Waebrania 6 - Kivunjo New Testament 1999

¹ Kyipfa kya ikyo, lukoṙa ionguo malosho ga kuwooka ga Kristo, lupfuṟukane lushikye masiionyi ga kyaro. Maa lulaṙeṙe-se mbonyi tsa malosho-go ga kuwooka, lulaiwuta-se shindo shilawoṙe kyiiṙa na iiṙikyia Ruwa,

² na ga malosho ga ngyuupatiso, na iyekyia mawoko, na iṟutso wapfu, na ianduyo lya mlungana.

³ Na isho lochishiwuta Ruwa kaluenenga wuiṙimi wo iwuta kuṙo.

⁴ Cha kyipfa walya walemuenengo ngyeela, na isonja kyisumbo kya ruwewu, na iambilyia ṙombo lya Mumuyo Mweele,

⁵ na isonja mbonyi ngyicha tsa Ruwa, na pfinya tsa shiyeri shiicha,

⁶ wakaṙa iiṙikyia numa ya iho, kyechiiṙimika-se iwagaluo waṙumbuye wunyamaṟi-pfo; cha kyipfa wakapia Mono-Ruwa msalabenyi lya kawi kui mrima yawo, na imriisa sonu na pata.

⁷ Kyipfa uruka lokyenyo mvuo yekyekapa ho kyiyeri kui kyiyeri, na iṙosa maṟa gawoṙe kyiira ko walya galeṙemo kyipfa kyawo, wekyewona mboṟa tsiwukyie ko Ruwa;

⁸ indi uruka-lo lukoṙosa msha na makacha lokyelego na ikyiṟeseso nyi Ruwa na mafurumionyi galo nyi irumatso.

⁹ Kyaindi, wakunde, maa chandu lokyeonguo isho, mbonyinyi tsanyu luleiṙikyia mbonyi ngyicha ngoseṟa, na tsiwoṙe wukyiṟo.

¹⁰ Cha kyipfa Ruwa ammbicho mṟasa nawaṙime iṟunda lyanyu-pfo, na ikunda lyilya mulelyiṟingyishia kui rina lyakye, cha kyipfa muleṟundia wandu wa Ruwa, na mṟasa wulalu muwaṟundia.

¹¹ Na soe lukundi orio umwi onyu naṟingyishie wuragari wulya wulya, mṟasa mafurumionyi;

¹² kundu mulaṙokuoe, indi muwe wandu wekyeosha walya wekyeoṟa shiteṟio kui iiṙikyia na wusimiri.

Kyaasa kya Ruwa kya Loi

¹³ Cha kyipfa Ruwa, kyiyeri aleenenga Abrahamu kyaasa kyipfa alawewoṙe ang'anyi kuta ulya alemlyiia nyamu, nalelya nyamu kui mrima okye,

¹⁴ echigamba, “Ny'kyaloi ngyechikuwikyia mboṟa, na ikupfumbutsa.”

¹⁵ Na kuṙo kui isimiria kawona kyaasa kyilya.

¹⁶ Kyipfa wandu wekyelya nyamu kui ulya akyeri ang'anyi kuta wo; na kowo matsitsionyi ga iwingana kui maṙeṙo nyi nyamu, iloṟa kye maṙeṙo-go nyi ga loi,

¹⁷ kyiiṙi kya mbonyi-tso Ruwa, akundi iloṟa ngoseṟa mnu walya wekyeoṟa kyaasa kyilya, chandu shilya akundi shilechiiṙima iilachika.

¹⁸ Shilya kyiiṙi kyasho Ruwa alechiiṙima iṙeṙa wongo, luwone iwiyiṟio moo lyilalolomie, soe lulalekyelyio iosha na isimiria shilya shilewiko mbele yaṙu.

¹⁹ Lushiwoṙe cha kyindo kyetirimisha mrima ulakupaaye-paye, kyindo kyiwoṙe wuringyi wung'anyi, kyiwoṙe pfinya, na ulya lokyewika ikusuria lyaṙu nyi Yesu, ulya ekyeiṙa nguwonyi yeshingyia ya hekalu lya ruwewu na halya-ndu ha kyiiṙi haele.

²⁰ Handu Yesu aleiṙa naho kyipfa kyaṙu, msongoru oṙu, nawa Mkohanyi ang'anyi kuta woose mṟasa mlungana cha Melyikyisedekyi.