Waebrania 2 - Kivunjo New Testament 1999

Wukyiṟo Wung'anyi

¹ Koikyo kyiluwaṟi iosha nawi shilya luleicho lulacheṙeko.

² Cha kyipfa kokooya kyindo kyilya kyilegambo nyi malaika kyilawelolomie, na orio mndu alemina kyindo-kyo naleanduyo chandu kyiwaṟi,

³ ngyesa soe, loiṙima kuṙa ikyia ianduyo lukomina ulogo-lu lung'anyi kuṙi lo wukyiṟo? Ulogo lulegambo kuwooka nyi Mndumii, naaho lukomanyika koṙu na ko walya waleicho.

⁴ Ruwa na oe echiṟingyishia hamwi nawo kui ṟigo na shiṟiyisho na pfinya tsa mbaṟe tsifoi, na kui igawa shisumbo sha Mumuyo Mweele, chandu alekunda oe amonyi.

Ekyelusongoya Iyenda Wukyiṟonyi

⁵ Kyipfa Ruwa alewika malaika wachilyie uruka lulya luicha na luionguo mbonyi tsalo-pfo, indi mndu umwi naleṟingyishia kuṙi handu halyiwe echigamba,

⁶ “Mndu nyi kyikyi tane omkumbuo? Ang'u mana o mndu mṟasa umwambuye?

⁷ Nulemgumba kawa mtutu kuta malaika, numwenengyie kyiṟumi na mng'ano, nummbikyie wuye ya maṟunda goose.

⁸ Na imgaluo mchilyi o shindo shoose.” Cha kyipfa kyiiṙi kya iwika shindo shoose wuchilyinyi wokye uletsugaṟa kyindo ulalekyiwika wuchilyinyi wokye-pfo. Kyaindi wulalu lulandewone shindo shoose shechiwiko wuchilyinyi wokye-pfo;

⁹ indi lowona ulya alegumbo kawa mtutu kuta malaika, Yesu, kyipfa kya mawawio ga upfu, amwenengye kyiṟumi na mng'ano, kundu kui isaṟia lya Ruwa napfe kyipfa kya orio mndu.

¹⁰ Cha kyipfa kyiwemmbaṟi oe, ulya kyipfa kyakye na kui oe shindo shoose shilegumbo, kundu naenengye wandu wafoi wekyemwosha wuiṙimi wo iwona kyiṟumi kyakye, iafutsia msongoru ang'anyi o wukyiṟo wowo kui njia ya ilya wukyiwa.

¹¹ Kyipfa ulya ekyeilyisha na walya wekyeilyisho woose wawukyie ko mndu umwi. Kyipfa kya ikyo ekyerigo nyi sonu iwalaga wana wa wamae-pfo.

¹² Nekyegamba, “Ngyechionguo mbonyi tsapfo ko wana wa wama wako, siṟinyi ngyechikuṟumisha.”

¹³ Na lyingyi-se, “Ngyechiwa ngyikumsurie oe.” Na lyingyi-se, “Inyi ngyikyeri iha na wana-wa ngyileenengo nyi Ruwa.”

¹⁴ Kyasia, cha kyipfa wana-wa nyi wandu wawoṙe mmbiu na samu, maa oe nalewewa wuṙo, kundu kui njia ya upfu nanyamaṟe ulya awewoṙe pfinya tsa upfu, Mokyiriinzi,

¹⁵ na kui iwuta kuṙo nalekyie walya wawei watumo kyipfa kya iowuo upfu moo yawo yoose.

¹⁶ Kyipfa nyi loi kye ekyetarama malaika-pfo indi nekyetarama walya wa kyishari kya Abrahamu.

¹⁷ Koikyo kyiwemmbaṟi ifananyisho na wana wa wamae shindonyi shoose, naiṙime iwa mkohanyi ang'anyi awoṙe isaṟia, ekyeafutsia kyilya ateṟia iṟundenyi lya Ruwa, nahooṟie wandu wakye ngyuunyamaṟi tsawo.

¹⁸ Na cha kyipfa oe amonyi nalelyiso wukyiwa kyiyeri aleyesho, neiṙima itarama walya wekyeyesho.