Waebrania 7 - Kivunjo New Testament 1999

Mkohanyi Melyikyisedekyi

¹ Cha kyipfa Melyikyisedekyi-cho, mangyi o Salemu, mkohanyi o Ruwa ai wuye ruwewu, nalekarisana na Abrahamu kyiyeri aweiwuya ikapa wamangyi-wo, kammbikyia mboṟa.

² Ulya Abrahamu alemgawia kyifunjoe kya ikumi kya shindo shoose; (rina lyakye lya kuwooka nyi mangyi o wusumganyi, lyingyi-se nyi mangyi o Salemu, kyimwi na igamba, mangyi o ufoṟo.

³ Awoṙe awu-pfo, awoṙe wamae-pfo, awoṙe wafee-pfo, awoṙe kyiyeri alefeo, maa kyiyeri alepfa-pfo, indi namfananyishe na Mono-Ruwa). Icho nyi mkohanyi mṟasa mlungana.

⁴ Kyasia, ambuyenyi chandu mndu-cho aweng'anyi, ulya Abrahamu, mku oṙu ang'anyi, alemwenenga kyifunjoe kya ikumi kya shilya aleende shiṙenyi.

⁵ Na kyiiṙi kya wana wa Lewi nawo, walya wekyeenengo wukohanyi, wawoṙe wuchilyi wo iṙuo kyifunjoe kya ikumi iwuka ko wandu wawo, wana wa wamawo, chandu mawawaso gagambie, maa chandu wakyeri wa kyishari kya Abrahamu.

⁶ Indi oe, ulya kyishari kyakye kyilaletalo kye kyiwukyie kowo, nalewuta kyifunjoe kya ikumi iwuka ko Abrahamu, kammbikyia mboṟa ulya awoṙe kyaasa-kyo.

⁷ Maa kyeiṙima ilego nakamwi kye mtutu nekyewikyio mboṟa nyi ang'anyi-pfo.

⁸ Na makohanyi wekyepfa wekyewuta kyifunjoe kya ikumi; indi iha Melyikyisedekyi ekyeambilyia kyifunjoe kya ikumi ekyepfa-pfo.

⁹ Lyingyi-se kyeiṙima igambo kye, kui njia ya Abrahamu, maa Lewi ekyeambilyia kyifunjoe kya ikumi naleenengyia kyifunjoe kya ikumi;

¹⁰ cha kyipfa alekoafeo kyiyeri-kyo Melyikyisedekyi alekarisana na oe-pfo.

¹¹ Kyasia, kokooya kulawewoṙe wufofo wukohanyinyi wo Lewi; (kyipfa wandu waleenengo mawawaso kyipfa kya wukohanyi-wo), kuwewoṙe-se kyimaṙuma kya kyikyi kuwaṙe mkohanyi ungyi, ai cha Melyikyisedekyi, maa aletalo cha ilyi nai cha Aron?

¹² Kyipfa wukohanyi wulya wukoilachika, kyiwaṟi na mawawaso gailachikye.

¹³ Kyipfa oe mbonyi tsakye tsilegambo kuṙo, nyi-we o wandu wa mbaṟe ingyi, mbaṟe kulawoṙe mndu o mbaṟe-yo aleṟunda alyitaṟenyi.

¹⁴ Kyipfa kyikyeri na pata kye Mndumii oṙu nalewuka kyisharinyi kya Yuda, mbaṟe ya wandu walya Mose alaleonguo kyindo kyawo kyoose ko mbonyi tsa wukohanyi.

Mkohanyi Ungyi, cha Melyikyisedekyi

¹⁵ Lyingyi-se isho luiṙeṙa shikyeri na pata mnu ngoseṟa, kokooya nawoneka mkohanyi ungyi ai cha Melyikyisedekyi;

¹⁶ alakyeri mkohanyi ko mawawaso ga kyimndu, indi kui pfinya tsa moo tsilekyesia.

¹⁷ Kyipfa namṟingyishie kye, “Iyoe nyi mkohanyi mlungana cha Melyikyisedekyi.”

¹⁸ Kyipfa kuwoṙe iilachika lya iwawaso lyilya lyilesonguo, kyipfa kya wufafa wolyo, na iuṟa kyiira lyayo;

¹⁹ (cha kyipfa iwawaso lyilya lyileafutsia kyindo-pfo); na hamwi na isho kulewiko ikusuria lyilyicha ngoseṟa, ikusuria lyekyeluenenga itikyiria Ruwa.

²⁰ Na kyipfa nyamu ilaleuṟika,

²¹ (kyipfa walya walesambuṟo makohanyi kulawoṙe nyamu; indi oe, hamwi na nyamu, kui ulya alemmbia, “Mndumii nalya nyamu maa echiilacha nyamu-yo-pfo, iyoe nyi mkohanyi mlungana.”)

²² Kyasia, iṙuana na wuloi-wu Yesu nawa mloṟi o mma ulya mcha ngoseṟa.

²³ Lyingyi-se walya walesambuṟo makohanyi wafoi, kyipfa waleshingyio nyi upfu walakae ho;

²⁴ indi oe, kyipfa ekyekaa mlungana, nawoṙe wukohanyi wulekyewuka ho.

²⁵ Na oe, kyipfa kya ikyo, neiṙima ikyiṟa nakamwi walya wekyecha na ko Ruwa kui oe; kyipfa nakyeri na moo mfiri yoose kundu nawaterewie.

²⁶ Kyipfa luwewaṟi soe luwaṙe mkohanyi ang'anyi mbaṟe-i akyeri mweele, alawoṙe wuwicho, alawoṙe tewe lyoose, amletsane na walya wekyeṙeko, Ruwa alemwiria wuye ruwewu.

²⁷ Ulya alakundi kyindo orio mfiri, cha makohanyi walya wengyi wang'anyi, kuwooka iwuta kyiṙaso kyipfa kya ngyuunyamaṟi tsakye amonyi, numa ya iho kyipfa kya ngyuunyamaṟi tsa wandu-wo; kyipfa oe nalewuta kuṙo lyimwi, kyiyeri alereka moo okye.

²⁸ Kyipfa uwawaso luwikyie wandu wawoṙe wufafa iwa makohanyi wang'anyi; indi mbonyi-tso tsa nyamu ilecha numa ya uwawaso tsilemsambuṟa iwa Mana aafutsie mlungana na mlungana.