Waebrania 11 - Kivunjo New Testament 1999

Iiṙikyia

¹ Kyasia, iiṙikyia nyi iambilyia shindo shiweṙelyio kulawoṙe iiya-iya. Nyi iiṙikyia nakamwi shindo shilekyewono.

² Kyipfa kui iiṙikyia waku waṙu waleṟingyishio.

³ Kui iiṙikyia luichi kye wuyana wulegumbo kui Ṙeṙo lya Ruwa, maa shindo shekyewono shilegumbo kui shindo shiwonio-pfo.

⁴ Kui iiṙikyia Abelyi naleenenga Ruwa kyiṙaso kyicha kuta kyilya kya Kaini. Koikyo naleṟingyishio kye namsumganyi; Ruwa kaṟingyishia shienengo shakye, na kyipfa kya iiṙikyia lyakye, Abelyi naiṙeṙa maa chandu alempfa.

⁵ Kui iiṙikyia Enokyi nalesamiṟo, kundu alapfe. Maa alewono-pfo, cha kyipfa Ruwa nalemsamiṟa, kyipfa alawendesamiṟo nalekoaṟingyishio kye nachihiṟa Ruwa.

⁶ Kyaindi kulawoṙe iiṙikyia kyeiṙimika imchihiṟa-pfo; cha kyipfa mndu ekyeyenda ko Ruwa kyiwaṟi naiṙikyie kye Ruwa nakyeri pfo, na kye nekyeenenga wori walya wekyempfula.

⁷ Kui iiṙikyia Noe amwikyimbio nyi Ruwa ko mbonyi tsa shindo shilandewonekye, kui chandu aleindia na iowuo Ruwa, naleachikyia safina, naiṙime ikyiṟa wandu wa kanyi kokye. Na kui kyilya alewuta naleloṟa wandu wa wuyana kye wawoṙe ṙeko, kawa mokyioṟa o wusumganyi wokyewono kui iiṙikyia.

⁸ Kui iiṙikyia Abrahamu naleiṙikyia kyiyeri alelago, nawukye nayende handu halya echihaenengo iwa kyioṟa; kafuma alaichi kundu aiyenda.

⁹ Kui iiṙikyia nalekaa wuyenunyi kulya urukyenyi lo kyaasa, cha urukyenyi lulai lokye, echikaa tengonyi hamwi na Isakyi na Yakobo, wai weoṟa hamwi na oe wa kyaasa kyilya kyilya.

¹⁰ Kyipfa Abrahamu naweiweṙelyia mṟi Ruwa aleukusaṟa na iuwika, mṟi ochikaa ho mlungana.

¹¹ Kui iiṙikyia maa Sara amonyi naleambilyia wuiṙimi wo iira mana, ilyi kyiyeri kyakye kyilekokyamwiṙa; cha kyipfa naletala ulya aleteṟia kye nekyeafutsia kyilya ateṟia.

¹² Na kyipfa kya ikyo wakafeo nyi mndu umwi, na oe nawei cha apfiie, wandu wafoi cha nyenyeri tsa ruwewu, na cha mlelya ukyeri mbai ya ipalyipalyi, uleiṙima italo.

¹³ Iwa woose wakapfiia iiṙikyienyi, walaambilyia shaasa shilya, indi wakashiwona wai kuleshi na ichihiyo kyipfa kyasho, na igamba kye wawekyeri wayenu, na wakyaro urukyenyi.

¹⁴ Cha kyipfa iwo wekyegamba mbonyi cha itso wailoṟa na pata kye waipfula uruka lowo wawenyi.

¹⁵ Na kokooya wawekumbuo uruka lulya walewuka, wawewona ṙaawa lyewuya.

¹⁶ Kyaindi wulalu wailanga uruka lucha ngoseṟa, uruka lo ruwewu. Koikyo Ruwa ekyerigo nyi sonu ilago Ruwa owo-pfo; kyipfa nalewawikyia mṟi.

¹⁷ Kui iiṙikyia Abrahamu kyiyeri aleyesho, nalewuta Isakyi nawe kyiṙaso; na oe aleambilyia shaasa-sho naweiwuta mono-kye, mana kyimuumwi.

¹⁸ Yee, ulya alewio, “Kui njia ya Isakyi kyishari kyapfo kyechilago,”

¹⁹ echiwona kye Ruwa neiṙima imṟutsa iwuka ko wapfu; Abrahamu kawona-se Isakyi iwuka upfunyi kui mfano.

