Matayo 17 - Kivunjo New Testament 1999

Iilachika Fana

¹ Na mfiri iṟandaaṟu yamuiṙe Yesu kaṙuo Petiro na Yakobo, na Yohane mono-wamae, kawaende mṟasa wuye ya fumvu lyileshi handu halawoṙe wandu.

² Kailachika fana yakye mbele yawo; kyaam kyakye kyikaaka-aka cha mnengyeṟi; mkoṟoṟi okye ukoila cha ngyesa.

³ Mose na Elyiya wakacha na kowo wakaṙeṙa na Yesu.

⁴ Petiro kagaluo, kawia Yesu, “Mndumii, nyi kyicha soe ikaa iha. Kokunda, ngyechiachikyia matengo gaṟaaṟu iha. Lyimwi lyapfo iyoe, na lyimwi lya Mose, na lyimwi lya Elyia.”

⁵ Kyiyeri aweiṙeṙa, ipuchi lyiilyi lyikawaendie mrinje; na ṟui lyikawuka kulya ipuchinyi, lyikagamba, “Ichu nyi Mono-ko, mkunde oko, ngyimchihiye kyipfa kyakye; muaṙanyienyi oe.”

⁶ Na kyiyeri wanalosho walya waleicho, waleoloka na ndewu, wakaowuo mnu.

⁷ Yesu kacha, kawapaaya, kagamba, “Amkyenyi, maa mulaowuoe.”

⁸ Wakaambuo, walawone mndu sile Yesu amonyi.

⁹ Na kyiyeri waweisoka fumvunyi, Yesu nalewawia, “Mulawie mndu oose mbonyi tsa isho moloṟo, mṟasa kyiyeri Mono-Adamu echiṟuka ko wapfu.”

¹⁰ Wanalosho wakye wakammbesa, wechigamba, “Kyasia ny'kyilyi walosha wa mawawaso wekyegamba kye Elyia nawaṟi icha kuwooka?”

¹¹ Na oe kagaluo, kawawia, “Loi Elyia naicha kuwooka, na oe nechiachikyia shoose;

¹² kyaindi ngammbia kye Elyiya amcha, walammanye, kyaindi wakammbutia orio kyindo walekunda. Na wuṙo Mono-Adamu na oe aindelyiso wukyiwa kowo.”

¹³ Naaho-ng'u wanalosho walya walemanya kye naṙeṙa nawo mbonyi tsa Yohane Mpatisi.

Ikyiṟo lya Manakye awoṙo nyi Mṟufui Mmbicho

¹⁴ Nawo kyiyeri waleshika kyisanzionyi, mndu umwi kacha na kokye, kampfiria ndi, echigamba,

¹⁵ “Mndumii, usaṟie mono-ko, cha kyipfa nawoṙo nyi iuma nguku, na ilyiso wukyiwa wuwicho; kyipfa kafoi nekyeoloka moṙonyi, na kafoi mṟingyenyi.

¹⁶ Ngamwende na ko wanalosho wapfo, walaiṙime imkyiṟa.”

¹⁷ Yesu kagaluo, kagamba, “Nyoe rika lyilawoṙe iiṙikyia, lyiendie njia ilawaṟi, ngyechikaa hamwi na nyoe mṟasa indi? Ngyeṙuana na nyoe mṟasa indi? Mwendenyi na kunu koko.”

¹⁸ Yesu kaṙeṙia mṟufui ulya mmbicho, kawuka mana ulya. Manakye ulya kyakyia wookyia kyiyeri kyilya.

¹⁹ Numa wanalosho walya wakayenda ko Yesu kui kyiṟika, wakagamba, “Ny'kyilyi soe lulaiṙima immbuta?”

²⁰ Yesu kawawia, “Kyipfa kya wufofo wo iiṙikyia lyanyu. Cha kyipfa, ny'kyaloi, ngammbia, mukowaṙa iiṙikyia lyishikyie cha mbeu ya haradalyi mochiwia fumvu-lyi, ‘Wuka iha uyende kulya;’ nalyo lyechiwuka ho; maa kochiwaṙa kyindo kyilechiiṙimika konyu-pfo. [

²¹ Kyaindi mbaṟe-i yekyewuka sile kui iterewa na ikuretekyia-pfo.]”

Ikumbuṟio lya Upfu lo Yesu

²² Nawo kyiyeri wawekyeri Galyilaya, Yesu kawawia. “Mono-Adamu naindewiko mawokonyi ga wandu, nawo wechimmbaaga, na mfiri o kaṟaaṟu nechiṟuka”.

²³ Wakawoṙo nyi fowa mnu mrimenyi kowo.

Itaa Ukamba lo Hekalu

²⁴ Na kyiyeri waleshika Kaperinaumu, walya wawekyesania kyifunjoe kya shekyelyi waleyenda ko Petiro, wakagamba, “Ngyesa mlosha onyu aienengyia kyifunjoe kya shekyelyi-pfoe?” Kagamba, “Nekyeenengyia.”

²⁵ Na oe kyiyeri aleiṙa na kanyi Yesu nalesonguo immbesa, echigamba, “Nuwonyi kuṙa, Simion? Wamangyi wa wuyana wekyeambilyia kodi ang'u ukamba ko wandu waha? Ko wana wawo ang'u ko wayenu?”

²⁶ Na oe kyiyeri alegamba, “Ko wayenu,” Yesu nalemmbia, “Kyasia, kokooya nyi wuṙo, wana wawaṟi itaa ukamba-pfo.

²⁷ Kyaindi kundu lulachewawutia kyindo lukowawihiṟa, yenda ipalyipalyinyi undewiyitsa-pfo ndoana uwaṙe ikunga lyilya lyawoneka kuwooka, na kotambaṟuo ṙumbu lyalyo nowona shekyelyi yetaa ukamba lo hekalu. Ṙuo iyo undewaenengyia kyipfa kyako na kyipfa kyapfo.”