ Na kyiiṙi kyakye isanza shindo shoose na oe amonyi, amwende ufoṟo kui samu ya msalaba okye; kokooya nyi shindo shikyeri urukyenyi, ang'u shikyeri ruwewu.

²¹ Na nyoe muwekyeri ipfo mawookyionyi kuleshi na Ruwa, lyingyi-se washituwa wakye makusaṟonyi ganyu, kui mawuto ganyu mawicho, namusanza wulalu;

²² mmbiunyi o nyama yakye, kui ipfa lyakye, kundu namuende na mbele yakye, nyoe wandu wa Ruwa, mulawoṙe maṙeko maa italyio kyindo kyiwicho.

²³ Mukokuwaṙa na isaṟia lyilya tikyi, muwawikye wuye ya urende, mukokarisho; mulandeilacho na iṙa ikusuria lya Ndumi Ngyicha muleicho mbonyi tsayo, ileongoyo ko shindo shoose shigumbe shikyeri wuyanenyi, ikyeri kye inyi Paulo ngyiwekyeri mṟundi oyo.

Maṟunda ga Paulo cha Mṟundi o Siṟi

²⁴ Wulalu ngyimchihiye kyipfa kya matuuro ngyiwoṙe kyipfa kyanyu. Lyingyi-se ngyiafutsia mmbiunyi koko shilya shilaleafutsio sha matuuro ga Kristo, kyipfa kya mmbiu okye, kyimwi na igamba kye nyi Siṟi yakye.

²⁵ Siṟi inyi ngyikyeri mṟundi oyo, iṙuana na iṟunda lya Ruwa, alengyiṙambika, na ngyileenengo kyipfa kya kyiira kyanyu, ngyiafutsie Ṙeṙo lya Ruwa.

²⁶ Wuṟikyi wulya wuwewuṟikye shiyeri shoose sha kacha na wookyia shishari shoose, indi wulalu woloṟo ko wandu wa Ruwa.

²⁷ Iwo Ruwa alekunda iwamanyisha chandu wukyeri wunjana wo mng'ano wo wuṟikyi-wu kyiiṙi kya walya walaiṙikyie Ruwa nawo nyi Kristo mrimenyi konyu, ikusuria lya mng'ano.

²⁸ Icho luionguo mbonyi tsakye, lochiikyimbia orio mndu, na ilosha orio mndu wuṟangonyi woose, luiṙime iende orio mndu aafutsie iiṙikyia kyiiṙi kya Kristo.

²⁹ Na inyi ngyikuwinisha kui kyindo-kyo ikyo, ngyechipfuṟukana iṙuana na pfinya ing'anyi iwukyie ko Kristo, ekyeṟunda kyiiṙi kyako.