Waebrania 8 - Kivunjo New Testament 1999

Yesu Mkohanyi Oṙu Ang'anyi kuta Woose

¹ Kyasia, kyiiṙi kya isho luionguo, kyindo kying'anyi kuta shoose nyi ikyi, luwoṙe Mkohanyi ang'anyi kuta woose mbaṟe-i, aṙamie kuwoko ko kulyoe ko kyitima kya wuchilyi kya Ruwa Mopfinya.

² Mṟundi o handu haele, na o tengo lyilya lya loi, lyilya Mndumii alelyiwika, maa chi mndu-pfo.

³ Kyipfa orio Mkohanyi ang'anyi kuta woose nekyesambuṟo kundu nawute shiṙaso, kyiwaṟi ichu na oe nawaṙe kyindo kyeṙasa.

⁴ Kokooya awekyeri urukyenyi, awechiwa mkohanyi-pfo; kyipfa kuwoṙe wekyewuta shienengo chandu mawawaso gagambie.

⁵ Wekyeṟundia kyindo kyikyeri cha kyirinje kya ruwewu; chandu Mose alewio nyi Ruwa nawute, kyiyeri awekuṟeyeṟie iwika tengo lyilya; kyipfa nagamba, “Achikyia shindo shoose kui mfano ulya uleloṟo kulya fumvunyi.”

⁶ Kyaindi wulalu nawona iṟunda lyicha ngoseṟa, chandu akyeri mndu aṙuṙe ndago ya mma mcha, Ruwa nagambie kye wandu wakye wechiwona shindo shicha kuta isho.

⁷ Kyipfa kokooya mma ulya o kuwooka ulawewoṙe tewe, mrima ya wandu iwechipfulo nyi ulya o kawi-pfo.

⁸ Kyipfa kyiyeri ekyegamba kye wawoṙe tewe, nekyegamba, “Mfiri iicha, Ruwa nagamba, na inyi ngyechiwika Mma Mhya na wandu wa numba ya Isiraelyi na wandu wa numba ya Yuda.

⁹ Ochiwa mma cha ulya ngyilewika na waku wawo mfiri iya ngyilewateteṟa ngyiwawute urukyenyi lo Misiri-pfo. Cha kyipfa walalekaa mmenyi oko, ngyilekulyisa wukyiwa kyipfa kyawo-pfo.

¹⁰ Kyipfa ichu nyicho mma ngyechiwika na wandu wa Isiraelyi numa ya mfiri iya, Ruwa nagamba, ‘Ngyechiwika mawawaso gako makusaṟonyi gawo, na ngyechigaṟeia mrimenyi kowo. Na inyi ngyechiwa Ruwa kowo, nawo wechiwa wandu wako.’

¹¹ Nawo wechiloshana orio mndu na momṟasa okye-pfo, Maa orio mndu na mono-wamae, echigamba, ‘Manya Mndumii-pfo.’ Cha kyipfa woose wechingyimanya, wookyia mtutu owo mṟasa ang'anyi.

¹² Cha kyipfa ngyechiwahooṟia mawicho gawo, na ngyuunyamaṟi tsawo ngyechitsikumbuo-se-pfo.”

¹³ Kui igamba, “Mma Mhya” nagaluo lyilya lya kuwooka iwa lyiku. Kyaindi kyindo kyawooka ikuo nyi iwuka ho kyii.