Wafilyipi 6 - Kivunjo New Testament 1999

Wana na Wafee Wawo

¹ Lanyoe wana, indienyi wafee wanyu kyiiṙi kya Mndumii, kyipfa iwu nyiwo wusumganyi.

² India awuyo na womoo. Iwawaso-lyi nyilyo iwawaso lya kuwooka lyiwoṙe kyaasa,

³ uwone ona, ukae mfiri ifoi wuyanenyi.

⁴ Na nyoe waawu, maa mulasouoe wana wanyu; indi waṙosenyi kyiiṙi kya iowuo na iindia Mndumii.

Watumo na Wandumii Wawo

⁵ Nyoe watumo, indienyi iwo wai wandumii wanyu kui mbaṟe ya mmbiu, kui wuowu na iṙeṙema, kui ikutitiṟa mrimenyi, cha iindia Kristo.

⁶ Maa chi kui wutumo wo meso tikyi cha waikukomba ko wandu-pfo; indi cha watumo wa Kristo, mowuta shechihiṟa Ruwa kui mrima.

⁷ Kui ikusuria lyicha cha iṟundia Mndumii maa chi mndu-pfo.

⁸ Mochimanya kye orio kyindo kyicha mndu echiwuta neenengo ikyo ikyo nyi Mndumii, kokooya nyi mtumo ang'u ote.

⁹ Na nyoe wandumii wawutienyi wo isho isho, mochiṙa iwaowesha, kunu mochimanya kye oe akyeri Mndumii owo na onyu nakyeri ruwewu, maa kokye kuwoṙe ikundia-pfo.

Shiṙa sha Kyimrima

¹⁰ Mafurumionyi, engyeṟenyi iwaṙa wukari kyiiṙi kya Mndumii na wuiṙiminyi wo pfinya tsakye.

¹¹ Ṟaenyi shisha shoose sha Ruwa, muiṙime iwingana na ngyeṟo tsa Satana.

¹² Kyipfa ikapana lyaṙu soe chi na wandu-pfo; indi nyi na ngyuumangyi na pfinya, na wang'anyi wa meema-chu, nguulyimalyi tsa waṟufui wawicho wuyanenyi wo waṟufui.

¹³ Kyipfa kya ikyo irenyi shisha shoose sha Ruwa, muiṙime iwingana mfiri ya mawicho na mukommarisa shoose, igoṟoka.

¹⁴ Kyasia goṟokyenyi, mukuinewie loi shitsinyi, na iṟaa wusumganyi kyipootenyi,

¹⁵ na iwa wandu wakuṟeyeṟie iyenda ionguo Ndumi Ngyicha ya ufoṟo.

¹⁶ Ngoseṟa ya shoose mochiambilyia ngawo ya iiṙikyia, iya kui iyo mochiiṙima irumisha mfi yoose ya moṙo ya mmbicho ulya.

¹⁷ Lyingyi-se ambilyienyi wukyiṟo wukyeri cha kofia yanyu ya menya, na Ṙeṙo lya Ruwa cha ushu muenengo nyi Mumuyo.

¹⁸ Kui shiterewo shoose mochiterewa orio kyiyeri Mumuyonyi, mochilaa kyiṙombo kyipfa kya kyindo-kyo, mochiterewia wandu wa Ruwa woose;

¹⁹ na kyipfa kyako taa, ngyienengo pfinya yeonguo kundu ngyiiṙime iloṟa wandu kyiṟika kyilya kya Ndumi Ngyicha.

²⁰ Ndumi Ngyicha iya kyipfa kyayo inyi ngyiṙeṙa handu ha Kristo maa chandu ngyimpfungye, ngyiwaṙe wuṟango na wukari wo ionguo chandu kyingyiwaṟi ionguo.

Kyiiṟikyiṟo Kyefurumia

²¹ Kyasia kundu nyoe muiṙime imanya mbonyi tsako, Tikyiko, mono-wama mkunde, aiṟunda na soe, akyeri msimiri kyiiṙi kya Mndumii, nemumanyisha shindo shoose.

²² Ulya ngyimṙuma konyu kyipfa kya ikyo muiṙime imanya mbonyi tsaṙu, na oe nawiyiṟie mrima yanyu moo.

²³ Ufoṟo lukae na wana wa wama waiṙikyie Yesu, na ikunda, hamwi na iiṙikyia, shiwukyie ko Ruwa Awu na ko Mndumii Yesu Kristo.

²⁴ Isaṟia lyikae na woose wakundi Mndumii oṙu Yesu Kristo kui njia ilawoṙe inyamaṟika.