Ulogo 16 - Kivunjo New Testament 1999

Pakulyi tsa Nyashi ya Ruwa

¹ Ngaicho ṟui lying'anyi iwuka hekalunyi, lyechiwia malaika mfungaaṙe, “Yendenyi mundeletsia urukyenyi pakulyi tsilya mfungaaṙe tsa nyashi ya Ruwa.”

² Icho o kuwooka kayenda, kaletsia pakulyi yakye urukyenyi, hakawaṙa oṙe lyiwicho, lyilyiporu, ko wandu walya wawoṙe kyindo kyeloṟa kye wo nyi wa indo-lyo, na walya wekyeterewa na iindia ifano lyalyo.

³ Na icho o kawi kaletsia pakulyi yakye ipalyipalyinyi, lyikawa cha samu ya mndu mpfu, na shindo shoose shiwoṙe moo ipalyipalyinyi shikapfa.

⁴ Na icho o kaṟaaṟu kaletsia pakulyi yakye mapichinyi na shokyenyi tsa mṟinga, shikawa samu.

⁵ Na inyi ngaicho malaika o mṟinga echigamba, “Iyoe nuwoṙe wusumganyi, uwekyeri pfo na ukyeri pfo, Mweele, cha kyipfa noanduya kuṙo.

⁶ Kyipfa walewaaga wandu wa Ruwa na weonguo shisuku, na iyoe nulewaenenga samu wainyo; nawo wawaṟi.”

⁷ Ngaicho na mesa-yo ya Mndumii yechigamba, “Yee, Mndumii Ruwa Mopfinya, njia tsapfo tseanduya nyi tsa loi na tsa wusumganyi.”

⁸ Na icho o kaana kaletsia pakulyi yakye mnengyeṟinyi; na mnengyeṟi ukoenengo pfinya yekoṟa wandu kui moṙo.

⁹ Wandu wakakoṟo nyi moṙo ung'anyi, nawo wakalahia rina lya Ruwa achilyie ngapo-tso; maa waleṙumbuya wunyamaṟi maa ienenga Ruwa kyiṟumi-pfo.

¹⁰ Na icho o kataanu kaletsia pakulyi yakye kyitimenyi kya mng'ano kya indo lyilya; na wumangyi wolyo wukowiko meema; wandu wakaumaṙa ngyuulumi tsawo kyipfa kya mawawio.

¹¹ Wakalahia Ruwa o ruwewu kyipfa kya mawawio gawo, na kyipfa kya maoṙe gawo; maa waleṙumbuya mawuto gawo-pfo.

¹² Na ulya o kaṟandaaṟu kaletsia pakulyi kyakye kulya mfonyi ung'anyi okyelago Furati; mṟinga ocho ukouma, kundu njia iachikyio ko wamangyi waiwuka ura lo ngamenyi.

¹³ Ngawona mumuyo iṟaṟu ya wunyamaṟi ifananyi na shilo, yechiwuka ṙumbunyi lya injoka lyilya, na ṙumbunyi lya indo lyilya, na lya moonguo shisuku ulya o wongo.

¹⁴ Iyo nyiyo mumuyo ya masatana, yekyewuta shindo sheṟiyisha, yekyewuka na iyenda ko wamangyi wa wuyana woose; iwasania ko shiṙa sha mfiri ulya ung'anyi o Ruwa Mopfinya.

¹⁵ (Ngyiicha cha mbafu. Agusu ulya molaa kyiṙombo, na iringa nguwo tsakye, alachumie kyiṟanguoe mṟasa wandu wawone sonu yakye.)

¹⁶ Wakawasania mṟasa handu hekyelago Harimakyedoni kui mṙeṙie o Kyiebrania.

¹⁷ Na icho o mfungaaṙe kaletsia pakulyi yakye ngyinenyi. Ṟui lying'anyi lyikawuka hekalunyi, lyechigamba, “Mafurumionyi gamcha.”

¹⁸ Hakawaṙa mbawa na ṟui lya ikuṟuṟuma, na kuwewoṙe kyiriinza kying'anyi, kyilandewono wookyia kyiyeri wandu walewooka ikaa wuyanenyi.

¹⁹ Na mṟi ulya ung'anyi ukopaṟika shifunjoe shiṟaaṟu; na mṟi ya masanga ikaoloka; na kulawoṙe iwaṙima, Ruwa karutsa Babelyi kyiṙoonyi mpfinyo o nyashi yakye.

²⁰ Orio kyiṟingyiti kyikaṙicha, maa mafumvu galewono-se-pfo.

²¹ Na mvuo ya magoe ing'anyi mnu, ya magoe malemeri cha shilo makumi gaana na shitaanu, ikaoloka wuye ya wandu iwuka ruwewu. Wandu wakalahia Ruwa kyipfa kya ngapo iya ya mvuo ya magoe; cha kyipfa ngapo yayo ing'anyi mnu.