Waebrania 12 - Kivunjo New Testament 1999

Ruwa Awu Oṙu

¹ Kyasia na soe taa, cha kyipfa luwaiṟiwie nyi waṟingyishi wafoi mbaṟe-i, luwikyie mbai orio ṟio lyilemeri, na wunyamaṟi wulya wokyeluwaṙa tapu. Lupfuṟukane kui wusimiri kulya iṟundenyi lyilyiṙambikye koṙu,

² lochiambuya Yesu, ulya ekyewooka na iafutsia iiṙikyia lyaṙu. Ulya alekarishia mawawio ga halya msalabenyi. Kyipfa kya sia iya iweimmbeṙa, alekusaṟa maa ale kya sonu ya iwoogo msalabenyi-pfo. Na wulalu naṙamie kuwokonyi ko kulyoe ko kyiṙi kya mng'ano kya Ruwa.

³ Kusaṟenyi mnu mbonyi tsa ulya alekarishia iwingana lying'anyi mbaṟe-i lya walya wekyewuta sha wunyamaṟi. Koikyo maa mulaiṙikyie iloloma na ipfiiyo nyi mṙoe.

⁴ Mulandekapane shiṙa mṟasa samu ipusuke, mochiwingana na wunyamaṟi-pfo.

⁵ Lyingyi-se mulewaṙima shilya muleikyimbio, shekyeṙeṙa na nyoe cha iṙeṙa na wana, “Mono-ko, ulamine kyiyeri Ruwa akugalutsa mkaṟo yapfo, Maa ulaṙe iaṙanyia kyiyeri oe akuṟoṟoma. Kyipfa ulya Ruwa amkundi nekyemwilacha mkaṟo yakye.

⁶ Na nekyekapa orio mndu amwiṙikyie cha mana.”

⁷ Muwaṟi kyipfa kya iilacho mkaṟo, Ruwa nammbutie nyoe cha wana; kyipfa nyi mana uha awuye alekyemwilacha mkaṟo?

⁸ Kyasia kokooya mulawoṙe iilacho mkaṟo, kukyeri ṙombo lya woose, nyi lyo-ndu mochiwa wana wa nja, maa chi wana wa mka o wolyi-pfo.

⁹ Hamwi na isho luwewoṙe waawu waṙu wa iha wuyanenyi waleluilacha mkaṟo, na soe lukowaindia.

¹⁰ Kyasia chi nanga mnu ikaa wuchilyinyi wo Awu o mrima na iwaṙa moo?

¹¹ Orio ngapo ikyeri kyindo kyekyeende sia-pfo, indi kya fowa; kyaindi kyiyeri kya numa yekyeendie walya wawatoṟishe nyi ngapo-yo ndunda tsa wusumganyi tsiwoṙe ufoṟo.

Chandu Wandu Wechikaa

¹² Koikyo goṟuonyi mawoko gailoloma na ndi tsiluoe tsiṙeṙema,

¹³ muachikyie maṙende ganyu njia tsigoṟotsu, kundu kyindo kyikyeri kyileeta kyilaṙetso, indi kyikyiṟo.

¹⁴ Pfulenyi kui wuragari iwaṙa ufoṟo na wandu woose, na wuele, wulya kulawoṙe mndu echiwona Mndumii alauwoṙe,

¹⁵ mochiambuya mnu mndu alauṟe isaṟia lya Ruwa. Na mndu oose alawe cha iṟa lyekyewawa, namulyise nyoe wukyiwa na ifanyiṟa mkaṟo ya wandu.

¹⁶ Kulawaṙe mndu mṟui maa alaowuye na iindia Ruwa, cha Esau, alekumba kyioṟa kyakye kya mana mmbele kyipfa kya kyelya.

¹⁷ Kyipfa muichi kye maa lyilya kyiyeri kya numa alekunda ioṟa mboṟa nalelego (kyipfa alewona ṙaawa lyeṙumbuya wunyamaṟi-pfo), maa chandu alepfula ṙaawa-lyo kui mcheṟeṟe.

¹⁸ Maa mulekooya fumvu lyeiṙima ipooyo-pfo, lyileaka moṙo, maa ipuchi lya njuu, na meema, na kyiwiṟi,

¹⁹ na ṟui lya iganda na ṟui lya maṙeṙo; galya walya waleicho waleterewa walawio kyindo kyoose kyingyi.

²⁰ Kyipfa waleiṙima ikarishia kyindo kyilya walewio, “Maa indo lya saka lyikapaaya fumvu-lyo lyekapo na magoe.”

²¹ Na isho shilewono chandu shiwekyeri shindo sheowesha, mṟasa Mose kagamba, “Ngawoṙo nyi wuowu na iṙeṙema.”

²² Indi nyoe mukokooya fumvu lya Sion, na mṟi o Ruwa ai na moo, Yerusalemu ya ruwewu, kundu kuwoṙe shiku sha malaika,

²³ kyisanzionyi na siṟi ya wandu wakyeri cha wana wambele wa Ruwa wawaṟeie ruwewu, na Ruwa moṙumbuo moondu o wandu woose, na mrima ya wandu wasumganyi wamarisie kyaro,

²⁴ na Yesu alewika Mma Mhya, na samu yakye ilepusuka, yekyeonguo shindo shicha kuta iya ya Abelyi.

²⁵ Ambuyenyi mulalege ulya ekyeonguo. Kyipfa kokooya walalekyia walya walelega ulya alewaikyimbia urukyenyi, ngoseṟa mnu lochikyia soe lukokushowa na ulya ekyeluikyimbia ai ruwewu-pfo.

²⁶ Ulya ṟui lyakye lyileṙeṙemsha uruka kyiyeri kyilya; kyaindi wulalu nateṟia egamba, “Lyimwi-se ngyechiṙeṙemsha, chi uruka tikyi-pfo, indi na ruwewu taa.”

²⁷ Kyaindi ṙeṙo lyilya, “Lyimwi-se,” lyaṟingyishia isamiṟo shilya sheiṙima iṙeṙemsho, cha shindo shilegumbo, kundu shindo shilechiiṙima iṙeṙemsho shikae.

²⁸ Kyasia, cha kyipfa luiambilyia Wumangyi wulechiiṙima iṙeṙemsho, luwaṙe isaṟia, lyilya kyipfa kya ikyo luterewe Ruwa na imwindia kui njia yechimchihiṟa, hamwi na wupfereri na wuowu;

²⁹ kyipfa Ruwa oṙu nyi moṙo okyerumatsa.