Ulogo 1 - Kivunjo New Testament 1999

¹ Ishi nyi shindo Ruwa aleshukuya Yesu Kristo kundu nashiloṟe waṟundi wakye. Shindo shechiwutika iwinyi kyipfa Ruwa naṙumbuo shiwe kuṙo; na Yesu Kristo kashienenga malaika okye, malaika-cho kashishukuya Yohane na Yohane kashigamba ko wandu wa Ruwa.

² Yohane aleṟingyishia Ṙeṙo lya Ruwa, na wuṟingyishi wo Yesu Kristo, wo shindo shoose alewona.

³ Agusu mndu ulya asomia wandu ulogo-lu luwukyie ko Ruwa, na walya waaṙanyia na iosha kyilya logamba wechichihiyo. Cha kyipfa hechiiṙa kyiyeri kyileshi shindo-shi shilaafukyia-pfo.

Shiiṟikyiṟo ko Siṟi Mfungaaṙe

⁴ Inyi Yohane, ngaṙika shiiṟikyiṟo ko siṟi tsilya mfungaaṙe tsikyeri urukyenyi lo Asia. Isaṟia lyikae konyu na ufoṟo, shiwukyie ko ulya awekyeri pfo na akyeri pfo na echicha. Isaṟia na ufoṟo shiwukyie ko mumuyo iya mfungaaṙe ikyeri mbele ya kyitima kya Ruwa kya mng'ano.

⁵ Lyingyi-se shiwukyie ko Yesu Kristo, mṟingyishi ekyeafutsia shilya ateṟia, mmbele o wapfu, na ang'anyi o wamangyi wa wuyana. Ulya alukundi na ilusanja ngyuunyamaṟi tsaṙu samunyi yakye,

⁶ na ilugaluo iwa wumangyi na makohanyi wechichilyia na oe na iṟundia Ruwa okye na Awu. Kyiṟumi na mng'ano ukyeri na oe mṟasa mlungana na mlungana. Amen.

⁷ Kristo naicha iwinyi akyeri mapuchinyi; na orio riso lyechimmbona, na iwo walemmbaaga, na mbaṟe tsoose tsa wandu wa wuyana tsechikapa ṟanyi kyipfa kyakye. Yee. Amen.

⁸ Inyi nyi Alyifa na Omeka, mawookyionyi na mafurumionyi, Mndumii Ruwa nagamba, awekyeri pfo na akyeri pfo na echicha, Mopfinya.

Yesu Aleṟuka Kawoneka ko Yohane

⁹ Inyi Yohane, mono-wama onyu ekyelya wukyiwa hamwi na nyoe, na Wumangyi na iweṙelyia Yesu Kristo, ngyiwekyeri kyiṟingyitinyi kyekyelago Patimo, kyipfa ngyilekongaonguo Ṙeṙo lya Ruwa na wuṟingyishi wuleloṟo nyi Yesu.

¹⁰ Mumuyo nalecha na koko mfiri o Ruwa. Ngaicho ṟui lying'anyi numa yako, cha ṟui lya iganda,

¹¹ lyechigamba, “Ṟeia kyitapunyi ishi ushiwonyi, ushiṙuo ipfo siṟinyi mfungaaṙe: Efeso, Simirina, Perigamo, Tiatira, Saridi, Filadelyifia na Laodikyia.”

¹² Ngainduka ngyiwone ṟui-lyo lyaṙeṙa na inyi. Na kyiyeri ngyileinduka, ngyilewona shindo sheyekyia taa mfungaaṙe sha sahapu;

¹³ na halya shindonyi ngawona kyindo kyikyeri cha mndu, aṟee mkoṟoṟi ushikyie maṙendenyi gakye, na iinewo mkanda o sahapu maweenyi gakye.

¹⁴ Mṙoe okye na njui tsakye tsiwekyeri uwiṟo cha mberi ngyiilyi tsa ondo, cha koṟa; na meso gakye cha ulumi lo moṙo;

¹⁵ na maṙende gakye aṟeṟa ngyiilyiṟe mnu, cha ilyi ingyisanje nyi moṙo ung'anyi; na ṟui lyakye cha ṟui lya mṟinga ufoi.

¹⁶ Na oe nawewoṙe nyenyeri mfungaaṙe kuwokonyi kokye ko kulyoe; na ushu luohi, lo mmbega kuwi, lochiwuka ṙumbunyi kokye; na kyaam kyakye cha mnengyeṟi uiwaa na pfinya.

¹⁷ Na inyi kyiyeri ngyilemmbona, ngyileoloka maṙendenyi gakye cha mndu apfiie. Kayekyia kuwoko kokye ko kulyoe wuye yako, echigamba, “Molaowuoe. Inyi nyi o kuwooka na o mafurumionyi,

¹⁸ na ai na moo; na inyi ngyiwepfiie na wulalu ngyii na moo mṟasa mlungana na mlungana. Na inyi ngyiwoṙe ngyuupfunguo tsa upfu, na tsa halya-ndu wapfu wekyekaa.

¹⁹ Kyasia, uṟeie shindo-sho owona, na shilya shikyeri pfo, na shilya shechicha numa ya isho.

²⁰ Wuṟikyi wo nyenyeri tsilya mfungaaṙe owona kuwokonyi koko ko kulyoe, na wuṟikyi wo shindo shilya mfungaaṙe sha sahapu. Nyenyeri tsilya mfungaaṙe nyi malaika wa siṟi tsilya mfungaaṙe; na shindo-sho mfungaaṙe nyi siṟi mfungaaṙe.”