Wafilyipi 1 - Kivunjo New Testament 1999

¹ Inyi Paulo, ngyikyeri msu o Kristo Yesu chandu Ruwa akundi, ngaṟeia paruo-i konyu nyoe wandu wa Ruwa wakyeri [Efeso] waiṙikyie Kristo Yesu.

² Isaṟia lyikae konyu na ufoṟo shiwukyie ko Ruwa Awu oṙu na ko Mndumii Yesu Kristo.

Mboṟa tsa Kyimrima kyiiṙi kya Kristo

³ Ruwa naṟumisho, Awu o Mndumii oṙu Yesu Kristo, aleluwikyia mboṟa kui mboṟa tsoose tsa mrimenyi, wuyanenyi wo mumuyo, kyiiṙi kya Kristo.

⁴ Chandu alelusambuṟa kyiiṙi kyakye kyiyeri wuyana wulawendegumbo, kundu luwe wandu wa Ruwa, wandu walawoṙe mti mbele yakye ikundenyi.

⁵ Cha kyipfa nalesonguo ilusambuṟa, kundu nalugaluo wana wakye kui njia ya Yesu Kristo, iṙuana na kyilya akundi.

⁶ Mng'ano o isaṟia lyakye uṟumisho, alelusaṟia kyiiṙi kya icho Mkunde.

⁷ Kyiiṙi kyakye kui samu yakye, luwoṙe wukyiro woṙu, ihooṟio wunyamaṟi, iṙuana na isaṟia lyakye lying'anyi.

⁸ Na oe naleluengyeṟia ikyo wuṟangonyi woose na wunyotsu;

⁹ amluloṟe kyiṟika kya kyilya akundi, iṙuana na kyilya akundi kyiiṙi kya icho.

¹⁰ Nyi kyimwi na igamba kye, iende wusongoru wo kyiyeri kyiafukyie nesanzia handu hamwi shindo shoose kyiiṙi kya Kristo, shindo sha ruwewu na shindo sha wuyanenyi taa. Yee, kyiiṙi kya icho.

¹¹ Na kyiiṙi kyakye soe taa lulewiko kyioṟa, kunu lochisambuṟo wookyia mawookyionyi iṙuana na kyilya oe akundi, ekyewuta shindo shoose iṙuana na kyilya akundi.

¹² Na soe kyiiṙi kya icho luiṙime iwa kyiṟumi kya mng'ano okye, soe lulesonguo iwikyia Kristo ikusuria lyaṙu.

¹³ Na nyoe taa kyiiṙi kya icho momuicho ulogo lo loi, Ndumi Ngyicha ya wukyiṟo wonyu. Lyingyi-se momumwiṙikyia oe, na iwiko fana nyi Mumuyo ulya o kyaasa akyeri Mweele.

¹⁴ Nyi oe akyeri mogoṟokyia kyioṟa kyaṙu, kundu naende wukyiṟo wo Wumangyi wokye, wuwe kyiṟumi na mng'ano okye.

Kyiterewo kya Paulo

¹⁵ Kyipfa kya ikyo maa inyi, wookyia ngyileicho mbonyi tsa iiṙikyia lyanyu kyiiṙi kya Mndumii Yesu, na ikunda lyanyu ko wandu wa Ruwa woose,

¹⁶ ngyekyeṙa iana kyipfa kyanyu-pfo; ngyemukumbuo shiterewonyi shako.

¹⁷ Ruwa o Mndumii oṙu Yesu Kristo, Awu o mng'ano, namuenengye nyoe Mumuyo o wunyotsu na o ishukuyo kui Mumuyo kyiiṙi kya immanya oe.

¹⁸ Ruwa naṟuguo mrima yanyu iiṙime iwona, mumanye ikusuria lya ilaga lyakye chandu lyikyeri; na wusuṟi wo mng'ano wo kyioṟa kyakye wandunyi wa Ruwa chandu wukyeri.

¹⁹ Na wucha wo wung'anyi wo wuiṙimi wokye mrimenyi koṙu luiṙikyie chandu wukyeri; kui iṙuana na iwuta lya pfinya tsa wuiṙimi wokye;

²⁰ alewuta kyiiṙi kya Kristo lyilya alemṟutsa ko wapfu, kammbika kuwoko kokye ko kulyoe ruwewu;

²¹ wuye mnu kuta Wumangyi woose, na wuchilyi na pfinya, na orio rina lyekyesendo, maa chi kunu wuyanenyi tupu-pfo, indi wulya wuicha taa.

²² Kawika shindo shoose wuchilyinyi wo Kristo, kammbika nawe mṙoe wuye ya shindo shoose kyipfa kya Siṟi; ikyeri

²³ nyiyo mmbiu okye, na iafutsia lyakye oe ekyeenenga shindo shoose iafutsio koose.