Ulogo 6 - Kivunjo New Testament 1999

Kyiondo kya Ruwa Kyikafunja Shindo Shilya Sheloṟa Monyi

¹ Numa ya iho ngawona Kyiondo kya Ruwa kyiyeri kyiweipfunguo kyimwi kya shindo shilya mfungaaṙe sheloṟa monyi o kyitapu kyilya, ngaicho umwi o walya waana wai na moo echigamba, cha ṟui lya ikuṟuṟuma, “Nnjo!”

² Ngawona farasi ya uwiṟo, na ulya aweiṙamilyie nawoṙe uṙa, kaenengo oṟo, na oe kafuma, kundu nandewingana-se naiṙime iwinga.

³ Na kyiyeri alefunja kyindo kya kawi kyeloṟa monyi o kyitapu kyilya, ngaicho ulya o kawi ai na moo echigamba, “Nnjo!”

⁴ Farasi ingyi ikafuma, ya kyimaande tarii, na ulya aweiṙamilyie naleenengo iwuta ufoṟo urukyenyi, kundu wandu wawaagane, na oe kaenengo ushu lung'anyi.

⁵ Na kyiyeri alefunja kyindo kya kaṟaaṟu kya kyitapu kyilya, ngaicho ulya o kaṟaaṟu ai na moo echigamba, “Nnjo!” Ngawona farasi ya njuu, na ulya aiṙamilyie nawoṙe kyindo kyepima shindo kuwokonyi kokye.

⁶ Ngaicho cha ṟui kyiiṙi kya walya waana wai na moo, lyechigamba, “Kyipapa kya nganu ko rupia ingyigawe kawi, na shipapa shiṟaaṟu sha shayiri ko rupia ingyigawe kawi, maa ulanyamaṟe mafuṙa maa mpfinyo.”

⁷ Na kyiyeri alefunja kyindo kya kaana kyeloṟa monyi o kyitapu kyilya, ngaicho ṟui lya ulya o kaana ai na moo echigamba, “Nnjo!”

⁸ Ngawona farasi ifanyi ifui-ifui, na ulya aiṙamilyie ekyelago Upfu na Halya-ndu wapfu wekyekaa kaoshana na oe. Nawo wakaenengo ichilyia ura lumwi lo ngyuura tsiina tsa uruka, wawaage kui ushu, kui njaa, kui tauni na kui mando ga saka.

⁹ Na kyiyeri alefunja kyindo kya kataanu kyeloṟa monyi o kyitapu kyilya, ngawona wanda ya mesa ya Mndumii mrima ya walya walewoogo kyipfa kya Ṙeṙo lya Ruwa, na kyipfa kya wuṟingyishi wawewoṙe.

¹⁰ Wakafiiṟa na ṟui lying'anyi, wechigamba, “Ruwa, Mweele, Monyi wuloi, mṟasa indi ochikyelyio itaa kyiṟaache ko walya waleluwaaga?”

¹¹ Nawo wakaenengo orio umwi nguwo ngyileshi ya uwiṟo, wakawio wachihiyo kyipfa hatsugai kyiyeri kyitutu, mṟasa kyiyeri kya iafukyia itala lya wangari wawo iṟundenyi na wana wa wama wawo, wechiwawaaga wuṙo chawo.

¹² Na inyi ngawona, kyiyeri alefunja kyindo kya kaṟandaaṟu kyeloṟa monyi o kyitapu kyilya, hawewoṙe kyiriinza, mnengyeṟi ukofana njuu cha ikunyia lya mberi, mori oose ukowa cha samu,

¹³ na nyenyeri tsikaoloka urukyenyi chandu mfumu okyetonyitsa ndunda ngyiwishi, kyiyeri okumo nyi mkuma ung'anyi.

¹⁴ Ngyina ikawuto ho chandu ura lo kyitapu lokyeoṟooso, na orio fumvu na kyiṟingyiti shikawuto halya-ndu shiwekyeri.

¹⁵ Na wamangyi wa wuyana, na wawoṙe rina, na wasongoru wa shiṙa, na wanjama, na wawoṙe pfinya, na orio mtumo, na mndu alakyeri mtumo, wakakuṟiika mbakonyi na wanda ya maṟaṟa ga mafumvu,

¹⁶ wechiwia mafumvu na maṟaṟa, “Luolokyienyi, lushingyienyi, mbele ya ushangu lokye ulya aṙamie kyitimenyi kya mng'ano, na nyashi ya Kyiondo kya Ruwa.

¹⁷ Cha kyipfa mfiri o nyashi yawo ing'anyi omwafukyia; na nyi wui eiṙima ikyia?”