Matayo 22 - Kivunjo New Testament 1999

Mfano o Shelya sha Wolyi

¹ Yesu kagaluo, kawawia-se kui mṙeṙie, echigamba,

² “Wumangyi wo ruwewu wufananyi na mangyi umwi aleachikyia mono-kye wolyi.

³ Kaṙuma shisinga shakye shilage walya wawewalage na kulya wolyinyi; nawo wakalega icha.

⁴ Kaṙuma-se shisinga shingyi, echigamba, ‘Wienyi walya wawalage, kye ngyiṟeyeṟie shelya shako; umbe tsako na orio kyindo kyinoru shamshinjo, na shoose shammba; nnjonyi na wolyinyi.’

⁵ Kyaindi wakamina, wakayenda, umwi ṙemenyi kokye, umwi mbuchenyi yakye;

⁶ na walya waletsugaa wakawaṙa shisinga shilya shakye, wakashiwutia shindo shiwicho, na ishiwaaga.

⁷ Kyasia mangyi ulya kakapo nyi nyashi; kaṙika mbaganyi tsakye, karumatsa wawaagi walya, karumatsa mṟi owo kui moṙo.

⁸ Numa ya iho kawia shisinga shakye, ‘Wolyi wommba, kyaindi walya wawalage wawaṟi-pfo.

⁹ Kyasia yendenyi mṟasa handu mtandaṟa ikooyanyi na woose mowawona walagenyi na wolyinyi.’

¹⁰ Shisinga shilya shikafuma shikayenda njienyi ing'anyi, shikasania woose walewawona, wawicho na wecha; wolyi wukoichuo wayenu.

¹¹ Kyaindi kyiyeri mangyi ulya aleiṙa na numba kundu naambuye wayenu wakye, kawona pfo mndu umwi alaṟee mkoṟoṟi o wolyi.

¹² Kammbia, ‘Mbuya-ko, noiṙa kuṙa na kunu na iyoe uwoṙe mkoṟoṟi o wolyi-pfo?’ Na oe kauṟa kyegamba.

¹³ Mangyi kawia waṟundi, ‘Mpfungyenyi mawoko na maṙende, mṙuonyi mundemmbiyitsa meemenyi o nja. Nyipfo kochiwaṙa ṟanyi na ilya ngakuru.

¹⁴ Cha kyipfa walage nyi wafoi, indi wasambuṟe nyi waangu.’ ”

Mbonyi tsa Itaa Kodi

¹⁵ Naaho-ng'u Mafarisayo wakayenda wakalya njama, chandu wemṙega kui maṙeṙo.

¹⁶ Wakaṙuma kokye wanalosho wawo hamwi na Maherodi, wakagamba, “Mlosha, luichi kye iyoe nyi mndu o loi, na njia ya Ruwa nokyeilosha kui wuloi, maa okyesaṟa rina lya mndu oose-pfo, cha kyipfa okyeambuya fana tsa wandu-pfo.

¹⁷ Kyasia luwie, nuwonyi kuṙa? Nyi sungusinyi ienenga Kaisari kodi, ang'u chi wuṙo-pfo?”

¹⁸ Kyaindi Yesu kamanya wuwicho wowo, kagamba, “Ny'kyilyi mungyiyesha, nyoe wakulembecheṟi?

¹⁹ Ngyiloṟenyi heleri ya kodi.” Nawo wakamwendie dinari.

²⁰ Kawawia, “Nyi ya wui sanamu-i na kyiṟeio-kyi?”

²¹ Wakammbia, “Nyi ya Kaisari.” Kawawia, “Kyasia, enengyenyi Kaisari shikyeri sha Kaisari, na Ruwa shikyeri sha Ruwa.”

²² Kyiyeri waleicho waleṟiyio, wakamṙa wakayenda.

