Matayo 28 - Kivunjo New Testament 1999

Iṟuka lya Yesu

¹ Na lyilya mfiri o onyonya uleiṙa, ochikya mfiri o kuwooka o juma Maria Makyidalena, na Maria ulya o kawi, waleyenda indeambuya kyilome kyilya.

² Na hawewoṙe kyiriinza kying'anyi kya uruka; kyipfa malaika o Mndumii nalesoka iwuka ruwewu, kacha kaiṟimitsa igoe lyilya kalyiṙamilyia.

³ Na fana yakye iwekyeri cha mbawa, na mkoṟoṟi okye mwiilyi cha Kyipoo.

⁴ Na kui imwowuo, waringyi walya wakaṙeṙema, wakawa cha wapfu.

⁵ Malaika kagaluo, kawia waka walya, “Mulaowuoe, cha kyipfa ngyiichi kye muipfula Yesu alekapio msalabenyi.

⁶ Akyeri iha-pfo; kyipfa amṟuka, chandu alegamba. Nnjonyi, muambuye handu awemlaṟe.

⁷ Na nyoe yendenyi faṟa, mundewia wanalosho wakye, amṟuka ko wapfu. Naimusongoya iyenda Galyilaya. Nyi pfo-ndu mochimmbona. Aikyonyi-ng'u, ngamummbia.”

⁸ Wakafuma iwinyi iwuka kyilomenyi, kui wuowu na sia ing'anyi, wakayenda weṙicha iongoya wanalosho wakye mbonyi.

⁹ Na Yesu kakarisana nawo, echigamba, “Ngamuiṟikyiṟa!” Wakatikyira kufuhi wakammbaṙa maṙende, wakamwindia.

¹⁰ Numa ya iho Yesu kawawia, “Mulaowuoe. Yendenyi, mundewia wana wa wama wako wayende Galyilaya. Nyi pfo-ndu wechingyiwona.”

Kyindo Waringyi Walegamba

¹¹ Na walya kyiyeri waweiyenda, asikari waata waleiṙa na mṟinyi, wakaongoya wang'anyi wa makohanyi mbonyi tsa shindo shoose shileṟundika.

¹² Wakasanza hamwi na wasongoru, wakachila, wakaenenga asikari heleri tsifoi,

¹³ wechigamba, “Gambenyi kye wanalosho wakye walecha kyio, wakamwiwa, kyiyeri soe luwelee.

¹⁴ Na mbonyi-tsi tsikamanyika ko mchilyi o uruka-lu, soe loṙeṙa na oe, na echimmbutia kyindo kyiwicho-pfo.”

¹⁵ Kyasia wakaambilyia heleri tsilya, wakawuta chandu walelosho. Na mbonyi-tso tsikaṙunganana ko Wayuda mṟasa inu.

Iwonekyia Wanalosho

¹⁶ Na wanalosho walya ikumi na umwi wakayenda Galyilaya mṟasa fumvu lyilya Yesu alewawia.

¹⁷ Nawo kyiyeri walemmbona, walemwindia; kyaindi waata walewaṙa iiṙikyia lyaangu.

¹⁸ Yesu kacha na kowo, kaṙeṙa nawo, kawawia, “Ngyimṙambikye wuchilyi woose ruwewu na wuyanenyi.

¹⁹ Kyasia, yendenyi, mundegaluo masanga goose iwa wanalosho, mochiwapatisa kui rina lya Awu, na Mana, na Mumuyo Mweele;

²⁰ na iwalosha iosha shoose ngyilemmbi nyoe. Na inyi ngyikyeri na nyoe mfiri yoose, mṟasa mafurumionyi ga wuyana.”