Matayo 19 - Kivunjo New Testament 1999

Mbonyi tsa Iletsana Wolyi

¹ Na lyilya Yesu alemarisa ionguo maṙeṙo-go nalefuma Galyilaya kayenda kaiṙa na urukyenyi lo Uyuda, molyolya o Yoridan.

² Wuingyi wufoi wo wandu wulemuosha, kawakyiṟia pfo.

³ Kyasia Mafarisayo wakayenda kokye, wakamwesha, wechimmbia, “Ngyesa nyi sungusinyi mndu iṙa mka okye chandu akukundia?”

⁴ Kagaluo, kawawia, “Muichi kye ulya alewagumba mawookyionyi, nalegumba mndu msoṟo na mndu mka?”

⁵ Kaengyeṟa igamba, “Kyipfa kya ikyo, mndu nechiṙa awuye na wamae, nawaṙane tapu na ioshana na mka okye; na iwo wawi wechiwa mmbiu umwi.

⁶ Kyasia wakyeri wawi-se-pfo, indi mmbiu umwi. Kyasia walya Ruwa awalunga, mndu alawaletsane.”

⁷ Wakammbia, “Kyasia nyi wuṙa-ng'u Mose alegamba kye mka-cho naenengo kyiṟeio kyeletsana wolyi, na imṙa?”

⁸ Kawawia, “Mose, kyipfa kya wuumu wo mrima yanyu, nalemuenenga momu o lekana na waka wanyu; kyaindi wookyia mawookyionyi kyiwekyeri kuṙo-pfo.

⁹ Na inyi ngammbia nyoe, orio mndu echiṙa mka okye, sile nyi kyipfa kya wuṟui, kaalyika ungyi, naṟuguya. Na ulya aalyika ulya aṙio naṟuguya.”

¹⁰ Wanalosho wakye wakammbia, “Mbonyi tsa mndu na mka okye tsikawa kuṙo, kuwoṙe kyiira ialyika-pfo.”

¹¹ Kyaindi oe kawawia, “Chi woose weiṙima iambilyia ṙeṙo-lyi-pfo, sile walya wawaenengye wuiṙimi.

¹² Kyipfa kuwoṙe wandu walekyekuwinisha na mbonyi tsa wolyi kyipfa wawafee mbaṟe-yo iyo. Lyingyi-se kuwoṙe wandu wawaime nyi wandu wengyi pfinya tsekuwinisha na mbonyi tsa wolyi. Ngoseṟa kuwoṙe wandu waleṙumbuo wo wawenyi iṙa ikuwinisha na mbonyi tsa wolyi kyipfa kya Wumangyi wo ruwewu. Eiṙima iambilyia ṙeṙo-lyi, nalyiambilyie.”

Iwikyia Wana Mboṟa

¹³ Naaho-ng'u kaendio wana watutu kundu nayekyie mawoko wuye yawo na iwaterewia; wanalosho wakye wakaṙeṙia walya walewaende.

¹⁴ Kyaindi Yesu kagamba, “Lekyenyi wana watutu wache na koko; maa mulawashingyie; cha kyipfa wafananyi na iwo, Wumangyi wo ruwewu nyi wowo.”

¹⁵ Kayekyia mawoko gakye wuye yawo kawuka pfo.

Manakye Mnjama

¹⁶ Na mndu umwi kayenda kokye kammbia, “Mlosha, ngyiwute kyindo kyiha kyicha, kundu ngyiwone moo o mlungana?”

¹⁷ Kammbia, “Ny'kyi kyitewe ungyiwesa mbonyi tsa wucha? Ai mcha nyi umwi. Kyaindi kokunda iiṙa na moonyi o mlungana, osha kyilya mawawaso gakundi.”

¹⁸ Kammbia, “Mawawaso gaha?” Yesu kagamba, “Nyi iga: Ulawaage, Ulaṟuguye maa Ulaṟuguyo, Ulaiwe, Ulaṟingyishie wongo.

¹⁹ India awuyo na womoo, Kunda momṟasa opfo chandu ukukundi iyoe kumonyi.”

²⁰ Manakye ulya kammbia, “Igo goose ngyekyeosha kyilya gakundi. Ny'kyikyi ngyiwuṟie-se?”

²¹ Yesu kammbia, “Kokunda iwa mndu aafutsie shoose yenda undekumba shoose uwoṙe, uenengye wakyiwa, na iyoe nochiwaṙa kyiseyesoe ruwewu, numa nnjo ungyioshe.”

²² Kyiyeri manakye ulya aleicho ṙeṙo-lyo, kawuka ho akuinyaṙie; kyipfa nawewoṙe masaa gafoi.

²³ Yesu kawia wanalosho wakye, “Ny'kyaloi, ngammbia kye kyechiwa kyilemeri mnjama iiṙa na Wumangyinyi wo ruwewu.

²⁴ Lyingyi-se ngammbia, nyi kyaangu ngoseṟa ngamia iiṙa ṟochonyi lya sindanu, kuta mnjama iiṙa na Wumangyinyi wo Ruwa.”

²⁵ Kyiyeri wanalosho waleicho, waleṟiyio mnu, wechigamba, “Nyi wui-ng'u echiiṙima ikyia?”

²⁶ Yesu kawaitukuya na pfinya, kawawia, “Ko wandu ikyo kyeiṙimika-pfo; kyaindi ko Ruwa shoose shekyeiṙimika.”

²⁷ Naaho-ng'u Petiro kagaluo, kammbia, “Soe luleṙa shoose lukokuosha; lochienengo kyi?”

²⁸ Yesu kawawia “Ny'kyaloi, ngammbia kye nyoe mulengyiosha inyi, wuyanenyi wuhya, kyiyeri Mono-Adamu echiṙamia kyiṙinyi kya mng'ano okye, na nyoe mochiṙamia shiṙinyi ikumi na shiwi, mochianduya mbaṟe ikumi na tsiwi tsa wandu wa Isiraelyi.

²⁹ Na orio mndu aleṙa numba, ang'u mono-wamae o kyisoṟo ang'u o kyika, ang'u awuye, ang'u wamae, ang'u wana, ang'u maṙema, kyipfa kya rina lyako, nechiambilyia ka igana, na ioṟa moo o mlungana.

³⁰ Kyaindi wafoi wai wa kuwooka wechiwa wefurumia, na wai wefurumia wechiwa wa kuwooka.”