Ulogo 2 - Kivunjo New Testament 1999

Paruo Yeṙika Siṟinyi ya Efeso

¹ “Ko malaika o siṟi ikyeri Efeso ṟeia: ‘Ishi nyisho agamba ulya awoṙe nyenyeri-tso mfungaaṙe kuwokonyi kokye ko kulyoe, ulya ekyechumia ipfo shindonyi mfungaaṙe sha sahapu.

² Ngyiichi mawuto gapfo, na wukyiwa wopfo, na iweṙelyia lyapfo, na kye oiṙima ikaa na wandu wawicho-pfo. Lyingyi-se nuleyesha walya wekyegamba kye wo nyi wasu, nawo chi wasu-pfo, kowona kye wekyeṙeṙa wongo.

³ Lyingyi-se nuwewoṙe iweṙelyia na ikarishia kyipfa kya rina lyako, maa ulewina-pfo.

⁴ Kyaindi ngyiwoṙe ṙeṙo kyipfa kyapfo, kye noṙa ikunda lyilya lyapfo lya kuwooka.

⁵ Kyasia, kumbuo nyi hanga uleoloka; uṙumbuye wunyamaṟi, uwute mawuto ga mfiri ya numa. Kyaindi ulandewute kuṙo, ngyiicha na kopfo, na inyi ngyechiwuta kyindo kyapfo kyeyekyia taa iho-ndu kyikyeri, ulandeṙumbuye wunyamaṟi.

⁶ Kyaindi nuwoṙe kyindo-kyi, kye nusuuye mawuto ga Wanikolai, galya na inyi ngyigasuuye.

⁷ Ulya awoṙe kuṙwi, naicho mbonyi-tsi Mumuyo aiwia siṟi. Ulya mowinga, ngyechimwenenga ilya ndunda tsa ikyiṙi lya moo, lyikyeri bustanyinyi ya Ruwa.’ ”

Paruo Yeṙika Siṟinyi ya Simirina

⁸ “Na ko malaika o siṟi ikyeri Simirina ṟeia: ‘Ishi nyisho agamba ulya akyeri o kuwooka na o mafurumionyi, awepfiie, numa ya iho kawaṙa moo.

⁹ Ngyiichi wukyiwa wopfo na wufofo wopfo (kyaindi nui mnjama.) Ngyiichi na shilahio sha walya wekyegamba kye nyi Wayuda, nawo chi Wayuda-pfo, indi nyi sinagogi lya Satana.

¹⁰ Ulaowuoe shindo shechikukooya. Manya kye Mokyiriinzi-cho nechiṟukucha wengyi kyiiṙi kyanyu kyipfungonyi kundu muyesho, na nyoe mochilya wukyiwa mfiri ikumi. Uwe msimiri mṟasa ipfa, na inyi ngyechikuenenga oṟo ya moo.

¹¹ Ulya awoṙe kuṙwi, naicho mbonyi-tsi Mumuyo aiwia siṟi. Ulya mowinga nechikyia iwiyitso kulya nduwenyi ya moṙo, kyindo kyikyeri nyi upfu lo kawi.’ ”

Paruo Yeṙika Siṟinyi ya Perigamo

¹² “Na ko malaika o siṟi ikyeri Perigamo ṟeia: ‘Ishi nyisho agamba ulya awoṙe ushu-lo luohi, lo mmbega kuwi.

¹³ Ngyiichi handu okyekaa. Nyi ho-ndu hawoṙe kyitima kya mng'ano kya Satana; na iyoe nuwoṙe mnu rina lyako, maa ulekana iiṙikyia lyako-pfo, maa mfiri ulya Antipa, mṟingyishi oko, mndu oko ekyeafutsia shilya ateṟia, alewoogo kyiiṙi kyanyu, halya-ndu Satana ekyekaa.

¹⁴ Kyaindi ngyiwoṙe mbonyi ngyaangu kyipfa kyapfo, cha kyipfa nuwoṙe pfo wandu wekyeosha malosho ga Balaamu, ulya alelosha Balakyi nawikye kyindo kyetewe Waisiraelyi, kye walye shindo shileṙasio mafano na iwuta shindo sha wuṟui.

¹⁵ Na wuṙo na iyoe nuwoṙe wandu wekyeosha malosho ga Wanikolai.

¹⁶ Kyasia ṙumbuya wunyamaṟi. Ulandeṙumbuye wunyamaṟi, ngyiicha na kopfo iwinyi, na inyi ngyechiwaṙa shiṙa nawo kui ushu lo ṙumbu lyako.

¹⁷ Ulya awoṙe kuṙwi naicho mbonyi-tsi Mumuyo aiwia siṟi. Ulya mowinga ngyechimwenenga ṙombo lya Manna ingyiṟikye, na inyi ngyechimwenenga igoe lya uwiṟo, na wuye ya igoe-lyo hahaṟeie rina lyihya mndu alalyiichi sile ulya ailyiambilyia.’ ”

Paruo Yeṙika Siṟinyi ya Tiatira

¹⁸ “Na ko malaika o siṟi ikyeri Tiatira ṟeia: ‘Ishi nyisho agamba Mono-Ruwa, ulya awoṙe meso gakye cha ulumi lo moṙo na maṙende gakye mfano o aṟeṟa ngyiilyiṟe mnu.

¹⁹ Ngyiichi mawuto gapfo, ikunda, iiṙikyia, wuṟundi na iweṙelyia lyapfo. Lyingyi-se kye mawuto gapfo ga mafurumionyi gang'ana kuta galya ga mawookyionyi.

²⁰ Kyaindi ngyiwoṙe ṙeṙo kyipfa kyapfo, kye okyelega kyindo mndu mka ulya ekyelago Yesebelyi akundi-pfo. Ulya ekyegamba kye nyi moonguo shisuku na ilosha waṟundi wako na iwaṙetsa, kundu wawute shindo sha wuṟui na ilya shindo shaṙasio mafano.

²¹ Na inyi ngamwenenga ṙaawa kundu naṙumbuye wunyamaṟi, maa akundi iṙumbuya wuṟui wokye-pfo.

²² Manya kye ngyechimṟukucha wuye ya ulyii, na iwo wekyewuta na oe shindo sha wuṟui, walye wukyiwa wung'anyi, walandeṙumbuye mawuto gakye.

²³ Na inyi ngyewaaga wana wakye. Na siṟi tsoose tsechimanya kye inyi nyi oe aichi makusaṟo gakyeri mrimenyi ko wandu. Na inyi ngyechitaa orio umwi onyu iṙuana na mawuto gakye.

²⁴ Kyaindi ngammbia nyoe mukyeri Tiatira, woose walawoṙe malosho-go, walaichi ngyeṟo tsa Satana, chandu wekyegamba, ngyechimṙika ṟio lyingyi-pfo.

²⁵ Indi kyilya muwoṙe kyiwaṙenyi tapu, mṟasa ilyi ngyechicha.

²⁶ Na ulya mowinga, na iringa mawuto gako mṟasa mafurumionyi, ngyechimwenenga ichilyia walya walaiṙikyie Ruwa.

²⁷ Na oe nechiwachilyia kui upoi lo kyichakari, chandu shindo sha teri yeachikyia shinungu shekyeachikyio, chandu inyi ngyileshiambilyia ko Awu oko.

²⁸ Na inyi ngyechimwenenga nyenyeri ya ngamenyi.

²⁹ Ulya awoṙe kuṙwi, naicho mbonyi-tsi Mumuyo aiwia siṟi.’ ”