Waefeso 2 - Kivunjo New Testament 1999

Ikutitiṟa lya Kristo na Wung'anyi Wokye

¹ Kyasia kokooya kuwoṙe iwiyiṟiana moo kyiiṙi kya Kristo, kokooya kuwoṙe ikarishana kui ikunda, kokooya kuwoṙe iwaṙana Mumuyonyi, kokooya kuwoṙe iwoniana wukyiwa,

² ngyienengyenyi sia ing'anyi, kundu muwe na makusaṟo gamwi, wandu muwoṙe ikunda lyimwi, wawoṙe mrima umwi, mochikusaṟa iwuta kyindo kyimwi.

³ Maa mulawute kyindo kyoose kui iwingana ang'u kui makushelo; indi kui wupfereri, orio mndu nawone oṙoe kye nawoṙe kyiira kuta oe.

⁴ Mndu alakuwinishe kyipfa kya shindo shakye amonyi, indi nakuwinishe kyipfa kya shindo sha oṙoe.

⁵ Waṙenyi makusaṟo galya galya Yesu Kristo awewoṙe;

⁶ ulya ipfo mawookyionyi awei Ruwa, kyaindi alalewona kulya iwa kyimwi na Ruwa kye nyi kyindo kyemwenenga ikuyeṟa na Ruwa;

⁷ kyaindi nalekuloṟa kye awoṙe mng'ano oose-pfo, kawa cha mtumo, kafanana na mndu.

⁸ Lyingyi-se, kyiyeri alewono ai cha mndu, nalepfereria, kawaṙa wuindi mṟasa upfunyi, yee, upfu lo msalabenyi.

⁹ Koikyo lyingyi-se Ruwa nalemwiria wuye, kamwenenga Rina lyiiṟie orio rina;

¹⁰ kundu kui iiṙia ko Yesu shindo shoose shipfirie ndi, sha ruwewu, sha wuyanenyi, na sha wanda ya wuyana;

¹¹ na kundu orio mndu nagambe kye YESU KRISTO NYI MNDUMII, kui mng'ano o Ruwa Awu.

Iaka cha Taa Wuyanenyi

¹² Kyasia wakunde wako, chandu mulepfereria mfiri yoose, chi kyiyeri inyi ngyiwekyeri ho tupu-pfo, indi wulalu ngoseṟa mnu ngyilakyeri ho, afutsienyi wukyiṟo wonyu muwenyi kui iowuo na iṙeṙema.

¹³ Cha kyipfa nyi oe Ruwa aiṟunda maṟunda mrimenyi konyu, iambilyia lyanyu na iṟunda lyanyu, kui iafutsia makusaṟo gakye mecha.

¹⁴ Ṟundenyi shindo shoose kulawoṙe inuṟia maa iwingana,

¹⁵ muiṙime iwa wana wa Ruwa walaiwio kye wawawicho, maa walekyelemba, walawoṙe tewe rikyenyi lyilekyeicho, lyilakyeri njienyi ya sungusinyi. Walya kyiiṙi kyawo muwonekanyi cha ilyi mukyeri shimii wuyanenyi,

¹⁶ mochiosha mbonyi tsekyeende moo, ngyiwone kyimaṙuma kya ikushela mfiri ulya Kristo echiwuya, kye ngyileṙicha wulya maa ikuwinisha wulya-pfo.

¹⁷ Yee, maa kokooya ngyechiwoogo na kuṙo ngyiwe cha samu yawuto iwe kyiṙaso kyilya iiṙikyia lyanyu lyekyeenenga Ruwa. Ngachihiyo; lyingyi-se ngachihiyo hamwi na nyoe moose.

¹⁸ Na nyoe wuṙo chihiyonyi; lyingyi-se chihiyonyi hamwi na inyi.

Timoteo na Epafurodito

¹⁹ Kyaindi ngyikusaṟie kyiiṙi kya Yesu Kristo iṙuma Timoteo nache na konyu mfiri ya kufuhi, na inyi ngyiwiyiṟio moo, ngyiichi mbonyi tsanyu.

²⁰ Kyipfa ngyiwoṙe mndu ungyi awoṙe makusaṟo gamwi na inyi, echikuwinisha mnu na nyoe-pfo.

²¹ Kyipfa woose waikuwinisha na mbonyi tsawo wawenyi, chi sha Kristo Yesu-pfo.

²² Kyaindi muichi kyiṟumi kyakye, kye naleṟunda handu hamwi na inyi iṟundenyi lyeonguo Ndumi Ngyicha, cha mana o awu okye.

²³ Kyasia, ngyikusaṟie iṙuma icho iwinyi, kyiyeri-kyo ngyechimanya shindo shechingyiwutikyia.

²⁴ Na inyi ngyiiṙikyie kyiiṙi kya Mndumii kye na inyi ngyechicha mfiri ya kufuhi.

²⁵ Kyaindi ngyilewona kyingyiwaṟi iṙuma Epafurodito konyu, mono-wama oko, alewuka konyu icheṟunda handu hamwi na inyi.

²⁶ Cha kyipfa nalangyie mnu immbona nyoe na nalewihiyo mnu mrimenyi kyiyeri aleicho kye momanya mbonyi tsa ndoṟe yakye.

²⁷ Cha kyipfa naweluoe nakamwi, ai kufuhi na ipfa; kyaindi Ruwa nalemmbonia wukyiwa; maa chi oe amonyi tupu-pfo, indi na inyi taa; ngyilawaṙe ikuinaṙia lyielewetsie.

²⁸ Koikyo ngapfuṟukana mnu imṙuma, kundu ilyi mochimmbona-se muiṙime ichihiyo, na inyi ngyianguhiṟio ikuinaṙia lyako.

²⁹ Kyasia muambilyienyi kyiiṙi kya Mndumii kui sia yoose, mochiwona wandu cha ichu kye nyi wandu wawoṙe rina.

³⁰ Cha Kyipfa kyipfa kya iṟunda lya Kristo nalekyiṟe-pfa; na nalewuta isho shoose kundu ngyienengo kyitarama nyoe mulaleiṙima ingyienenga.