Matayo 8 - Kivunjo New Testament 1999

Ikyiṟo lya awoṙo nyi Taambo

¹ Na oe kyiyeri alesoka kulya fumvunyi, wuingyi wufoi wo wandu wulemwosha.

² Kukocha mndu awoṙo nyi ndoṟe ya taambo kamwindia echigamba, “Mndumii, kokunda, noiṙima ingyiyeṟemtsa.”

³ Yesu kagoṟuo kuwoko kampaaya, echigamba, “Ngyikundi; yeṟemka.” Na cha ilyi ndoṟe yakye ya taambo ikammbuka.

⁴ Yesu kammbia. “Ulawie mndu; kyaindi yenda, undekuloṟa ko mkohanyi, undeenengyia kyiano chandu Mose alegamba, kyiwe wuṟingyishi kowo.”

Ikyiṟo lya Mṟundi o Mchilyi

⁵ Na kyiyeri aleiṙa na Kaperinaumu mchilyi umwi mtutu nalecha na kokye.

⁶ Kamterewa, echigamba, “Mndumii, mṟundi oko nalee kanyi, nawoṙo nyi ndoṟe ya ipfa ngapfu ura lumwi, naiwawio mnu.”

⁷ Yesu kammbia, “Ngyeecha, ngyimkyiṟe.”

⁸ Mchilyi ulya kamgaluo, kagamba, “Mndumii, inyi ngyiwaṟi iyoe uiṙe na numba koko-pfo; kyaindi gamba ṙeṙo lyimwi tikyi, na mṟundi oko nechichia.

⁹ Cha kyipfa inyi nyi mndu ngyiwoṙe wuchilyi, ngyiwoṙe asikari wanda yako; ngawia ichu, ‘yenda’ nekyeyenda; na ichu, ‘nnjo’ nekyecha; na kyisinga kyako, ‘wuta kuṙi’, kyekyewuta.”

¹⁰ Kyiyeri Yesu aleicho isho, naleṟiyio, kawia walya waweimwosha, “Ny'kyaloi ngammbia, ngyilandewone iiṙikyia lying'anyi kuṙi, ko mndu oose kunu Isiraelyi-pfo.

¹¹ Na inyi ngammbia, kye wafoi wechicha iwuka ura lo ngamenyi na ura lo kyukonyi, nawo wechiṙamia hamwi na Abrahamu, na Isakyi, na Yakobo Wumangyinyi wo Ruwewu;

¹² kyaindi wana wa Wumangyi wechiwiyitso meemenyi o nja. Nyipfo kochiwaṙa ṟanyi na ilya ngakuru.”

¹³ Na Yesu kawia mchilyi ulya, “Yenda; kyiwe kopfo chandu oiṙikyia.” Mṟundi ulya okye kachia saa iya iya.

Ikyiṟo lya Wandu Wafoi

¹⁴ Kyiyeri Yesu aleshika kanyi ko Petiro, kawona mamka o Petiro, alee kyitaṟenyi nawoṙo nyi isemu.

¹⁵ Kampaaya kuwoko, isemu lyikamleka; na oe kafuma kawaṟundia.

¹⁶ Na lyilya kuleila, wakamwendie wandu wafoi wawoṙo nyi waṟufui wawicho; kawuta waṟufui wawicho kui ṙeṙo lyakye, kakyiṟa woose walawekuiṙima,

¹⁷ kundu kyiafukyie kyindo kyilya kyikyigambe nyi moonguo shisuku Yesaya, echigamba, “Oe amonyi naleṙuo wufafa woṙu, na iṙuo ndoṟe tsaṙu.”

Wandu Waleteṟia Iosha Yesu

¹⁸ Na kyiyeri Yesu alewona wuigyi wufoi wo wandu wochimtengyetia, nalewia wanalosho wakye handu hamwi na oe wayende molyolya.

¹⁹ Mlosha umwi o mawawaso kayenda kokye, kammbia, “Mlosha, ngyekuosha orio handu ochiyenda.”

²⁰ Yesu kammbia, “Mapaara gawoṙe mṟeshe, na shileye sha ngyinenyi shiwoṙe singyi kyaindi Mono-Adamu awoṙe handu heonyonyia-pfo.”

²¹ Ungyi kyiiṙi kya wanalosho wakye kammbia, “Mndumii, ngyienenga momu kuwooka, ngyiyende ngyindeṟika awu-yoko.”

²² Kyaindi Yesu kammbia, “Ngyiosha; leka wapfu waṟikye wapfu wawo.”

Iṙeṙio lya Kyiwiṟi

²³ Kaṙooya ngalawenyi, wanalosho wakye wakamwosha.

²⁴ Kukowaṙa shiwiṟi shing'anyi kulya ipalyipalyinyi; shiwiṟi-sho shikakapa ngalawa iya ikashikyio nyi mṟinga, na oe nawelee maṙoe.

²⁵ Wanalosho wakye wakayenda kokye, wakamwamtsa, wechigamba, “Mndumii, luletse, luisia.”

²⁶ Kawawia, “Ny'kyilyi mowa waowu, nyoe wa iiṙikyia lyiangu?” Cha ilyi kafuma, kaṙeṙia shiwiṟi na ipalyipalyi; kukotsia sau.

²⁷ Wandu walya wakaṟiyio, wechigamba, “Ichu nyi mndu o mbaṟe iha maa shiwiṟi sha ipalyipalyinyi shiosha kyilya aigamba?”

Ikyiṟo lya Wawoṙo nyi Waṟufui Wawicho

²⁸ Na oe kyiyeri aleshika molyolya, urukyenyi lo Wakyerasi, wandu wawi wawoṙo nyi waṟufui wawicho walekarisana na oe, wawukyie handu heṟika wandu, walang'a mnu, maa mndu alaiṙime iiṙa njia iya.

²⁹ Wakakalagatsa, wechigamba, “Luwoṙe kyikyi na iyoe, Mana o Ruwa? Ngyesa nocha ichelutuura kyiyeri kyaṙu kyilashika?”

³⁰ Kyasia, kuleshi nawo kuwewoṙe poo lya nguwe tsifoi tsechilya.

³¹ Waṟufui walya wawicho wakamterewa, wechigamba, “Koluwuta, luṙe luyende, lundeiṙa na kulya poonyi lya nguwe.”

³² Kawawia, “Yendenyi.” Wakawuka, wakaiṙa na kulya mmbiunyi ya nguwe; na poo lyilya lyoose lyikasoka halya kyiiṟimikonyi lyeṙicha mṟasa ipalyipalyinyi, lyikapfiia mṟingyenyi.

³³ Kyaindi walya wawelyisa nguwe-tso waleṙicha, wakayenda mṟinyi, wakaonguo mbonyi-tso kundu koose, na mbonyi tsa walya wawewoṙo nyi waṟufui wawicho taa.

³⁴ Wandu woose wa mṟi ulya wakafuma indeambilyia Yesu; nawo lyilya walemmbona, walemterewa nawukye mṟasenyi kowo.