Ulogo 22 - Kivunjo New Testament 1999

¹ Numa ya iho kangyiloṟa mfo o mṟinga o moo, uiaka-aka cha kyiyewo, ochiwuka kyitimenyi kya mng'ano kya Ruwa, na kya Kyiondo kya Ruwa,

² makyiṙi-gawi ga njia yakye ing'anyi. Na ura-lu na ura-lu lo mfo ulya, kuwewoṙe ikyiṙi lya moo, lyekyekumbia ndunda, mbaṟe ikumi na tsiwi, lyekyekumbia ndunda tsalyo orio mori; na maṟa ga ikyiṙi-lyo nyi gekyiṟa masanga.

³ Maa kochiwaṙa kyiseso kyoose-se-pfo. Na kyitima kya mng'ano kya Ruwa na kya Kyiondo kya Ruwa kyechikaa pfo. Na waṟundi wakye wechimṟundia.

⁴ Nawo wechimmbona kyaam kyakye, na rina lyakye lyechikaa ngyuushangunyi tsa shaam shawo.

⁵ Maa kochiwaṙa-se kyio-pfo; maa wechipfula ngyeela ya taa maa ya mmbaṟi-pfo; cha kyipfa Mndumii Ruwa nechiwa ngyeela yawo, nawo wechichilyia mṟasa mlungana na mlungana.

Icha lya Yesu

⁶ Numa ya iho kangyiwia, “Maṙeṙo-ga nyi kyindo mndu eiṙima ikyiiṙikyia na nyi kya loi.” Na Mndumii, Ruwa ekyeenenga weonguo shisuku Mumuyo okye, naleṙuma malaika okye iloṟa waṟundi wakye shindo shilya shiwaṟi icha iwinyi.

⁷ Yesu nagamba, “Ngyiicha iwinyi. Agusu ulya aosha mbonyi tsa wuikyimbi wo kyitapu-kyi.”

⁸ Na inyi Yohane nyi oe ngyileicho na iwona mbonyi-tso. Na ilyi ngyiletsiicho na itsiwona ngyileoloka, kundu ngyiterewe na iindia mbele ya maṙende ga malaika ulya alengyiloṟa mbonyi-tso.

⁹ Na oe kangyiwia, “Ulawute kuṙi. Inyi nyi mongari opfo, na o wana wa wama wapfo, na o walya wekyeosha mbonyi tsa kyitapu-kyi. Terewa na iindia Ruwa.”

¹⁰ Kangyiwia, “Ulaṟikye mbonyi tsa wuikyimbi wo kyitapu-kyi, cha kyipfa kyiyeri kya wuikyimbi-wo kyamwafukyia.

¹¹ Molya mbaka naengyeṟe ilya mbaka; na mowuta mando gafanyi naengyeṟe iwuta kuṙo. Na msumganyi naengyeṟe iwuta sha wusumganyi; na mweele naengyeṟe iilyisho.”

¹² Yesu naigamba, “Ngyiicha iwinyi, na wori woko wukyeri hamwi na inyi, itaa orio mndu chandu iṟunda lyakye lyikyeri.

¹³ Inyi nyi Alyifa na Omeka, mawookyionyi na mafurumionyi, o kuwooka na o mafurumionyi.”

¹⁴ Wagusu walya wekyesanja nguwo tsawo, wawaṙe momu o yenda halya-ndu ikyiṙi-lyo lya moo lyikyeri, na iiṙa na mṟinyi kui moongo yalyo.

¹⁵ Ipfo nja kuwoṙe shite, na wasawi, na waṟui, na wawaagi, na iwo wekyeterewa na iindia mafano, na orio mndu akundi wongo na iṙeṙa wongo.

¹⁶ “Inyi Yesu ngaṙuma malaika oko imuṟingyishia nyoe shindo shoose siṟinyi. Inyi ngyikyeri Mshari na Mana o Dawidi; nyenyeri iya ya ngamenyi yekyewaa.”

¹⁷ Na Mumuyo na Mpora wagamba, “Nnjo! Ulya aichuoe nagambe, ‘Nnjo!’ Na awoṙo nyi nyoṙa nache; na akundi, nanyo mṟinga o moo kulawoṙe itaa kyindo.”

Wuikyimbi na Kyaasa Kyefurumia

¹⁸ Ngaṟingyishia orio mndu aicho mbonyi tsa wuikyimbi wo kyitapu-kyi. Mndu oose katsiengyeṟa kyindo kyoose, Ruwa nechiengyeṟia mndu-cho ngapo-tso tsingyiṟeie kunu kyitapunyi.

¹⁹ Na mndu oose kawuta kyindo kyoose iwuka kunu mbonyinyi tsa wuikyimbi wo kyitapu-kyi, Ruwa nechisoka mndu-cho ṙombo lyakye halya ikyiṙinyi lya moo, na kulya mṟinyi mweele, mṟi ulya mbonyi tsacho tsingyiṟeie kunu kyitapunyi.

²⁰ Ulya moṟingyishia ishi, nagamba, “Yee loi; ngyiicha iwinyi.” Amen. Nnjo Mndumii Yesu.

²¹ Isaṟia lya Mndumii Yesu lyikae na nyoe moose. Amen.