Waebrania 13 - Kivunjo New Testament 1999

Chandu Loiṙima Ichihiṟa Ruwa

¹ Ikundana cha wana wa mka lyikae ho.

² Mulawaṙime iambilyia wayenu; kyipfa kui iwuta kuṙo wandu wengyi waleambilyia malaika kulawoṙe imanya.

³ Kumbuonyi walya wakyeri kyipfungonyi cha ilyi muwapfungye hamwi nawo; na iwo wailyiiyo mbaka, chandu na nyoe muilyiiyo mbaka.

⁴ Wandu woose wawone kye wolyi nyi kyindo kyicha, na mii ang'u mka alakuwinishe na wandu wengyi; cha kyipfa waṟui Ruwa nechiwaolotsia ngapo.

⁵ Mulawaṙe mkaṟo o kunda heleri; wenyi cha wandu walauṟie kyindo.

⁶ Cha kyipfa oe amonyi nagambie, “Ruwa nyi oe ekyengyitarama ngyechiowuo-pfo, mndu nechingyiwutia kyi?”

⁷ Kumbuonyi walya wawekyemusongoya, walemuongoya Ṙeṙo lya Ruwa; lyingyi-se, kui iambuya mnu mafurumionyi ga mkaṟo owo, oshenyi iiṙikyia lyawo.

⁸ Yesu Kristo nyi oe ulya, ukou na inu na mṟasa mlungana.

⁹ Maa mulaṟaisho nyi malosho ga mbaṟe tsingyi, na mayenu; kyipfa nyi kyicha mrima ukarisho kui isaṟia, maa chi kui shelya shilya walya waleyenda nasho walalewona kyiira-pfo.

¹⁰ Luwoṙe alyitaṟe walya wekyeṟundia tengo lyilya walawoṙe momu o ilya shindo shayo.

¹¹ Kyipfa shindo shilya samu yasho ileendo nyi Mkohanyi ang'anyi kuta woose na handu haele kyipfa kya wunyamaṟi, kyaindi nyama tsa shindo-sho tsekyeṙasio nja ya handu wandu wekyekaa.

¹² Kyipfa kya ikyo, Yesu na oe, kundu nailyishe wandu kui samu yakye amonyi, nalelyiso wukyiwa nja ya mṟi.

¹³ Kyasia lufume luyende kokye nja ya handu wandu wekyekaa, na imino hamwi na oe.

¹⁴ Kyipfa iha luwoṙe mṟi ochikaa ho mlungana-pfo, indi luipfula mṟi ulya uicha.

¹⁵ Kyasia, kui njia yakye oe, luenengye Ruwa kyiṙaso kya kyiṟumi mlungana, maṙeṙo gaṙu nyi kyienengo kyaṙu.

¹⁶ Kyaindi mulawaṙime iwuta shindo shicha na ikaa handu hamwi; kyipfa shienengo cha isho nyisho shekyechihiṟa Ruwa.

¹⁷ Indienyi walya wekyemusongoya, na iwapfereria; kyipfa wo wekyelaa kyiṙombo kyipfa kya mrima yanyu. Kyipfa wechiwia Ruwa mbonyi tsa wuṟundi wowo, kundu kye wawute kuṙo kui sia maa chi kui fowa-pfo; kyipfa kyiwechimuenenga nyoe kyiira-pfo.

¹⁸ Luterewienyi; kyipfa luiṙikyie kye luwoṙe makusaṟo mecha mrimenyi, lukundi iwaṙa mkaṟo mcha shindonyi shoose.

¹⁹ Na inyi ngyimuterewa ngoseṟa mnu iwuta isho kundu ngyiwiyiṟo na konyu iwinyi.

Kyiterewo Kyefurumia

²⁰ Kyasia, Ruwa o ufoṟo aleende-se iwuka ko wapfu Mlyisi Ang'anyi o moondo, kui samu ya mma o mlungana, oe Mndumii oṙu Yesu,

²¹ namuenengye nyoe iafutsia kyaro orio iṟundenyi lyicha, muiṙime iwuta shilya akundi; na oe echiwuta mrimenyi koṙu kyilya kyichihiṟie mbele yakye, kui Yesu Kristo; kyiṟumi kyikae na oe mlungana na mlungana. Amen.

Maṙeṙo Gefurumia

²² Kyaindi ngyimuterewa, wana wa wama, muaṙanyie necha ulogo-lu lo iikyimbiana; kyipfa ngamuṟeia paruo-i kui maṙeṙo maangu.

²³ Manyenyi kye mono-wama oṙu Timoteo ammbuto kyipfungonyi; ulya, kacha iwinyi, ngyechiwonana na nyoe hamwi na oe.

²⁴ Iṟikyiṟenyi woose wekyemusongoya nyoe, na wandu wa Ruwa woose; iwo wakyeri wa Italyia wamuiṟikyiṟa.

²⁵ Isaṟia lyikae na nyoe moose.