Matayo 7 - Kivunjo New Testament 1999

Ianduya Wengyi

¹ “Mulaanduye, mulacheanduyo nyoe.

² Kyipfa chandu muianduya wengyi na wuṙo mochianduyo. Na kyiyeṟo kyilya mueṟa nakyo mochiyeṟio.

³ Kyasia, ny'kyilyi uiambuya kyiunana kyikyeri risonyi lya mono-womoo, na mriti-cho ukyeri ipfo risonyi lyapfo ulauambuye?

⁴ Ang'u nowia kuṙa mono-womoo, ‘Ngyileka ngyiwute kyiunana ipfo risonyi lyapfo,’ na kunu kuwoṙe mriti ipfo risonyi lyapfo?

⁵ Iyoe mkulembecheṟi, wuta kuwooka mriti-cho ipfo risonyi lyapfo; naaho-ng'u ochiwona necha iwuta kyiunana kyilya kyikyeri risonyi lya mono-womoo.

⁶ Mulaenengye shite kyilya kyikyeri kyiele. Maa mulawiyitse lulu tsanyu mbele ya nguwe. Tsilachetsichuma-chuma, tsikagaluka na imtafuo-tafuo.”

Iterewa Ruwa Shilya Lukundi

⁷ “Terewenyi na nyoe mochienengo. Pfulenyi, na nyoe mochiwona. Kape-kapenyi moongo na nyoe mochipfunguyo.

⁸ Kyipfa orio moterewa nekyeambilyia; na ulya mopfula nekyewona; na ulya mokapa-kapa moongo nechipfunguyo moongo.

⁹ Ang'u kuwoṙe mndu uha konyu, mono-kye kamterewa mkate, echimwenenga igoe?

¹⁰ Ang'u kamterewa ikunga, echimwenenga njoka?

¹¹ Kyasia kokooya nyoe, mui wawicho, muichi ienenga wana wanyu shienengo shicha, ngyesa chi ngoseṟa mnu Awu onyu akyeri ruwewu echienenga mecha walya wekyemterewa-pfoe?

¹² Kyasia shoose mukundi muṟundio nyi wandu, na nyoe waṟundienyi kuṙo. Kyipfa iga nyigo mawawaso na malosho ga weonguo shisuku.”

Kyichumi Kyisuse

¹³ “Iṙenyi na numba kui moongo ulya msuse. Kyipfa moongo nyi umlandari, na njia iyendie wuṙetsinyi nyi ingyilandari, na nyi wafoi wekyeiṙa na numba kui moongo-cho.

¹⁴ Kyaindi moongo nyi umsuse, na njia iyendie moonyi o mlungana nyi ingyisuse, na wekyeiwona nyi sa waangu.”

Mbonyi tsa Walosha wa Wongo

¹⁵ “Kushowenyi na weonguo shisuku wa wongo, wandu wekyecha na konyu wakyeri cha moondo, kyaindi ipfo mrimenyi kowo nyi shisii shilang'a.

¹⁶ Mochiwamanya kui ndunda tsawo. Ngyesa wandu wekyehaa sabibu mshenyi, ang'u ndunda ngyicha tseloṙa nduonyi?

¹⁷ Na wuṙo orio ikyiṙi lyicha lyekyekumbia ndunda ngyicha; na ikyiṙi lyiwicho lykyekumbia ndunda ngyiwicho.

¹⁸ Ikyiṙi lyicha lyeiṙima ikumbia ndunda ngyiwicho maa ikyiṙi lyiwicho ndunda ngyicha-pfo.

¹⁹ Orio ikyiṙi lyilekyekumbia ndunda ngyicha lyekyemanyo na iwiyitso moṙonyi.

²⁰ Kyasia na wuṙo kyikyeri kui ndunda tsawo mochiwamanya.”

Mfiri o Ianduyo

²¹ “Chi orio mndu ekyengyiwia, ‘Mndumii, Mndumii’ echiiṙa na ipfo Wumangyinyi wo ruwewu-pfo; sile ulya ekyeosha shilya Awu oko akyeri ruwewu akundi.

²² Wafoi wechingyiwia mfiri ulya, ‘Mndumii, Mndumii, luleonguo shisuku kui rina lyapfo, na kui rina lyapfo iwuta waṟufui wawicho, na kui rina lyapfo iwuta shindo shifoi sha maṟiyisho?’

²³ Naaho-ng'u ngyechiwawia na pata, ‘Ngyimuichi nyoe maa ale-pfo. Wukyenyi koko, nyoe mokyeṟunda mawicho.’ ”

Wewika Numba Wawi

²⁴ “Kyasia orio mndu ekyeicho maṙeṙo-ga gako na igaosha, nechiwa cha mndu awoṙe wuṟango, alewika numba yakye wuye ya iṟaṟa.

²⁵ Mvuo ikakapa, mra ung'anyi ukocha, shiwiṟi shikakuma, shikakapa numba iya, ilaolokye; kyipfa ingyiyekyie wuye ya iṟaṟa.

²⁶ Na orio mndu echiicho maṙeṙo gako alagaoshe, nechiwa cha mndu mtondo, alewika numba yakye wuye ya mlelya;

²⁷ mvuo ikakapa, mra ung'anyi ukocha, shiwiṟi shikakuma, shikakapa numba iya, ikaoloka, na ioloka lyayo lyikawa lying'anyi.”

Wuchilyi wo Yesu

²⁸ Na lyilya Yesu alemarisa igamba kuṙo, wuingyi wo wandu wuleṟiyio mnu kyipfa kya malosho gakye.

²⁹ Cha kyipfa naweiwalosha cha mndu awoṙe wuchilyi, maa chi cha walya wawekyelosha mawawaso-pfo.