Ulogo 3 - Kivunjo New Testament 1999

Paruo Yeṙika Siṟinyi ya Saridi

¹ “Na ko malaika o siṟi ikyeri Saridi ṟeia: ‘Ishi nyisho agamba ulya awoṙe mumuyo-yo mfungaaṙe ya Ruwa, na nyenyeri tsilya mfungaaṙe. Ngyiichi mawuto gapfo, kye nuwoṙe rina lya iwaṙa moo, na iyoe nupfiie.

² Uwe mndu molaa kyiṙombo, uikare shindo shilya shitsugae, shikyeri kufuhi na ipfa. Kyipfa ngyiwonyi kye mawuto ganyu nyi galya muwaṟi iwuta mbele ya Ruwa-pfo.

³ Kyasia kumbuo chandu uleambilyia, na chandu uleicho. Osha isho na iṙumbuya wunyamaṟi. Kyaindi ulandelae kyiṙombo, ngyechicha cha mbafu, maa ochimanya saa ngyechicha na kopfo-pfo.

⁴ Kyaindi nuwoṙe marina maangu ipfo Saridi, wandu walekyefanyiṟa nguwo tsawo na ukoe. Nawo wechiyenda hamwi na inyi waṟee nguwo ngyiilyi cha itso, cha kyipfa wawaṟi.

⁵ Ulya mowinga nechiṟiko nguwo-tso ngyiilyi, maa ngyechiwuta rina lyakye kyitapunyi kya moo-pfo, na inyi ngyechiṟingyishia rina-lyo mbele ya Awu oko, na mbele ya malaika wakye.

⁶ Ulya awoṙe kuṙwi, naicho mbonyi-tsi Mumuyo aiwia siṟi.’ ”

Paruo Yeṙika Siṟinyi ya Filadelyifia

⁷ “Na ko malaika o siṟi ikyeri Filadelyifia ṟeia: ‘Ishi nyisho agamba ulya akyeri mweele, na akyeri o loi, awoṙe na upfunguo lo Dawidi, ulya mopfunguo maa kulawoṙe mopfunga, na oe nekyepfunga maa kuwoṙe ekyepfunguo-pfo. Ngyiichi mawuto gapfo.

⁸ Ngakuenenga moongo mpfunguoe mbele yapfo, moongo kulawoṙe mndu echiiṙima iushinga, cha kyipfa nuwoṙe pfinya kyitutu, na iyoe noosha mawawaso gako, maa ulekana rina lyako-pfo.

⁹ Ngakuenenga wandu wafoi wakyeri wa sinagogi lya Satana, wekyegamba kye nyi Wayuda, nawo chi Wayuda-pfo, indi wekyeṙeṙa wongo. Ngyechiwaitika wachepfiria ndi maṙendenyi gapfo, na imanya kye ngakukunda.

¹⁰ Cha kyipfa noosha mawawaso gako ga ikarishia, inyi ngyechikuringa, ulekane na kyiyeri kyilya kya iyesho kyikyiṟeyeṟe icha na wuyanenyi, iyesha walya wekyekaa urukyenyi.

¹¹ Ngyiicha iwinyi. Waṙa mnu kyilya uwoṙe, kulache mndu nakusokye oṟo yapfo.

¹² Ulya mowinga, ngyechimgaluo nawe ngoe hekalunyi lya Ruwa oko, maa echiwuka-se pfo maa ale-pfo. Na inyi ngyechiṟeia wuye yakye rina lya Ruwa oko, na rina lya mṟi o Ruwa oko, Yerusalemu-yo ngyihya, uisoka iwuka ruwewu ko Ruwa oko. Lyingyi-se ngyeṟeia wuye yakye rina lyako ngyimonyi, lyilya lyihya.

¹³ Ulya awoṙe kuṙwi, naicho mbonyi-tsi Mumuyo aiwia siṟi.’ ”

Paruo Yeṙika Siṟinyi ya Laodikyia

¹⁴ “Na ko malaika o siṟi ikyeri Laodikyia ṟeia: ‘Ishi nyisho agamba ulya akyeri Amen. Mṟingyishi ekyeafutsia shilya ateṟia na o loi, mawookyionyi ga shindo shoose Ruwa agumbie.

¹⁵ Ngyiichi mawuto gapfo, kye uichololyia maa uiha-pfo. Kyiwechichia kokooya uweichololyia ang'u uweiha.

¹⁶ Kyasia, cha kyipfa uwoṙe kyimrikye, maa uichololyia maa iha-pfo, ngyekuṙeeka, uwukye ṙumbunyi koko.

¹⁷ Cha kyipfa nuigamba, inyi nyi mnjama, ngyiwoṙe wunjama, maa ngyiuṟie kyindo kyoose-pfo; na iyoe uichi kye iyoe nyi mndu mfafa, na moilacha-ilacha makusaṟo, na mkyiwa, na kyipfupfuṟe, na mndu ukyeri kyiṟanguoe-pfo.

¹⁸ Ngyikuwia kyindo kya wuṟango, uwuṟe koko sahapu ingyisanje kui moṙo, uiṙime iwa mnjama; na nguwo ngyiilyi uiṙime iṟaa, sonu ya kyiṟanguoe kyapfo ilawono; na mṙi o meso oshia meso gapfo, uiṙime iwona.

¹⁹ Woose ngyiwakundi ngyekyewaṟoṟoma na iwatoṟisha. Kyasia waṙa wuragari, uṙumbuye wunyamaṟi.

²⁰ Ngyigoṟokyi moongonyi, ngyikapa hodi. Mndu kaicho ṟui lyako, na iṟuguo moongo, ngyechiiṙa na kokye, na inyi ngyechilya hamwi na oe, na oe hamwi na inyi.

²¹ Ulya mowinga, ngyechimwenenga momu o iṙamia hamwi na inyi kyitimenyi kyako kya mng'ano, chandu na inyi ngyilewinga ngaṙamia hamwi na Awu oko kyitimenyi kyakye kya mng'ano.

²² Ulya awoṙe kuṙwi, naicho mbonyi-tsi Mumuyo aiwia siṟi.’”