Ulogo 9 - Kivunjo New Testament 1999

¹ Malaika o kataanu kakapa iganda, ngawona nyenyeri yawuka ruwewu, iolokyi wuyanenyi. Na oe kaenengo upfunguo lo ṟungu lya halya-ndu wandu wapfiie wekyekaa.

² Kaṟuguo ṟungu lyilya. Mtsu ukoṙo iwuka kulya ṟungunyi, cha mtsu o riko lying'anyi; mnengyeṟi na ngyina shikawaṙa meema kyipfa kya mtsu ulya o ṟungunyi.

³ Nzie tsikawuka kulya mtsunyi, tsikayenda urukyenyi, tsikaenengo pfinya cha pfinya tsa shisheshe sha urukyenyi.

⁴ Nzie-tso tsikawio tsilanyamaṟe maṟa ga urukyenyi, maa kyindo kyoose kyikyiwishi, maa ikyiṙi lyoose, sile wandu walawoṙe kyindo kyeloṟa kye wo nyi wa Ruwa ngyuushangunyi kowo.

⁵ Tsikawio kye tsilawawaage, indi walyiso wukyiwa mori itanu. Na iwawio lyawo lyiwei cha iumaṙo nyi kyisheshe, kyiyeri kyaumaṙa mndu.

⁶ Na mfiri iya wandu wechipfula upfu, indi wechiwona upfu maa ale-pfo. Nawo wechilanga ipfa, na upfu lochiwaṙicha.

⁷ Na nzie-tso tsiweng'anyi cha farasi tsingyiṟeyeṟe ko shiṙa, na mṙoenyi tsiwewoṙe kyindo cha oṟo, kyifananyi na sahapu, na shaam shatso shiwekyeri cha shaam sha wandu.

⁸ Natso tsiwewoṙe njui cha njui tsa waka. Na mayego gatso gawekyeri cha mayego ga simba.

⁹ Natso tsiweṟee ngawo shipootenyi cha ngawo tsa menya. Na ṟui lya makungo gatso lyiwei cha ṟui lya makari ga farasi tsifoi tsiyenda shiṙenyi tseṙicha.

¹⁰ Natso tsiwoṙe mshawa cha shisheshe, na msha; na pfinya yatso yefaṟa wandu mori itanu iwekyeri mshawenyi yatso.

¹¹ Na wuye yatso tsiwewoṙe mangyi, na oe nyi malaika o halya-ndu wandu wapfiie wekyekaa, ekyelago Abadoni (kyimwi na igamba Mrumatsi) kui mṙeṙie o Kyiebrania, na Apolyioni kui mṙeṙie o Kyikyiṟikyi.

¹² Ochia lo kuwooka lomwiṙa. Kyaindi kuwoṙe ochia tsiwi tsiicha ipfo-ndu luiyenda.

¹³ Malaika o kaṟandaaṟu kakapa iganda, ngaicho ṟui lyimwi, lyiwukyie ngyuurenyi tsa mesa ya Mndumii ya sahapu ikyeri mbele ya Ruwa,

¹⁴ lyechiwia malaika ulya o kaṟandaaṟu awewoṙe iganda, “Pfunguo malaika-wo waana wawapfungyie pichinyi lying'anyi lyekyelago Furati.”

¹⁵ Malaika walya waana wakapfungulyio, walya wawewaṟeyeṟe ko saa na mfiri na mori na maka, kundu wawaage kyifunjoe kyimwi kyiiṙi kya shifunjoe shiṟaaṟu sha wandu.

¹⁶ Na itala lya mapoo ga asikari wa shiṙa waweṙamilyie farasi lyiwekyeri shiku makumi gawi ka shiku ikumi; ngyileicho itala lyawo.

¹⁷ Kuṙo nyi wuṙo ngyilewona farasi-tso kulya shindonyi ngyileloṟo ngyikyeri cha mndu ailoṙo, na iwo wawetsiṙamilyie, waṟee ngawo shipootenyi, cha tsa moṙo, na tsa buluu na manjano; na mṙoe ya farasi-tso nyi-we cha mṙoe ya simba, na ipfo maṙumbunyi gatso kuwewuka moṙo o manjano na mtsu na kyipiriti.

¹⁸ Kyifunjoe kyimwi kyiiṙi kya shifunjoe shiṟaaṟu sha wandu wakawoogo kui ngapo-tso tsiṟaaṟu, kui moṙo-cho na mtsu-cho na kyipiriti-kyo, shilewuka maṙumbunyi gatso.

¹⁹ Cha kyipfa pfinya tsa farasi-tso tsiwei maṙumbunyi gatso, na mshawenyi yatso; kyipfa mshawa yatso ifananyi na njoka, iwoṙe mṙoe, natso tsekyefaṟa wandu kui mshawa-yo.

²⁰ Na wandu walya waletsugaa, walaiwoogo kui ngapo-tso, walelekana na mafano walegaachikyia-pfo, wakaengyeṟa iindia masatana, na mafano ga sahapu, ga heleri, ga aṟeṟa, ga magoe na ga mashiṙi, galekyeiṙima iwona maa iicho maa ichumia.

²¹ Maa waleṙa wuwaagi wowo, maa wusawi wowo, maa wuṟui wowo, maa wuiwi wowo-pfo.