²⁰ Kui iiṙikyia Isakyi nalewikyia Yakobo na Esau mboṟa, maa ko mbonyi tsa shindo shechicha kyiyeri kya numa.

²¹ Kui iiṙikyia Yakobo, kyiyeri aweipfa, kawikyia mboṟa orio mana o Yosefu, kaana na iterewa Ruwa akuyekyie mṙoenyi o upoi lokye.

²² Kui iiṙikyia, Yosefu kyiyeri aleshika mafurumionyi gakye, naleonguo mbonyi tsa wana wa Isiraelyi iwuka Misiri, kagamba kyindo mmbiu okye ochiwutio.

²³ Kui iiṙikyia, Mose kyiyeri alefeo, kaṟiko mori iṟaṟu na wafee wakye, cha kyipfa walewona kye nyi mana mcha, maa waleowuo iwawaso lya mangyi-pfo.

²⁴ Kui iiṙikyia, kyiyeri Mose alewa mndu apfulukyie, nalelega ilago mana o mana o kyika o Farao.

²⁵ Kawona nyi nanga ilyiso wukyiwa hamwi na wandu wa Ruwa kuta ipfula sia ya wunyamaṟi wo kyiyeri kyifuhi;

²⁶ echiwona kye imino kyipfa kya Kristo kokye nyi wunjama wung'anyi kuta masaa ga Misiri; cha kyipfa naleweṙelyia wori-wo.

²⁷ Kui iiṙikyia kawuka Misiri, alaowuoe nyashi ya mangyi, kyipfa nalekarishia cha mndu awonyi ulya alekyewono.

²⁸ Kui iiṙikyia kaachikyia Pasaka, na kulya inyanyatsa samu, kundu ulya morumatsa wana wambele alawapaaye wo.

²⁹ Kui iiṙikyia wakaiṙa ipalyipalyinyi lya Shamu, cha ilyi waiiṙa handu hagaṙutsu; kyiyeri Wamisiri waletambagana iwuta kuṙo wakaṙoo nyi mṟinga, wakapfa.

³⁰ Kui iiṙikyia shiambasa sha Yeriko shileoloka, kyiyeri shileiṟiwio mfiri mfungaaṙe.

³¹ Kui iiṙikyia Rahabu, iṟai lyilya, alerumara hamwi na walya walenyamaṟa-pfo; cha kyipfa naleambilyia kui ufoṟo walya waleṙumo iowelyia mbonyi tsa uruka.

³² Na inyi ngyigambe kyi-se? Kyipfa kyiyeri kyiwengyishika ionguo mbonyi tsa Kyedion, Baraka, Samson, Yefuta, Dawidi, Samolyi na tsa weonguo shisuku-pfo.

³³ Walya kui iiṙikyia walewinga ngyuuchilyi tsa wamangyi, walewuta sha wusumganyi, waleambilyia kyaasa, waleshinga maṙumbu ga simba,

³⁴ walerumisha pfinya tsa moṙo, walekyia iwoogo nyi ngyuushu. Waleenengo pfinya numa ya iwa wafafa, walewaṙa wuragari shiṙenyi, walewinga wamesa wa wayenu.

³⁵ Waka waleambilyia wapfu wawo waleṟutso. Kyaindi wengyi walekapo uwicho mṟasa iwoogo, wengyi wakagamba wakundi iwuto wusingyenyi-pfo, kundu wawone wuṟutsi wuwucha ngoseṟa.

³⁶ Wengyi waleyesho kui imino na ikapo. Yee, kui shipfungo, na kui iwiko kyipfungonyi.

³⁷ Walekapo na magoe, wakamanyo kui msemeno, waleyesho, walewoogo kui ushu; waletenga-tenga waṟee njonyi tsa moondo na tsa mburu. Waweuṟie shindo shifoi, wechilyiso wukyiwa, wechiwutio shindo shiwicho;

³⁸ (wandu walya wuyana wulawewaṟi wakae pfo.) Wawetenga-tenga nguṙunyi na mafumvunyi na mbakonyi na mṟeshenyi ya urukyenyi.

³⁹ Na wandu-wo woose wamṟingyishio kyipfa kya iiṙikyia lyawo, waleambilyia kyaasa-pfo;

⁴⁰ cha kyipfa Ruwa naweisonguo iluṟeyeṟia soe kyindo kyicha, kundu soe lulakyeri ho walaiṙime iafutsio chandu Ruwa akundi wawe.