Matayo 2 - Kivunjo New Testament 1999

Wayenu wa Ura lo Ngamenyi

¹ Lyilya Yesu alefeo Betilehemu ya Uyuda, kacha kyiyeri kya mangyi Herode, wandu wawewoṙe wuṟango wo mbonyi tsa nyenyeri wa ura lo ngamenyi waleshika Yerusalemu, wechigamba,

² “Nyi kwi ai ulya alefeo mangyi o Wayuda? Kyipfa lulewona nyenyeri yakye ura lo ngamenyi, na soe locha luchemuolokyia.”

³ Kyasia mangyi Herode amuicho isho, nalewoṙo nyi fowa mrimenyi, na wandu wa Yerusalemu taa hamwi na oe.

⁴ Kasania wang'anyi wa makohanyi woose na walosha wa mawawaso, kapfula mbonyi kowo, Kristo nafeo kwi?

⁵ Nawo wakammbia, “Kyiiṙi kya Betilehemu ya Uyuda; kyipfa nyi wuṙo kyiwekyiṟeie nyi moonguo shisuku:

⁶ ‘Na iyoe Betilehemu, urukyenyi lo Yuda, ukyeri mtutu wachilyinyi wa Yuda maa ale-pfo; kyipfa kopfo nechiwuka mochilyia uruka, echilyisa wandu wako Isiraelyi.’ ”

⁷ Numa Herode kalaga wandu walya wawoṙe wuṟango wo mbonyi tsa nyenyeri kawaṙa nawo kyisanzionyi kyiṟika kawawesa nyi indi nyenyeri-yo ilewoneka.

⁸ Kawaṙuo Betilehemu, kagamba, “Yendenyi mundewesa mnu mbonyi tsa mana; na mukommbona, ngyiendienyi mbonyi, kundu na inyi ngyindemwindia.”

⁹ Nawo waicho maṙeṙo ga mangyi, walewooka kyaro; na nyenyeri iya waleiwona ura lo ngamenyi ikawasongoya, mṟasa ikayenda ikagoṟoka wuye ya handu mana awekyeri.

¹⁰ Na lyilya walewona nyenyeri iya walewoṙo nyi sia ing'anyi mnu.

¹¹ Wakaiṙa na numba, wakawona mana hamwi na Maria wamae, wakapfiria ndi wakamwindia; nawo wampfunguo mkunja yawo wakamwenengyia shindo sha woguru wung'anyi; sahapu na uvumba na manemane.

¹² Nawo wammbawaso nyi Ruwa ndoṙonyi walawiyilyie Herode, wakayenda urukyenyi kowo kui njia ingyi.

Indeowa Misiri

¹³ Na iwo wamuyende, malaika o Mndumii nalecha na ko Yosefu ndoṙonyi kagamba, “Yenda, uṙuo mana na wamae, uṙiche na Misiri, ukae pfo mṟasa ngyikuwie; kyipfa Herode nakundi ipfula mana namrumatse.”

¹⁴ Kayenda kaṙuo mana na wamae kyio, kayenda Misiri,

¹⁵ kakaa pfo mṟasa Herode kapfa; kundu kyiafukyie kyindo kyileṙeṙo nyi Mndumii kui ndumo ya moonguo shisuku, echigamba, “Iwuka Misiri ngyilelaga mono-ko.”

Iwoogo lya Wana

¹⁶ Naaho-ng'u Herode, ammbone kye ammbutio shindo sha ngyeṟo nyi wandu walya wawoṙe wuṟango wo mbonyi tsa nyenyeri naleicho nyashi mnu, kaṙuma wandu wakawaaga wana woose wa kyisoṟo wawekyeri kulya Betilehemu na ipfo mṟasenyi koose, wookyia wawoṙe maka iwi na wanda ya iho, ko kyiyeri kyoose alekyimanya ko wandu walya wawoṙe wuṟango wo mbonyi tsa nyenyeri.

¹⁷ Naaho-ng'u kyileafukyia kyindo kyilegambo nyi moonguo shisuku Yeremia, echigamba,

¹⁸ “Ṟui lyileaṙanyio Rama, wukyiwa, na ikapa ṟanyi lying'anyi, Raheli echifiiṟia wana wakye, alaiṙikyie iwiyiṟio moo, kyipfa woose wawepfiie.”

Iwuya na Nasareti

¹⁹ Kyaindi kyiyeri Herode alepfa, malaika o Mndumii nalecha na ko Yosefu ndoṙonyi ipfo Misiri,

²⁰ kagamba, “Amka, uṙuo mana na wamae uwuye na kulya urukyenyi lo Isiraelyi; kyipfa wampfa walya waweikundi iwaaga mana-cho.”

²¹ Kayenda kaṙuo mana na wamae, kashika uruka lo Isiraelyi.

²² Kyaindi amwicho kye Arikyelao nawoṙe wuchilyi ipfo Uyuda handu ha Herode awuye, naleowuo iyenda pfo; na oe ammbawaso ndoṙonyi kayenda ngyuura tsa Galyilaya.

²³ Kakaa mṟinyi uwekyelago Nasareti; kundu kyiafukyie kyindo kyileṙeṙo nyi weonguo shisuku: “Nechilago Mnasorayo.”