Wafilyipi 5 - Kivunjo New Testament 1999

Ikaa Ngyeelenyi

¹ Koikyo oshenyi Ruwa, cha wana wakunde.

² Muchumie ikundenyi, chandu na Kristo alemukunda nyoe, lyingyi-se kareka moo okye kyipfa kyaṙu, kyiano na kyiṙaso ko Ruwa, iwa mpfaamo o kyindo kyekyepfaama necha.

³ Kyaindi wuṟui wulawono konyu maa ale, maa ukoe loose, maa ilanga, chandu kyiwaṟi wandu wa Ruwa.

⁴ Maa sonu, maa maṙeṙo ga wutondo, maa ngaruo; isho shekyechihiṟa-pfo; indi nanga iana.

⁵ Kyipfa mbonyi-tsi mutsiichi necha, kye kuwoṙe mṟui maa mndu o wuilala wo wolyi, maa mndu awoṙe wulanga, nyi oe moindia ifano, awoṙe kyioṟa Wumangyinyi wo Kristo na Ruwa-pfo.

⁶ Mndu alamulembe kui maṙeṙo galawoṙe kyiira; cha kyipfa, kyipfa kya ikyo nyashi ya Ruwa yekyeolokyia wana wa wunyamaṟi.

⁷ Kyasia mulakae handu hamwi nawo.

⁸ Cha kyipfa kacha nyoe muwekyeri meema, indi wulalu mowa ngyeela kyiiṙi kya Mndumii. Wutenyi cha wana wa ngyeela;

⁹ kyipfa ndunda ya ngyeela nyi wuchenyi woose na wusumganyinyi na loi;

¹⁰ mochipfuṟukana ikulosha nyi kyikyi kyekyechihiṟa Mndumii.

¹¹ Mulakae handu hamwi na wandu wawoṙe mawuto ga meema galawoṙe ndunda, indi mugaṙeṙie.

¹² Kyipfa isho shiwutika kowo kui kyiṟika, nyi sonu maa ishigamba.

¹³ Kyaindi shoose shishiṙeṙie shekyeloṟo nyi ngyeela; kyipfa orio kyindo kyikyiloṟe nyi ngyeela.

¹⁴ Koikyo shiṟeio shagamba, “Amka, iyoe uirengyera, uṟukye ko wapfu, na Kristo nekulyimikyia.”

¹⁵ Kyasia ambuyenyi necha chandu muiwuta; chi cha wandu walawaṟango-pfo indi cha wandu waṟango.

¹⁶ Mochiwuta necha mfiri-i cha kyipfa shiyeri-shi sha wulalu nyi sha mawicho.

¹⁷ Kyipfa kya ikyo mulawe matondo, indi mumanye ny'kyikyi Mndumii akundi.

¹⁸ Lyingyi-se mulanango mpfinyo, kyipfa wuwoṙe mbonyi tsa ukoe, indi muichuṟo nyi Mumuyo.

¹⁹ Ṙeṙenyi kui shiimbo shetembecheṟa mrima. Imbienyi Mndumii na ianga mrimenyi konyu;

²⁰ na iana Ruwa Awu mfiri yoose kyipfa kya shindo shoose, rinenyi lya Mndumii oṙu Yesu Kristo;

²¹ orio mndu echiṟundia oṙoe necha kyiiṙi kya iindia Kristo.

Waka na Wamii

²² Lanyoe waka, indienyi wamii wanyu cha iindia Mndumii oṙu.

²³ Cha kyipfa mii nyi mṙoe o mka, chandu Kristo na oe nyi mṙoe o Siṟi; na oe nyi mkyiṟa o mmbiu.

²⁴ Kyaindi chandu Siṟi yekyeindia Kristo, nyi wuṙo waka nawo waindie wamii wawo shindonyi shoose.

²⁵ Lanyoe wasoṟo, kundenyi waka wanyu, chandu Kristo na oe alekunda Siṟi, kareka moo okye kyipfa kyayo;

²⁶ kundu nailyishe Siṟi na iisanja kui mṟinga Ṙeṙonyi.

²⁷ Naiṙime ikuenenga oe amonyi Siṟi iwoṙe kyiṟumi ilawoṙe ṙeko ang'u kyindo kyoose kyiwicho, indi iwe ngyiele ilawoṙe maṙeko.

²⁸ Wuṙo wuṙo wasoṟo kyawakooya ikunda waka wawo cha mmbiu yawo wawenyi. Akunda mka nakukunda amonyi.

²⁹ Kyipfa kuwoṙe mndu asuuye mmbiu okye handu hoose-pfo; indi nekyeuenenga kyelya na iuambuya necha, chandu Kristo na oe aiwutia Siṟi.

³⁰ Kyipfa soe lukyeri shiwungo sha mmbiu okye.

³¹ Kyipfa kya ikyo mndu nechiṙa awuye na wamae, naoshane na mka okye, na iwo wewawi wechiwa mmbiu umwi.

³² Wuṟikyi-wu wung'anyi; indi inyi ngyiṙeṙa mbonyi tsa Kristo na Siṟi.

³³ Kyaindi orio mndu nakunde mka okye chandu akukundi amonyi, maa mka alaṙe iindia mii okye.