Mbonyi tsa Iṟuka ko Wapfu

²³ Mfiri ulya Masadukayo, wandu wekyegamba kye kuwoṙe iṟuka lya wapfu-pfo, waleyenda kokye, wakammbesa,

²⁴ wechigamba, “Mlosha, Mose nalegamba, ‘Mndu kapfa, alawoṙe wana, mono-wamae naalyikye mka ulya okye, kundu mono-wamae nawone mana.’

²⁵ Kyasia koṙu kuwewoṙe wana wa mka mfungaaṙe. O kuwooka kaalyika, kapfa, na kyipfa alawoṙe mana, kaṙeeya mono-wamae mka okye.

²⁶ Na wuṙo o kawi na oe, na o kaṟaaṟu, mṟasa woose mfungaaṙe.

²⁷ Mafurumionyi ga woose mndu mka ulya na oe kapfa.

²⁸ Kyasia, kyiyeri kya iṟuka lya wapfu, nechiwa mka o uha kyiiṙi kya walya mfungaaṙe? Kyipfa woose wawekyeri na oe.”

²⁹ Yesu kagaluo, kawawia, “Muiṙeka, cha kyipfa muichi shiṟeio maa wuiṙimi wo Ruwa-pfo.

³⁰ Cha kyipfa walya wekyeṟuka ko wapfu wekyealyika maa ialyiko-pfo, kyaindi wekyewa cha malaika wa ruwewu.

³¹ Lyingyi-se ko mbonyi tsa iṟuka lya wapfu, muichi kyindo kyilya kyileṙeṙo nyi Ruwa, echigamba,

³² ‘Inyi nyi Ruwa o Abrahamu, na Ruwa o Isakyi na Ruwa o Yakobo?’ Ruwa chi Ruwa o wapfu-pfo, indi o wai na moo.”

³³ Na kyiyeri wuingyi wo wandu waleicho waleṟiyio, kyipfa kya malosho gakye.

Iwawaso Lying'anyi kuta Goose

³⁴ Na kyiyeri Mafarisayo waleicho kye nalegaluo ndiṟi Masadukayo walya, waleṙamia kyiṙombo handu hamwi.

³⁵ Umwi owo, aichi mawawaso, kammbesa, echimwesha,

³⁶ “Mlosha, kyiiṙi kya mawawaso nyi lyiha lying'anyi kuta goose?”

³⁷ Yesu kammbia, “Kunda Mndumii Ruwa opfo kui ngoo yapfo yoose, na kui mrima opfo oose, na kui wuṟango wopfo woose.

³⁸ Ilyi nyilyo iwawaso lying'anyi kuta goose, nalyo nyi lya kuwooka.

³⁹ Na lya kawi lyifananyi nalyo, nalyo nyi ilyi, ‘Kunda momṟasa opfo cha mrima opfo.’

⁴⁰ Mawawaso goose na malosho ga weonguo shisuku gakyeri kyiiṙi kya mawawaso-ga gawi.”

Mbonyi tsa Mesia

⁴¹ Na kyiyeri Mafarisayo walesanzia handu hamwi, Yesu nalewawesa, echigamba, “Muwonyi kuṙa mbonyi tsa Kristo?

⁴² Nyi mono-wui?” Wakammbia, “Nyi o Dawidi.”

⁴³ Kawawesa, “Kyasia kyawa-ng'u kuṙa Dawidi kyiiṙi kya Mumuyo ilaga Mndumii, echigamba,

⁴⁴ ‘Mndumii nalewia Mndumii oko, uṙamie kuwoko koko ko kulyoe, mṟasa kyiyeri ngyechiwika washituwa wapfo, wanda ya wuchilyi wopfo?’ ”

⁴⁵ “Kyasia, Dawidi kamlaga Mndumii, nawa-se kuṙa mono-kye?”

⁴⁶ Maa kulewaṙa mndu aleiṙima imgaluo kyindo-pfo; maa kuwoṙe mndu oose alekaria wookyia mfiri ulya immbesa kyindo-se-pfo.