Ulogo 11 - Kivunjo New Testament 1999

Waṟingyishi Wawi

¹ Ngaenengo upoi lukyeri cha kyiwale; na umwi kangyiwia, “Amka, upime hekalu lya Ruwa, na mesa ya Mndumii, na iwo wekyeindia na iterewa ho Ruwa.

² Na handu hesanzia hakyeri nja ya hekalu uhaṙe ulahapime, cha kyipfa iho hangyienengye walya walaiṙikyie Ruwa, nawo wechikapa na ichilyia mṟi mweele Yerusalemu kyiyeri kya mori makumi gaana na iwi.

³ Na inyi ngyechienenga momu waṟingyishi wako wawi, nawo wechionguo shisuku mfiri kyiku, magana gawi na makumi gaṟandaaṟu, wawaṟikye makunyia.”

⁴ Iyo nyiyo mseituni iya iwi na shindo shilya shiwi shikyeri mbele ya Mndumii o uruka.

⁵ Na mndu kakunda iwawutia kyindo kyiwicho, kuṙo nyi wuṙo awaṟi iwoogo.

⁶ Iwo wawoṙe pfinya yepfunga ruwewu, kundu mvuo ilakape mfirinyi ya ionguo shisuku lyawo. Nawo wawoṙe pfinya yegaluo mṟinga uwe samu, na iendie uruka orio ngapo, orio kyiyeri wakunda.

⁷ Na kyiyeri wechimarisa wuṟingyishi wowo, indo lyilya lya saka lyiwukyie halya-ndu wandu wapfiie wekyekaa lyechikapana shiṙa nawo, nalyo lyechiwawinga na iwawaaga.

⁸ Na mnying'a yawo yechikaa njienyi ya mṟi ulya ung'anyi, okyelago Sodoma kui mbaṟe ya mrima, na Misiri, lyingyi-se nyiho handu Mndumii owo alekapio msalabenyi.

⁹ Na wandu wa kyishari-kyo na mbaṟe na mṙeṙie na isanga wechiambuya mnying'a yawo mfiri iṟaṟu na kyitumbuṟe kyimwi kya mfiri umgawe kawi, maa wechilekyia mnying'a yawo iwiko kyilomenyi-pfo.

¹⁰ Na walya wekyekaa urukyenyi waichihiyo kyipfa kyawo na ikapa ngulyilyi na ngoru. Nawo wechiṙikyiana shindo shicha wo wenyi ko wenyi, cha kyipfa weonguo shisuku-wo wawi waleenenga ilya wukyiwa walya wekyekaa urukyenyi.

¹¹ Na numa ya mfiri-yo iṟaṟu na kyitumbuṟe kyimwi kya mfiri umgawe kawi, Ruwa kawaumuya mṟufui okye o moo, wakagoṟoka kui maṙende gawo wawenyi; na wandu wawewaambuya wakawoṙo nyi wuowu wung'anyi.

¹² Wakaicho ṟui iwuka ruwewu lyechiwawia, “Ṙonyi mṟasa kunu.” Wakaṙo na ruwewu wakyeri ipuchinyi, washituwa wawo wewaambuya.

¹³ Na kyiyeri kyilya hawewoṙe kyiriinza kying'anyi, na kyifunjoe kyimwi kyiiṙi kya shifunjoe ikumi sha mṟi kyikaoloka; wandu shiku mfungaaṙe wakawoogo nyi kyiriinza kyilya. Na walya waletsugaa wakawoṙo nyi wuowu, wakaṟumisha Ruwa o ruwewu.

¹⁴ Ochia lo kawi lomwiṙa; ochia lo kaṟaaṟu luicha iwinyi.

Iganda lya Mfungaaṙe

¹⁵ Malaika o mfungaaṙe kakapa iganda, kukowaṙa maṟui gang'anyi ruwewu, gechigamba, “Wumangyi wo wuyana wommba Wumangyi wo Mndumii oṙu na wo Kristo okye, na oe nechichilyia mṟasa mlungana na mlungana.”

¹⁶ Na wameeku walya makumi gawi na waana waṙamie mbele ya Ruwa shitimenyi shawo sha mng'ano wakaoloka na ndewu, wakaindia Ruwa,

¹⁷ wechigamba, “Lokuana iyoe, Mndumii Ruwa Mopfinya, uwekyeri pfo na ukyeri pfo, cha kyipfa nowuta wuiṙimi wopfo wung'anyi, na ichilyia.

¹⁸ Na wandu walaiṙikyie Ruwa walesuo, nyashi yapfo nayo ikacha, na kyiyeri kya wapfu ianduyo kyikacha, na kyiyeri kya ienenga wori wowo waṟundi wapfo weonguo shisuku na waele, na iwo wekyeowuo na iindia rina lyapfo, watutu na wang'anyi na irumatsa iwo wekyelyisa wandu wukyiwa na iwaaga wandu.”

¹⁹ Numa ya iho malaika kapfunguo Hekalu lya Ruwa lyikyeri ruwewu, na sanduku ya Ruwa ya mma ikawoneka kulya hekalunyi. Kukowaṙa mbawa, maṟui, makuṟuṟuma, kyiriinza na mvuo ya magoe ifoi mnu.